CHIIYO 59
Ulakonzya Kulisimya Chiindi Nupenzegwa
Lino-lino naakuti muchiindi chilikunembo, maKristu boonse bazookazigwa naakuti kupenzegwa. Zyeelede kutuyoosya na eezi?
1. Nkamboonzi nitweelede kulangilila kupenzegwa?
Bbayibbele lyaamba kuti: “Boonse aabo bayanda kupona buumi bwakubelekela Leza cakulyaaba mukuyanzana a Kristo Jesu abalo bayoopenzyegwa.” (2 Timoteyo 3:12) Jesu wakali kupenzegwa akaambo kakuti taakali wanyika pe. Andiswe tatuli banyika pe, nkinkaako, tatugambi pe chiindi bamfulumende abazikombelo nibatupenzya.—Johane 15:18, 19.
2. Niinzi nzitweelede kuchita kuti tulibambile kupenzegwa?
Lino nchichiindi chakuti tube aalusyomo lusimide muli Jehova. Weelede kujana chiindi chakukomba akubala Bbayibbele buzuba abuzuba. Kkala kunjila miswaangano yambungano. Zintu eezi ziyookugwasya kuti ulisimye chiindi nwaanoopenzegwa nikuba kuti wapenzegwa aabamumpuli yako. Mwaapostolo Pawulu wakali kupenzegwa loko, wakaamba kuti: “Jehova ngomugwasyi wangu; tandikooyoowa pe.”—Bahebrayo 13:6.
Alubo tulakonzya kubaachibindi kuti twakkala katukambawuka. Kukambawuka kupa kuti tusyome Jehova akuti tuzunde penzi lyakuyoowa bantu. (Tusimpi 29:25) Kuti wabaachibindi chakukambawuka lino, ziyookugwasya kuti ukabe aachibindi chakukambawuka nikuba mfulumende yakasya mulimu wesu.—1 Batesalonika 2:2.
3. Kulisimya chiindi nitupenzegwa kutugwasya biyeni?
Nisimpe kuti kupenzegwa takunoneezyi pe, pesi kuti twalisimya chiindi nitulikupenzegwa lusyomo lwesu lulasima. Nga twaswena aafwiifwi aJehova nkaambo nga twabona mbatugwasya chiindi nitumvwa katutachikwe manguzu aakwiinkilila kunembo. (Bala Jakobo 1:2-4.) Jehova tabotelwi pe kuti katuli mumapenzi pesi ulabotelwa kuti watubona katuli kulisimya. Bbayibbele lyaamba kuti: “Ikuti mwaliyumya nomupenga akaambo kakucita zibotu, eeci ncintu cibotu kuli Leza.” (1 Petro 2:20) Jehova uyoobalongezya boonse balisimya kwiinda mukubapa buumi butamani kabakkala munyika iitakwe bantu bakazya bukombi bwakasimpe.—Matayo 24:13.
YIYA ZYIINGI
Bona kuti kugwasya biyeni kukkala katusyomeka kuli Jehova nikuba katulikupenzegwa.
4. Ulakonzya kulisimya chiindi nukazigwa aabamumpuli
Jesu wakazitondeezya aantanganana kuti bamumpuli balakonzya kutabotelwa kuti twasala kukomba Jehova. Bala Matayo 10:34-36, mpawo musandule mubuzyo uutobela:
-
Niinzi chikonzya kuchitika kuti umwi mumpuli wasala kukomba Jehova?
Kuti ubone zikonzya kuchitika, mweebele VIDIYO, mpawo musandule mubuzyo uutobela.
-
Niinzi nzweelede kuchita kuti bbululu wako naakuti mweenzinyokwe weezya kuyanda kukukasya kukomba Jehova?
Bala Intembauzyo 27:10 a Marko 10:29, 30. Nimwazwa aakubala vesi imwi ayimwi, musandule mubuzyo uutobela:
-
Chisyomezyo eechi kujana chakugwasya biyeni chiindi nulikukazigwa abamumpuli naakuti abeenzinyokwe?
5. Kkala kukomba Jehova nikuba kuti ulikupenzegwa
Tweelede kuba aachibindi kuti tuzumanane kukomba Jehova nikuba bamwi kabalikutukazya. Mweebele VIDIYO, mpawo musandule mubuzyo uutobela.
-
Zikozyano zili muvidiyo eeyi zyakusimya biyeni?
Bala Milimo 5:27-29 a Bahebrayo 10:24, 25. Nimwazwa aakubala vesi imwi ayimwi, musandule mubuzyo uutobela:
-
Nkamboonzi nikuyandikana kuti tuzumanane kukomba Jehova nikuba kuti mulimu wesu wakukambawuka naakuti miswaangano yesu yakasigwa?
6. Jehova uyookugwasya kuti ulisimye
Bakamboni baJehova balaaminyaka iisiyene-siyene alubo bakakomezegwa munzila iisiyene, bakazumanana kukomba Jehova nikuba chiindi nibakali kupenzegwa. Kuti ubone zyakabagwasya, mweebele KAVIDIYO. Kuzwa waawo, musandule mubuzyo uutobela.
-
Niinzi chakagwasya Bakamboni aaba kuti balisimye?
Bala Baroma 8:35, 37-39 a Bafilipi 4:13. Nimwazwa aakubala vesi imwi ayimwi, musandule mubuzyo uutobela:
-
Vesi eeyi itondeezya biyeni kuti ulakonzya kulisimya nuli mumapenzi?
Bala Matayo 5:10-12, mpawo musandule mubuzyo uutobela:
-
Niinzi chikonzya kupa kuti ubotelwe nikuba kuti ulikupenzegwa?
Mamiliyoni aabakombi baJehova bakalisimya nibakali kupenzegwa. Anduwe ulakonzya kulisimya!
BAMWI BAAMBA KUTI: “Tandikonzyi pe kulisimya kandilikupenzegwa.”
-
Ngaali mavesi aakonzya kubagwasya?
CHIFWIINSYO
Jehova ulabotelwa kuti twalisimya chiindi nitulikupenzegwa. Tulakonzya kulisimya kuti twagwasigwa aanguwe!
Mibuzyo Yakwiindulula
-
Nkamboonzi maKristu nibeelede kulangilila kupenzegwa?
-
Niinzi nzweelede kuchita lino kuti ulibambile kupenzegwa?
-
Niinzi chipa kuti ubaachoonzyo chakuti ulakonzya kukomba Jehova nikuba kulikupenzegwa?
YANDUULISISYA
Bona umwi uuchikula mbaakagwasigwa aaJehova kuti alisimye chiindi naakasungidwe akaambo kakutatola lubazu mulizyanyika.
Bona zyakagwasya imwi mpuli kuti babelekele Jehova kwaminyaka myiingi nikuba kuti bakali kukazigwa.
Bona mbukonzya kuzunda kukazigwa.
“Libambile Kupenzegwa Kakuchili Lino” (Ngaziyakulinda, July 2019)
Tweelede kubabona biyeni bamumpuli batukazya alubo kujana twalizunda penzi eeli?
“Kasimpe Kayeta ‘Panga Ikutali Luumuno’” (Ngaziyakulinda, October 2017)
