UYONO 59
Wo se Chirakon rẹ Omukpahen
O rhe che kri-i, Inenikristi eje che hirharoku edavwini kugbe omukpahen. Ofori nẹ oshọ mu avwanre?
1. Diesorọ e vwo rhẹro rẹ omukpahen?
Baibol na da ta: “Ihwo ejobi re guọnọ yere akpọ ọfuanfon rọ herọ vwi Kristi Jesu ke kpokpo.” (2 Timoti 3:12) E mukpahen Jesu kidie ọ dia ẹbẹre ọvo rẹ akpọ rẹ Eshu-u. Avwanre je dia ẹbẹre ọvo rẹ akpọ nana-a. Ọtiọyena, o rhe gbe avwanre unu ọke rẹ usuon rẹ akpọ na vẹ okugbe rẹ ẹga rẹ efian de muẹkpahen avwanre-e.—Jọn 15:18, 19.
2. Mavọ yen e se vwo muegbe vwọ hẹrhẹ omukpahen?
Enẹna, ofori nẹ a bọn ẹroẹvwọsuọ rẹ avwanre kpahen Jihova ganphiyọ. Rhuẹrẹ ọke kẹdẹ kẹdẹ vwọ nẹrhovwo rhe Jihova ji se Baibol na. Kpo uyono ọkieje. Enana eje cha nẹrhẹ wo vwo ẹgba wo se vwo fiudugberi chirakon ri koka koka rẹ omukpahen, ọ da tobọ dianẹ obọ rẹ ihwo rẹ orua wẹn yen o nurhe. Ọyinkọn Pọl ro rhiẹromrẹ omukpahen mamọ, da ta: “Ọrovwohwo hẹ ọchuko mẹ, oshọ gbi mu uvwe-e.”—Hibru 13:6.
A je sa bọn uduefiogbere avwanre gan womarẹ e vwo ghwoghwota ọkieje. Iruo rẹ aghwoghwo na yono avwanre nẹ a vwẹroso Jihova ji phi oshọ rẹ ihworakpọ kparobọ. (Isẹ 29:25) Wo de fiudugberi ghwoghwota na enẹna, kẹ wọ sa choma wo vwo ghwoghwota na ọ da tobọ dianẹ igomẹti dobọ rẹ iruo avwanre ji.—1 Tẹsalonaika 2:2.
3. Erere vọ yen che norhe e de chirakon rẹ omukpahen?
Vwọrẹ uyota, omukpahen vwerhen ohwo oma-a, ẹkẹvuọvo, e de se chirakon rẹ omukpahen, esegbuyota rẹ avwanre cha ganphiyọ. E che sikẹrẹ Jihova phiyọ kidie avwanre rhiẹromrẹ ukẹcha rọyen ọke rẹ ẹwẹn avwanre vwọ kuọrọn. (Se Jems 1:2-4.) Oja avwanre ria da Jihova, ẹkẹvuọvo oma vwerhọn e de chirakon. Baibol na da ta: “Ọ da dianẹ ovwan ru obo ri yovwiri rẹ ovwan da reoja fiki rọye re de chiro, ọye hẹ obo rẹ Ọghẹnẹ guọnọre.” (1 Pita 2:20) Jihova cha vwẹ arhọ ri bẹdẹ vwẹ akpọ rẹ omukpahen kanre vwọ hwosa kẹ ihwo ri fuevun te oba.—Matiu 24:13.
HIẸ KODO
Yono kpahen oboresorọ e vwo vwo imuẹro nẹ a sa fuevun kẹ Jihova ihwo da tobọ vwọsua avwanre vẹ osa rọ cha hwa kẹ avwanre.
4. Wo se chirakon rẹ omukpahen rẹ orua
Jesu riẹnre nẹ ihwo rẹ orua rẹ avwanre evo cha guọnọ nẹ a ga Jihova-a. Se Matiu 10:34-36, ovwan ta ota kpahen onọ nana:
-
Die yen sa phia ọke rẹ ohwo ọvo vwevunrẹ orua de brorhiẹn rọ vwọ ga Jihova?
Wọ vwọ mrẹ udje ọvo, hworo IVIDIO na, ovwan ta ota kpahen onọ ro nenire.
-
Die yen wo che ru siẹrẹ ohwo rẹ orua yẹrẹ ugbeyan wẹn da guọnọ nẹ wọ dobọ rẹ ẹga ri Jihova ji?
Se Une Rẹ Ejiro 27:10 kugbe Mak 10:29, 30. Ovwan de se ẹkpo ri Baibol ọvuọvo nu, ovwan ta ota kpahen onọ nana:
-
Mavọ yen ive nana sa vwọ chọn wẹ uko ọke rẹ ihwo rẹ orua yẹrẹ igbeyan wẹn de muẹkpahen owẹ?
5. Ga Jihova ọ da tobọ dianẹ wo hirharoku omukpahen
A guọnọ uduefiogbere a ke sa ga Jihova ọke rẹ ihwo efa da guọnọ dobọ rẹ avwanre jẹ. Hworo IVIDIO na, ovwan ta ota kpahen onọ ro nenire.
-
Mavọ yen idje rehẹ ividio na vwọ bọn wẹn gan?
Se Iruo Rẹ Iyinkọn Na 5:27-29 kugbe Hibru 10:24, 25. Ovwan de se ẹkpo ri Baibol ọvuọvo nu, ovwan ta ota kpahen onọ nana:
-
Diesorọ ọ vwọ ghanre e vwo muomaphiyọ ẹga ri Jihova ọ da tobọ dianẹ igomẹti dobọ rẹ emẹvwa yẹrẹ iruo aghwoghwo avwanre ji?
6. Jihova cha chọn wẹn uko vwo chirakon
Iseri ri Jihova rehẹ edje sansan fuevun ga Jihova dede nẹ e muẹkpahen ayen. Wọ sa vwọ mrẹ obo re chọn ayen uko, hworo IVIDIO na. Ovwan ta ota kpahen onọ ro nenire.
-
Vwevunrẹ ividio na, die yen nẹrhẹ Iseri yena chirakon?
Se Rom 8:35, 37-39 kugbe Filipae 4:13. Ovwan de se ẹkpo ri Baibol ọvuọvo nu, ovwan ta ota kpahen onọ nana:
-
Mavọ yen ẹkpo ri Baibol na vwọ kẹ wẹ imuẹro nẹ wo se chirakon rẹ edavwini eje?
Se Matiu 5:10-12, ovwan ta ota kpahen onọ nana:
-
Die yen sa kẹ wẹ omavwerhovwẹn dede nẹ wo hirharokuẹ omukpahen?
Iduduru rẹ ihwo re ga Jihova chirakon rẹ omukpahen re. Wo ji se ruo!
IHWO EVO TA: “Mi che se chirakon rẹ omukpahe-en.”
-
Ẹkpo ri Baibol vọ yen sa kẹ ayen imuẹro rẹ ayen guọnọre?
ỌDJẸKOKO
Oma vwerhen Jihova fikirẹ ẹgbaẹdavwọn a vwọ ga dede nẹ e rhiẹromrẹ omukpahen. Womarẹ ukẹcha rọyen, e se phikparobọ!
Ẹrhomafuẹrẹn
-
Diesorọ Inenikristi vwo rhẹro rẹ omukpahen?
-
Die yen wo se ru enẹna vwo muegbe hẹrhẹ omukpahen?
-
Die yen sa nẹrhẹ wo vwo imuẹro nẹ wọ sa ga Jihova dede nẹ wo hirharokuẹ edavwini?
HIẸ GUỌNỌ
Mrẹ eghene ọshare ọvo ro dje oborẹ Jihova vwọ chọn uko vwo chirakon ọke re vwo mu phiyọ uwodi kidie nẹ ọ ka ẹbẹre vuọvo-o.
Yono kpahen obo re chọn aye gbe ọshare ọvo uko vwọ fuevun ga Jihova vwẹ ikpe buebun dede nẹ ayen hirharoku omukpahen.
Yono kpahen obo re se vwo fiudugberi hirharoku omukpahen.
“Muegbe Hẹrhẹ Omukpahen Asaọkiephana” (Uwevwin Orhẹrẹ ri July 2019)
Ẹro vọ yen ofori nẹ e vwo ni omukpahen rẹ orua, kẹ mavọ yen a sa vwọ dia ohwo rẹ ufuoma je serọ rẹ evun-ẹfuọn rẹ avwanre?
“Uyota na Ghwa ‘Ufuoma Rhe-e, Ẹkẹvuọvo Ọlọkọ’” (Uwevwin Orhẹrẹ rẹ October 2017)
Wọ je sa Fuẹrẹn
ENỌ REDJE ẸNẸNỌ
Die Yen Uyono ri Baibol rẹ Iseri ri Jihova Vwo Muẹ kẹ Ihwo?
Vwẹ uyono ri Baibol ọphẹ rẹ Iseri ri Jihova vwo muẹ kẹ ihwo na, wọ sa reyọ kefanfan kefanfan ri Baibol ro je we vwo ruiruo. Wo se durhie ihwo rẹ orua wẹn eje yẹrẹ kugbeyan kugbeyan ru wọ guọnọre odedede.
