Ko se leva nei, kae ka fe‵paki a Kelisiano katoa mo ‵tekemaiga, ke oko foki loa ki fakasauaga. E mata, e ‵tau o manava‵se tatou?

1. Kaia e fakamoe‵moe tatou ke fe‵paki mo fakasauaga?

E fakaasi manino mai i te Tusi Tapu, “me i tino katoa kolā e ma‵nako o ola kae tapuaki fakamaoni atu ki te Atua i te ‵kau fakatasi mo Keliso Iesu ka fakasauagina foki.” (2 Timoteo 3:12) Ne fakasauagina a Iesu me ne seki fai a ia mo fai se vaega o te lalolagi a Satani. A tatou foki e se ne vaega o te lalolagi, tela la, e se ‵poi tatou māfai ko fakasauagina tatou ne malo pule o te lalolagi mo fakapotopotogā lotu.—Ioane 15:18, 19.

2. Ne a ‵tou mea e ‵tau o fai ke toka ei tatou ki fakasauaga?

E ‵tau o fakamalosi aka nei ne tatou te ‵tou tali‵tonu ki a Ieova. Fakaavanoa a taimi i aso katoa ke ‵talo ki a ia kae faitau ki se vaega i tena Muna. Kau faeloa ki fakatasiga a te fakapotopotoga. Ka fesoasoani atu a mea katoa konei ke maua ne koe te malosi ke fakafesagai atu ki so se fakasauaga, ke oko foki ki fakasauaga mai i tino o te kāiga. Ne tusi mai a te apositolo ko Paulo, telā ne fakasauagina faeloa: “A Ieova ko toku fesoasoani; ka se mataku eiloa au.”—Epelu 13:6.

E mafai foki o fakamalosi aka te ‵tou loto ma‵losi mai te talai atu faeloa. A te galuega talai, e akoako ei tatou ke tali‵tonu ki a Ieova ke manumalo i te mataku ki tino. (Faataoto 29:25) Kafai e ati aka ne koe te loto malosi ke talai i te taimi nei, ka toka eiloa koe ke tumau i te talai atu faitalia me e fakatapu ne te malo te ‵tou galuega.—1 Tesalonia 2:2.

3. E aoga pefea ki a tatou a te tumau i te fakamaoni faitalia fakasauaga?

E tonu, e se fia‵fia tatou ke fakasauagina, kae kafai e tumau eiloa tatou i te fakamaoni faitalia fakasauaga, ka gasolo eiloa o malosi te ‵tou fakatuanaki. Ka gasolo o pili atu te ‵tou fesokotakiga mo Ieova māfai e lavea ne tatou tena fesoasoani i te taimi e mafau‵fau tatou me ko seai se ‵tou mea e mafai o fai. (Faitau te Iakopo 1:2-4.) E logo‵mae a Ieova māfai e logo‵mae tatou, kae e fiafia a ia māfai e tumau tatou i te fakamaoni. E fai mai te Tusi Tapu: “Kae kafai e fa‵ki koutou i logo‵maega ona ko te faiga o mea ‵lei, se mea fakafiafia te mea tenā ki te Atua.” (1 Petelu 2:20) A te taui ka tuku atu ne Ieova ki tino katoa kolā e tumau i te fakamaoni, ko te ola se-gata-mai i se lalolagi, telā e seai ne ‵tekemaiga ki te tapuakiga tonu.—Mataio 24:13.

 KELI MALOSI IFO

4. E mafai o tumau koe i te fakamaoni faitalia te ‵teke mai o kāiga

Ne iloa ‵lei ne Iesu me ka mafai o se ‵lago mai ‵tou kāiga ki te ‵tou fakaikuga ke tapuaki atu ki a Ieova. Faitau te Mataio 10:34-36, ko sau‵tala ei ki te fesili tenei:

• Ne a mea e mafai o ‵tupu māfai ko fakaiku aka ne se tino i te kāiga ke tavini atu ki a Ieova?

5. Tumau i te tapuaki atu ki a Ieova faitalia fakasauaga

 6. Ka fesoasoani atu a Ieova ki a koe ke tumau i te fakamaoni

 MANATU AOGA

E fakatāua ne Ieova ‵tou taumafaiga ke tavini atu ki a ia faitalia fakasauaga. Mai tena fesoasoani, e mafai eiloa o tumau tatou i te fakamaoni!

Fesili

• Kaia e ‵tau ei o fakamoe‵moe a Kelisiano ke fe‵paki latou mo fakasauaga?

• Ne a au mea e mafai nei o fai ke toka ei koe ki fakasauaga?

• Ne a mea e mafai o fesoasoani atu ke maua te loto talitonu me e mafai eiloa o tavini atu koe ki a Ieova faitalia so se tofotofoga?