CIIYO 59
Mulakonzya Kuliyumya Ciindi Nomupenzyegwa
Kalitanalampa, Banakristo boonse bayookazyigwa, naa kupenzyegwa buya. Sena eeci ceelede kutuyoosya?
1. Nkaambo nzi ncotulangila kupenzyegwa?
Bbaibbele cakutainda mumbali lyaamba kuti: “Boonse aabo bayanda kupona buumi bwakubelekela Leza cakulyaaba mukuyanzana a Kristo Jesu abalo bayoopenzyegwa.” (2 Timoteyo 3:12) Jesu wakapenzyegwa nkaambo tanaakali wanyika ya Saatani. Andiswe tatuli banyika, aboobo tatugambwi ciindi notupenzyegwa amfwulumende zyamunyika eeyi alimwi ambunga zyabukombi.—Johane 15:18, 19.
2. Mbuti mbotukonzya kulibambila kupenzyegwa?
Tweelede kuyumya lusyomo lwesu muli Jehova lino. Abuzuba amujane ciindi cakupaila kulinguwe alimwi akubala Jwi lyakwe. Kamujanika lyoonse kumiswaangano yambungano. Kucita boobu kuyoomugwasya kuba anguzu nzyomuyandika, kutegwa muliyumye cabusicamba kukupenzyegwa kuli koonse nkomukonzya kujana, nokuba kuti kuzwa kubanamukwasyi. Mwaapostolo Paulo, kanji-kanji iwakali kupenzyegwa wakalemba kuti: “Jehova ngomugwasyi wangu; tandikooyoowa pe.”—Bahebrayo 13:6.
Tulakonzya kuyumya busicamba bwesu kwiinda mukukambauka lyoonse. Kukambauka kutuyiisya kusyoma Jehova alimwi akuzunda kuyoowa bantu. (Tusimpi 29:25) Kuti mwaba abusicamba bwakukambauka lino, munoolibambilide kukambauka nokuba kuti mfwulumende yaulesya mulimo wesu.—1 Batesalonika 2:2.
3. Ino kuliyumya kutugwasya buti ciindi notupenzyegwa?
Mubwini, tatukukkomanini kupenzyegwa, pele ciindi notuliyumya, lusyomo lwesu lulayuma kapati. Cilongwe cesu a Jehova cilayuma kapati nkaambo tulalubona lugwasyo lwakwe ciindi notulimvwa kuti inga tatucikonzyi kuzumanana kuliyumya. (Amubale Jakobo 1:2-4.) Cilamucisa Jehova kutubona katupenga, pele ulakkomana ciindi notuliyumya. Bbaibbele lyaamba kuti: “Ikuti mwaliyumya nomupenga akaambo kakucita zibotu, eeci ncintu cibotu kuli Leza.” (1 Petro 2:20) Bulumbu mbwayoobapa Jehova aabo boonse baliyumya cakusyomeka, mbuumi butamani munyika imunoonyina basikukazya bukombi bwakasimpe.—Matayo 24:13.
AMWIIYE ZINJI
Atubone kaambo katondezya kuti cilakonzyeka kuzumanana kusyomeka kuli Jehova ciindi notupenzyegwa alimwi ambwayootulumbula.
4. Mulakonzya kuliyumya kukukazyigwa abanamukwasyi
Jesu wakalizyi kabotu-kabotu kuti banamukwasyi bamwi tabakakukkomanini kusala kwesu kwakukomba Jehova. Amubale Matayo 10:34-36, akubandika mubuzyo ooyu:
-
Ncinzi cikonzya kucitika ciindi munamukwasyi naasala kubelekela Jehova?
Kutegwa tubone cikozyanyo mumakani aaya, atweebelele VIDIYO, akubandika mubuzyo uutobela.
-
Ncinzi ncomukonzya kucita kuti munamukwasyi naa mulongwe wanu wasola kumutyompya kubelekela Jehova?
Amubale Intembauzyo 27:10 alimwi a Marko 10:29, 30. Mwamana kubala lugwalo lumwi alumwi, amubandike mubuzyo ooyu:
-
Mbuti cisyomezyo eeci mbocikonzya kumugwasya ikuti banamukwasyi naa balongwe batalika kumukazya?
5. Amuzumanane kukomba Jehova nokuba kuti mulapenzyegwa
Kuyandika busicamba kubelekela Jehova ciindi bamwi nobasola kutukasya kucita boobo. Atweebelele VIDIYO, akubandika mubuzyo uutobela.
-
Mbuti zikozyanyo izili muvidiyo eeyi mbozyamuyumya?
Amubale Milimo 5:27-29 alimwi a Bahebrayo 10:24, 25. Mwamana kubala lugwalo lumwi alumwi, amubandike mubuzyo ooyu:
-
Nkaambo nzi ncociyandika kapati kuzumanana kukomba Jehova nokuba kuti mulimo wesu wakukambauka naa miswaangano zyalesyegwa?
6. Jehova uyoomugwasya kuliyumya
Bakamboni ba Jehova baziimo ziindene-indene alimwi abukkale bwiindene-indene, cakusyomeka bazumanana kubelekela Jehova nokuba kuti balapenzyegwa. Kutegwa mubone cakabagwasya, atweebelele VIDIYO. Mpoonya tubandike mubuzyo uutobela.
-
Muvidiyo, ncinzi cakabagwasya Bakamboni aaba kuliyumya?
Amubale Baroma 8:35, 37-39 alimwi a Bafilipi 4:13. Mwamana kubala lugwalo lumwi alumwi, amubandike mubuzyo ooyu:
-
Mbuti lugwalo oolu mbolumupa lusyomo lwakuti inga mwacikonzya kuliyumya kusunko lili lyoonse?
Amubale Matayo 5:10-12, akubandika mubuzyo ooyu:
-
Nkaambo nzi ncomukonzya kukkomana nokuba kuti mulapenzyegwa?
Mamiliyoni aabakombi ba Jehova bazwidilila kuliyumya kukukazyigwa. Andinywe inga mwacikonzya!
BAMWI BAAMBA KUTI: “Inga tiindacikonzya kuliyumya kukupenzyegwa.”
-
Magwalo nzi aakonzya kubagwasya kuba abusicamba mbobayandika?
MUBUFWAAFWI
Jehova ulakukkomanina kusolekesya nkotucita kutegwa tumubelekele nokuba kuti tulapenzyegwa. Kwiinda mulugwasyo lwakwe, tulakonzya kuliyumya!
Ncinzi Ncomwaiya?
-
Nkaambo nzi Banakristo ncobeelede kulangila kupenzyegwa?
-
Ncinzi ncomukonzya kucita lino kutegwa kamunoolibambilide ciindi kupenzyegwa kwaakutalika?
-
Ncinzi cikonzya kumupa kuba alusyomo lwakuti inga mwamubelekela Jehova, tacikwe makani asunko lili lyoonse ndyomukonzya kujana?
AMUZYIBE ZINJI
Amubone mukwesu uucili mwana-mwana uupandulula mbwaakamugwasya Jehova kutegwa aliyumye ciindi naakaangwa akaambo kakutatola lubazu mutwaambo twacisi.
Amubone icakagwasya banabukwetene bamwi kumubelekela Jehova cakusyomeka alimwi kwamyaka minji, nokuba kuti bakali kukazyigwa.
Kuzumanana Kubelekela Jehova Ciindi Bukkale Nobwacinca (7:11)
Amwiiye mbomukonzya kuba basicamba ciindi nomupenzyegwa.
“Amulibambile Lino Kujatikizya Kupenzyegwa” (Ngazi Yamulindizi, July 2019)
Ino tweelede kukubona buti kukazyigwa abanamukwasyi, alimwi mbuti mbotukonzya kuzwidilila mubuyumuyumu buboola akaambo kaceeci?
“Kasimpe Kaleta ‘Panga, Ikutali Luumuno’” (Ngazi Yamulindizi, October 2017)
Andiza Inga Mwaakkomanina Ayaaya
MIBUZYO IIVWULA KUBUZYIGWA
Ino Ndwiiyo Nzi Lwamu Bbaibbele Ndobapa Bakamboni ba Jehova?
Mulakonzya kubelesya Bbaibbele lili lyoonse nomwiiya mupulogilamu iitabbadelelwi ya Bakamboni ba Jehova. Amwaanguluke kutamba bamukwasyi wanu boonse naa balongwe.
