DYONDZO 59
U Nga Tiyisela Loko U Xanisiwa
Vakreste hinkwavo va ta kanetiwa hambi ku ri ku xanisiwa. Xana sweswo swi fanele swi hi chavisa?
1. Hikwalaho ka yini hi swi languterile leswaku hi ta xanisiwa?
Bibele yi swi veka erivaleni yi ku: “Hinkwavo lava navelaka ku hanya hi ku tinyiketela eka Xikwembu hi ku fambisana na Kreste Yesu na vona va ta xanisiwa.” (2 Timotiya 3:12) Yesu u xanisiwile hikuva a a nga ri xiphemu xa misava ya Sathana. Na hina a hi xiphemu xa misava, hikwalaho a hi hlamali loko hi xanisiwa hi mifumo ya misava leyi ni hi minhlangano ya vukhongeri.—Yohane 15:18, 19.
2. Hi nga tilunghiselela njhani ku xanisiwa?
Hi fanele hi n’wi tshemba swinene Yehovha sweswi. Siku ni siku tinyike nkarhi wa ku khongela ni wa ku hlaya Rito ra yena. Vana kona etinhlengeletanweni ta vandlha mikarhi hinkwayo. Swilo leswi hinkwaswo swi ta ku nyika matimba lawa u ma lavaka ya ku tiyisela nxaniso wihi ni wihi hi xivindzi, hambiloko u xanisiwa hi swirho swa ndyangu. Muapostola Pawulo loyi a xanisiweke mikarhi yo tala, u tsale a ku: “Yehovha i mupfuni wa mina; a ndzi nge chavi.”—Vaheveru 13:6.
Loko hi chumayela nkarhi ni nkarhi, sweswo swi ta hi pfuna leswaku hi ya hi va ni xivindzi. Ku chumayela ku endla leswaku hi tshemba Yehovha hi nga va chavi vanhu. (Swivuriso 29:25) Loko u va ni xivindzi xa ku chumayela sweswi, u ta lunghekela ku ya emahlweni u chumayela hambiloko mfumo wu hi sivela ku chumayela.—1 Vatesalonika 2:2.
3. Swi hi pfuna njhani ku tiyisela loko hi xanisiwa?
I ntiyiso leswaku a swi hi tsakisi ku xanisiwa kambe loko hi tiyisela ku xanisiwa, ripfumelo ra hina ra tiya. Hi tshinela eka Yehovha hikuva wa hi pfuna loko hi titwa hi nga ha ri na matimba. (Hlaya Yakobo 1:2-4.) Yehovha u twa ku vava loko a hi vona hi xaniseka, kambe wa tsaka loko hi tiyisela. Bibele yi ri: “Loko mi xaniseriwa ku endla leswinene kutani mi tiyisela, sweswo swa amukeleka eka Xikwembu.” (1 Petro 2:20) Yehovha u ta nyika hinkwavo lava tiyiselaka hi ku tshembeka vutomi lebyi nga heriki emisaveni leyi hinkwavo va nga ta gandzela yena ntsena, ku nga ri na loyi a va sivelaka ku n’wi gandzela.—Matewu 24:13.
ANAKANYISISA
Twana lexi endlaka swi koteka swi tlhela swi vuyerisa ku tshama hi tshembekile eka Yehovha hambiloko hi xanisiwa.
4. U nga swi kota ku tiyisela loko u xanisiwa hi vandyangu
Yesu a a swi tiva kahle leswaku van’wana endyangwini wa hina a va nge swi lavi leswaku hi gandzela Yehovha. Hlaya Matewu 10:34-36, ivi mi bula hi xivutiso lexi:
-
Ku nga ha endleka yini loko un’wana endyangwini a hlawula ku tirhela Yehovha?
Leswaku u vona xikombiso xa mhaka leyi, tlanga VHIDIYO, ivi mi bula hi xivutiso lexi landzelaka.
-
U ta endla yini loko xaka ra wena kumbe munghana wa wena a ringeta ku ku tshikisa ku tirhela Yehovha?
Hlaya Pisalema 27:10 na Marka 10:29, 30. Endzhaku ko hlaya tsalwa ha rin’we, bulani hi xivutiso lexi:
-
Xitshembiso lexi xi nga ku pfuna njhani loko van’wana endyangwini wa wena kumbe vanghana va ringeta ku ku tshikisa ku tirhela Yehovha?
5. U nga tshiki ku gandzela Yehovha hambiloko u xanisiwa
Swi lava xivindzi ku tirhela Yehovha loko van’wana va ringeta ku hi sivela. Tlanga VHIDIYO, ivi mi bula hi xivutiso lexi landzelaka.
-
Mhaka ya vamakwerhu va le ka vhidiyo leyi yi ku tiyisa njhani?
Hlaya Mitirho 5:27-29 na Vaheveru 10:24, 25. Endzhaku ko hlaya tsalwa ha rin’we, bulani hi xivutiso lexi:
-
Hikwalaho ka yini swi ri swa nkoka ku ya emahlweni hi gandzela Yehovha hambiloko ntirho wa hina wo chumayela wu siveriwile?
6. Yehovha u ta ku pfuna leswaku u tiyisela
Timbhoni ta Yehovha ta malembe yo hambanahambana leti humaka emisaveni hinkwayo ti ye emahlweni ti tirhela Yehovha hi ku tshembeka hambiloko ti xanisiwa. Leswaku u vona leswi ti pfuneke, tlanga VHIDIYO. Endzhaku mi bula hi xivutiso lexi landzelaka.
-
Eka vhidiyo leyi, i yini leswi pfuneke Timbhoni leti leswaku ti tiyisela?
Hlaya Varhoma 8:35, 37-39 na Vafilipiya 4:13. Endzhaku ko hlaya tsalwa ha rin’we, bulani hi xivutiso lexi:
-
Tsalwa leri ri ku tiyisekisa njhani leswaku u nga tiyisela ndzingo wun’wana ni wun’wana?
Hlaya Matewu 5:10-12, ivi mi bula hi xivutiso lexi:
-
Hikwalaho ka yini u nga tsakaka hambiloko u xanisiwa?
Vagandzeri va Yehovha va timiliyoni va ye emahlweni va n’wi tirhela hi ku tshembeka hambiloko va kanetiwa. Na wena u nga swi kota!
VAN’WANA VA RI: “A ndzi nge swi koti ku tiyisela loko ndzi xanisiwa.”
-
Hi wahi matsalwa lama nga n’wi pfunaka ku tshemba leswaku a nga swi kota?
NKATSAKANYO
Yehovha u ma teka ma ri ya nkoka matshalatshala lawa hi ma endlaka leswaku hi n’wi tirhela hambiloko hi xanisiwa. Hi nga swi kota ku tiyisela hi ku pfuniwa hi yena!
Mpfuxeto
-
Hikwalaho ka yini Vakreste va fanele va langutela leswaku va ta xanisiwa?
-
U nga endla yini sweswi leswaku u tshama u lunghekile loko nxaniso wu fika?
-
I yini lexi nga ta ku pfuna u tiyiseka leswaku u nga swi kota ku tirhela Yehovha ku nga khathariseki miringo leyi u nga langutanaka na yona?
KUMA LESWI ENGETELEKEKE
Vona makwerhu loyi a ha riki muntshwa loko a hlamusela ndlela leyi Yehovha a n’wi pfuneke ha yona ku tiyisela loko a khomiwile hikwalaho ko ala ku ya evusocheni.
Twana leswi pfuneke vatekani van’wana leswaku va tirhela Yehovha hi ku tshembeka malembe yo tala hambiloko va kanetiwa.
Dyondza ndlela leyi u nga vaka ni xivindzi ha yona loko u xanisiwa.
“Lungheka Ka Ha Ri Sweswi Leswaku U Ta Kota Ku Tiyisela Nxaniso” (Xihondzo xo Rindza, July 2019)
Hi fanele hi endla yini loko hi kanetiwa hi swirho swa ndyangu naswona hi nga langutana njhani ni nkaneto wolowo?
“A Ndzi Tisanga Ku Rhula, Kambe Ndzi Tise Banga” (Xihondzo xo Rindza, October 2017)
U Nga Ha Tsakela
SWIVUTISO LESWI TALAKA KU VUTISIWA
I Yini Dyondzo Ya Bibele Leyi Dyondzisiwaka Hi Timbhoni Ta Yehovha?
Eka dyondzo ya Bibele leyi dyondzisiwaka hi Timbhoni ta Yehovha, u nga tirhisa vuhundzuluxeri byin’wana ni byin’wana bya Bibele. Titwe u ntshunxekile ku rhamba ndyangu hinkwawo kumbe vanghana va wena leswaku mi ta dyondza swin’we.
