OCIPAMA 59
Ove o Pondola Oku Pandikisa Kelambalalo
Ndopo ale noke, Akristão vosi va ka liyaka loseteko yoku tatekiwa kuenda oku lambalaliwa. Anga hẽ tu sukila oku sakalala?
1. Momo lie tu lavokaila oku lambalaliwa?
Embimbiliya li popia ndoco: “Vosi vana va yongola oku ambata omuenyo umue woku sumbila Suku ndolondonge via Kristu Yesu, va ka lambalaliwavo.” (2 Timoteo 3:12) Yesu wa lambalaliwile omo okuti, ka pangele onepa koluali lua Satana. Omo okuti ka tu pangivo onepa koluali, ka ci tu komõhisa eci olombiali violuali lulo kuenda ovisoko viatavo vi tu lambalala.—Yoano 15:18, 19.
2. Tu lipongiyila ndati elambalalo?
Tu sukila oku pamisa ekolelo lietu ku Yehova cilo. Eteke leteke, tu sukila oku sokiya otembo yoku likutilila kokuaye kuenda oku tanga Ondaka yaye. Oku endaenda kolohongele viekongelo. Poku linga ovina viaco, vi ka ku ĩha ongusu lutõi o sukila poku liyaka lalambalalo osi, ndaño muẽle alambalalo ana a tunda kepata. Upostolo Paulu una okuti otembo yosi wa lambalaliwile wa soneha ndoco: “Yehova eye oñuatisi yange; si ka kuata usumba.”—Va Heveru 13:6.
Tu pamisavo utõi wetu poku kunda otembo yosi. Oku kunda ku tu kuatisa oku kolela Yehova kuenda ka tu kuatela usumba omunu. (Olosapo 29:25) Nda o kuete utõi woku kunda cilo, o ka lipongiyila oku kunda ciwa, ndaño ceci olombiali vi ka seteka oku tateka upange wetu woku kunda.—1 Va Tesalonike 2:2.
3. Tu kuatisiwa ndati poku pandikisa kelambalalo?
Ocili okuti, ka tu sanjukila oku lambalaliwa, pole, nda tu pandikisa kelambalalo, ekolelo lietu li pamisiwa. Ukamba wetu la Yehova u pama omo okuti, tu tambula ekuatiso liaye poku liyeva okuti, ka tu kuete vali ongusu yalua. (Tanga Tiago 1:2-4.) Nda tu tala ohali, Yehova o sumua calua, pole, tu u sanjuisa eci a limbuka okuti tu kasi oku pandikisa. Embimbiliya liti: “Nda vu pandikisa kohali omo lioku linga eci ciwa, ca sunguluka kovaso a Suku.” (1 Petulu 2:20) Onima Yehova a ka eca komanu vosi va pandikisa lekolelo, omuenyo ko pui, voluali lumue ka mu ka kala vali oku lambalaliwa kuefendelo liocili.—Mateo 24:13.
LILONGISA ONDONGOSI
Lilongisa esunga lieci ci tẽliwila oku amamako oku kolela ku Yehova kuenda onima yaco, ndaño lelambalalo.
4. O pondola oku pandikisa kelambalalo liepata
Yesu wa kũlĩhĩle ciwa okuti, epata lietu ka lia ponduile oku tava konjila tu nõla yoku fendela Yehova. Tanga Mateo 10:34-36, noke konomuisa epulilo li kuãimo:
-
Nye ci pita nda umue vepata o nõlapo oku fendela Yehova?
Oco o kũlĩhe umue pokati kovolandu aco, tala OVIDEO, noke konomuisa epulilo li kuãimo.
-
Nda wa linga nye nda umue ukuepata ale ekamba o seteka oku ku tateka oco ku ka vumbe Yehova?
Tanga Olosamo 27:10 kuenda Marko 10:29, 30. Noke yoku tanga ovisonehua viaco, konomuisa epulilo li kuãimo:
-
Ohuminyo eyi yi ku kuatisa ndati poku liyaka lelambalalo liepata ale liakamba vove?
5. Amamako oku fendela Yehova ndaño lelambalalo
Tu sukila oku lekisa utõi poku vumba Yehova eci vakuetu va seteka oku tu tateka oku ci linga. Tala OVIDEO, noke konomuisa epulilo li kuãimo.
-
Ovolandu a lekisiwa vovideo, a ku pamisa ndati?
Tanga Ovilinga 5:27-29 kuenda Va Heveru 10:24, 25. Noke yoku tanga ovisonehua viaco, konomuisa epulilo li kuãimo:
-
Momo lie ci kuetele esilivilo oku amamako oku fendela Yehova ndaño ceci upange wetu woku kunda, ale olohongele vietu vi tatekiwa?
6. Yehova o ka ku kuatisa oku pandikisa
Olombangi Via Yehova vakuanyamo kuenda vakuavikoti via litepa, va siata oku amamako oku vumba Yehova lekolelo, ndaño ceci va lambalaliwa. Oco o kũlĩhe eci ca siata oku va kuatisa, tala OVIDEO. Noke konomuisa epulilo li kuãimo.
-
Ndeci ca lekisiwa vovideo, nye ca kuatisa Olombangi viaco oku pandikisa?
Tanga Va Roma 8:35, 37-39 kuenda Va Filipoi 4:13. Noke yoku tanga ovisonehua viaco, konomuisa epulilo li kuãimo:
-
Ovisonehua evi vi ku ĩha ndati ekolelo liokuti o pondola oku pandikisa kovitangi viosi?
Tanga Mateo 5:10-12, noke konomuisa epulilo li kuãimo:
-
Momo lie o ponduila oku kuata esanju ndaño lelambalalo?
Afendeli valua va Yehova va siata oku kuata onima yiwa poku pandikisa kelambalalo. Ove, o pondolavo oku ci linga!
OMANU VAMUE VA POPIA VATI: “Si tẽla oku pandikisa kelambalalo.”
-
Ovisonehua vipi vi va ĩha ekolelo li sukiliwa?
NYE WA LILONGISA?
Yehova wa kapako alikolisilo tu linga poku u vumba ndaño lelambalalo. Lekuatiso liaye, tu pondola oku pandikisa!
Oku Pitulula
-
Momo lie Akristão vocili va sukilila oku lavoka elambalalo?
-
Nye o sukila oku linga cilo oco o lipongiye eci kuiya elambalalo?
-
Nye ci ku kuatisa oku liyeva okuti wa kolapo koku vumba Yehova ndaño lovitangi viñi viñi?
OCO O KŨLĨHE OVINA VIKUAVO
Tala ulandu wa manji umue umalẽhe, o lombolola ndomo Yehova o kuatisa oku pandikisa, eci a kapiwile vokayike omo liekolelo liaye.
Kũlĩhĩsa eci ca kuatisa ohueli yimue oku vumba Yehova lekolelo vokuenda kuanyamo alua ndaño lelambalalo.
Lilongisa ndomo o lekisa utõi poku liyaka lelambalalo.
“Lipongiyila Alambalalo a Laika Okuiya” (Utala Wondavululi Wevambi Linene 2019)
Tu tenda ndati elambalalo li tunda kepata kuenda nye tu sukila oku linga oco pokati ketu pa kale ombembua loku amamako oku kolela Yehova?
“Ocili ‘ka ci Nena Ombembua, Puãi ci Nena Osipata’” (Utala Wondavululi wa Mbalavipembe 2017)
Ove o ka ci Sola
APULILO A SIATA
Elilongiso Liembimbiliya li Lingiwa Lolombangi Via Yehova li Lomboloka Nye?
Lekuatiso lielilongiso li lingiwa ocali Lolombangi Via Yehova, o pondola oku kuama Lembimbiliya liosi o yongola. Lianja poku laleka epata liove liosi ale akamba vove, oco vu lilongisili kumosi.
