59-ТӤ УРОК

Тӥ быгатоды уйылон-уллянъёсты чиданы!

ЛЭЗЁНО

Котькуд христиан муртлэн улоназ луоз сыӵе дыр, куке солы люкетозы Иеговалы ужаны-тыршыны, оло нош, уйылозы-уллялозы но. Кышкано-а милемлы солэсь?

1. Кытысь ми тодӥськомы, милемыз уйылозы-уллялозы шуыса?

Библиын гожтэмын: «Ваньзэс Иисус Христос бордын шонерлыко улыны кутскисьёсты улляса-ӝикатыса возьыны кутскозы» (2 Тимофейлы 3:12). Иисусэз уйылӥзы-уллязы, малы ке шуоно Шайтанлэн дуннеяз со мурт адями вал. Ми но та дуннелэн адямиосыз ӧвӧл. Соин ик паймоно ӧвӧл, кивалтӥсьёс но мукет религиосысь адямиос милемыз уйыло-улляло шуыса (Иоанн 15:18, 19).

2. Кызьы уйылон-уллянъёслы дасяськоно?

Милемлы али ик ини дышетсконо Иегова вылэ оскиськыны. Со понна котькуд нунал вӧсяськоно, Библиез лыдӟоно но кенешлэн котькуд пумиськоназ ветлоно. Со юнматоз милемыз но кужым сётоз уйылон-уллянъёсты чиданы, соку но, куке ми соосын семьяямы пумиськимы. Апостол Павел, кудӥз ачиз уйылон-уллянъёсын ӵем пумиськылӥз, гожтӥз: «Уг кышка, Кузё-Инмар мон палан» (Еврейёслы 13:6).

Озьы ик кышкасьтэм луыны но уйылон-уллянъёсты чиданы милемлы юрттоз тодытон уже пыриськон. Ӟеч иворез веракумы, ми дышетскиськомы Иегова вылэ оскиськыны но адямиослэсь кышканмес вормыны (Мадёнъёс 29:25). Ми али ик ини дышетскимы ке чиданы но кышканмес вормыны, ӟеч иворез верамысь ум дугдэ соку но, куке кивалтӥсьёс ужмес нуыны уз лэзе ни (1 Фессалоникаослы 2:2).

3. Уйылон-уллянъёсты чидаськомы ке, кыӵе со милемлы пайда вае?

Веранэз ӧвӧл, милемлы уг кельшы, куке милемыз уйыло-улляло. Но уйылон-уллянъёс милемыз асьмемыз но юнгес каро, осконмес но юнмато. Нош кужыммы быре но тани-тани сётскомы ини кадь потэ ке, соку ми Иеговалэсь юрттэмзэ шӧдӥськомы но Иеговалы эшшо но матэ луиськомы. (Лыдӟе Иаковлэсь 1:2—4.) Иеговалы туж вӧсь милесьтым курадӟеммес адӟыны. Но со туж шумпотэ, куке адӟе, уйылон-уллянъёсын ми солы оскымон кылиськомы шуыса. Библиын верамын: «Ӟеч уж лэсьтыса вылысь курадӟоно луиськоды, но сое чидаськоды ке, со Инмарлы ярамон» (1 Пётр 2:20). Ваньзэс, кин оскымон кылёз, Иегова бакель кароз. Со соослы пумтэм вапумъёс ӵоже улон кузьмалоз дуннеын, кытын уйылон-уллянъёс уз луэ ни (Матфей 24:13).

МУРГЕС ЭСКЕРЕ

Ойдолэ тодомы, мар юрттоз уйылон-уллянъёсты чиданы но кызьы Иегова бакель кароз сое, кин оскымон кылёз.

4. Тӥ быгатоды чиданы семья пушкысьтыды уйылон-уллянъёсты

Иисус азьло ик вераз, семьяысьтымы куд-огъёсыз Иеговалы ужам-тыршеммылы пумит луозы шуыса. Лыдӟе Матфейлэсь 10:34—36 но та юанлы валэктон сётэ:

Мар вераны яке мар карыны быгатозы семьяысьтымы куд-огез, ми Иеговалы ужаны-тыршыны малпамы ке?

Тани улонысь учыръёс. Учке ВИДЕОРОЛИКЕЗ но юанлы валэктон сётэ.

ВИДЕОРОЛИК: «Иегова милемыз бордаз басьтӥз» (5:13)

Мар тӥ кароды, матысь адямиды Иеговалы ужамысь-тыршемысь дугдытыны тыршиз ке?

Лыдӟе Псалтирез 26:10 но Марклэсь 10:29, 30. Котькудзэ люкетэз лыдӟемды бере, та юанлы валэктон сётэ:

Кызьы та кылъёс юрттозы тӥледлы, матысь адямиосты Иеговалы ужаны-тыршыны люкето ке?

5. Уйыло-улляло ке но, Иеговалы ужамысь- тыршемысь эн дугдэ

Уйылон-уллянъёс дыръя Иеговалы ужан-тыршон понна, кышкасьтэм сям кулэ. Учке ВИДЕОРОЛИКЕЗ но юанлы валэктон сётэ.

ВИДЕОРОЛИК: «Уйылон-уллянъёс шоры учкытэк, кышкасьтэмесь луэ» (6:27)

Кызьы та примеръёс юртто тӥледлы кышкасьтэм луыны?

Лыдӟе Апостолъёслэсь ужъёссэс 5:27—29 но Еврейёслы 10:24, 25. Котькудзэ люкетэз лыдӟемды бере, та юанлы валэктон сётэ:

Малы дугдоно ӧвӧл Иеговалы йыбыртъямысь, кивалтӥсьёс милемлы ӟеч иворез вераны но огазе люкаськыны уг лэзё ке но?

6. Иегова юрттоз тӥледлы ваньзэ чиданы

Быдэс дунне вылын Иеговалэн Адӟись-Ивортӥсьёсыз — пичиосыз но, бадӟымъёсыз но — уйылон-уллянъёс дыръя но Иеговалы ужамысь-тыршемысь уг дугдо. Мар юрттэ соослы? Учке ВИДЕОРОЛИКЕЗ но та юанлы валэктон сётэ: