NGUDO 59
Ni Nga Konḓelela Musi Ni Tshi Tovholwa
Hu si kale, Vhakriste vhoṱhe vha ḓo tovholwa na u pikiswa. Naa zwenezwo zwi tea u ri tshuwisa?
1. Ndi ngani ri tshi lavhelela u tovholwa?
Bivhili i ri: “Vhoṱhe vha re na vhuthihi na Kristo Yesu, vho ḓikumedzelaho kha Mudzimu na vhone vha ḓo tovholwa.” (2 Timotheo 3:12) Yesu o vha a tshi tovholwa ngauri o vha e si tshipiḓa tsha ḽino shango ḽa Saṱhane. Na riṋe a zwi ri mangadzi musi ri tshi tovholwa nga mivhuso na madzangano a vhurereli ngauri a ri tshipiḓa tsha ḽino shango.—Yohane 15:18, 19.
2. Ri nga dzula hani ro lugela u tovholwa?
Zwino ndi tshifhinga tsha uri ri khwaṱhise lutendo lwashu kha Yehova. Ḓiṋeeni tshifhinga tsha u rabela na u vhala Ipfi ḽawe ḓuvha ḽiṅwe na ḽiṅwe. Ivhani hone miṱanganoni ya tshivhidzo tshifhinga tshoṱhe. U ita zwenezwi zwoṱhe zwi ḓo ni thusa uri ni vhe na tshivhindi musi ni tshi tovholwa, naho ni tshi khou tovholwa nga mashaka aṋu. Muapostola Paulo we a vha a tshi dzulela u tovholwa o ṅwala uri: “Yehova ndi muthusi wanga; a thi nga ofhi.”—Vhahevheru 13:6.
U ḓivhadza mafhungo maḓifha tshifhinga tshoṱhe, zwi ri thusa uri ri vhe na tshivhindi tsho engedzeaho. Musi ri tshi ḓivhadza mafhungo maḓifha, ri guda u fhulufhela Yehova nahone zwi ri thusa uri ri si ofhe vhathu. (Mirero 29:25) Arali na vha na tshivhindi tsha u ḓivhadza mafhungo maḓifha zwino, ni ḓo lugela u ḓivhadza mafhungo maḓifha na musi muvhuso u tshi lingedza u ni thivhela.—1 Vhathesalonika 2:2.
3. Ri vhuyelwa hani nga u dzula ri tshi fhulufhedzea kha Yehova musi ri tshi tovholwa?
Ndi ngoho uri a ri takaleli u tovholwa, fhedzi arali ra konḓelela musi ri tshi tovholwa, lutendo lwashu lu ḓo khwaṱha. Ri vha tsini-tsini na Yehova musi ri tshi vhona nḓila ine a ri thusa ngayo musi ri si na nungo. (Vhalani Yakobo 1:2-4.) Yehova u a pfa vhuṱungu musi a tshi vhona ri tshi khou tovholwa, fhedzi u a takala musi a tshi vhona ri tshi khou konḓelela. Bivhili i ri: “Zwi takadzaho Mudzimu ndi musi ni tshi konḓelela u tambudzwa nge na ita zwivhuya.” (1 Petro 2:20) Arali ra dzula ri tshi fhulufhedzea, Yehova u ḓo ri lambedza nga vhutshilo vhu sa fheli shangoni ḽiswa. Kha ḽeneḽo shango ḽiswa, vhathu vhoṱhe vha ḓo shumela Yehova nahone a hu na ane a ḓo vha tovhola.—Mateo 24:13.
GUDANI ZWO ENGEDZEAHO
Gudani uri ndi ngani ri tshi nga kona u dzula ri tshi fhulufhedzea kha Yehova naho vhathu vha tshi ri tovhola. Ni gude na uri Yehova u ḓo ri lambedza hani.
4. Ni nga konḓelela musi ni tshi tovholwa nga mashaka
Yesu o vha a tshi zwi ḓivha zwavhuḓi uri maṅwe mashaka ashu a nga si takalele u ri vhona ri tshi khou shumela Yehova. Vhalani Mateo 10:34-36, ni kone u fhindula mbudziso i tevhelaho:
-
Hu nga itea mini arali muṅwe muṱani a khetha u shumela Yehova?
U itela u vhona tsumbo ya zwenezwi, ṱalelani VIDIO, ni kone u fhindula mbudziso i tevhelaho.
-
Ni nga ita mini arali shaka ḽaṋu kana khonani yaṋu vha lingedza u ita uri ni litshe u shumela Yehova?
Vhalani Phisalema 27:10 na Marko 10:29, 30. Musi no no vhala vese dzoṱhe, ni fhindule mbudziso i tevhelaho:
-
Zwe zwa fhulufhedziswa kha idzi vese, zwi nga ni thusa hani musi mashaka aṋu kana khonani dzaṋu vha tshi lingedza u ita uri ni litshe u shumela Yehova?
5. Dzulani ni tshi gwadamela Yehova naho ni tshi khou tovholwa
Zwi ṱoḓa uri ri vhe na tshivhindi uri ri kone u bvela phanḓa ri tshi shumela Yehova naho vhaṅwe vha tshi khou ri thivhela. Ṱalelani VIDIO, ni kone u fhindula mbudziso i tevhelaho.
-
Tsumbo dzi re kha iyi vidio dzi ni thusa hani uri ni vhe na tshivhindi?
Vhalani Mishumo 5:27-29 na Vhahevheru 10:24, 25. Musi no no vhala vese dzoṱhe, ni fhindule mbudziso i tevhelaho:
-
Ndi ngani zwi zwa ndeme u bvela phanḓa ri tshi gwadamela Yehova naho mushumo washu wa u ḓivhadza mafhungo maḓifha wo thivhelwa kana ri si tsha tendelwa u ya miṱanganoni ya tshivhidzo?
6. Yehova u ḓo ni thusa uri ni konḓelele
Ṱhanzi dza Yehova shangoni ḽoṱhe vha dzula vha tshi fhulufhedzea naho vha tshi khou tovholwa. U itela u vhona uri vho thuswa nga mini, ṱalelani VIDIO. Ni kone u fhindula mbudziso i tevhelaho.
-
Kha vidio, ndi mini zwo thusaho dzenedzo Ṱhanzi u konḓelela?
Vhalani Vharoma 8:35, 37-39 na Vhafilipi 4:13. Musi no no vhala vese dzoṱhe, ni fhindule mbudziso i tevhelaho:
-
Dzenedzi vese dzi ni khwaṱhisedza hani uri ni nga kona u konḓelela milingo yoṱhe?
Vhalani Mateo 5:10-12, ni kone u fhindula mbudziso i tevhelaho:
-
Ndi ngani ni tshi nga takala naho ni tshi tovholwa?
Vhashumeli vha Yehova vhanzhi vho bvela phanḓa vha tshi mu shumela nga u fhulufhedzea naho vha tshi khou tovholwa. Na inwi ni nga zwi kona!
VHAṄWE VHATHU VHA AMBA URI: “Ndi nga si kone u konḓelela musi ndi tshi tovholwa.”
-
Ndi vese dzifhio dzine dza nga vha thusa uri vha vhe na fhulufhelo?
NO GUDA MINI?
Yehova u a zwi dzhiela nṱha musi ri tshi ita zwoṱhe zwine ra nga kona u itela u mu shumela naho ri tshi khou tovholwa. A nga ri thusa uri ri kone u konḓelela!
Ni Kha Ḓi Zwi Humbula?
-
Ndi ngani Vhakriste vha tshi tea u lavhelela u tovholwa?
-
Ndi mini zwine na nga zwi ita zwino uri ni dzule no lugela u tovholwa?
-
Ndi mini zwine zwa nga ni thusa uri ni vhe na vhungoho ha uri ni nga kona u shumela Yehova hu sa londwi milingo yoṱhe ine ya nga vha hone?
WANANI ZWO ENGEDZEAHO
Vhonani muṅwe wahashu ane a kha ḓi vha muswa a tshi amba nga ha nḓila ye Yehova a mu thusa ngayo musi o farwa nga nṱhani ha u sa dzhia sia.
Vhonani uri ndi mini zwo thusaho vhaṅwe vhavhingani uri vha shumele Yehova nga u fhulufhedzea lwa miṅwaha minzhi naho vha tshi khou tovholwa.
Gudani uri ni nga vha hani na tshivhindi musi ni tshi khou tovholwa.
“Ḓilugiseleni U Tovholwa Hu Tshee Zwino” (Tshiingamo, July 2019)
Ri tea u zwi dzhia hani musi ri tshi tovholwa nga mashaka nahone ri nga ita hani uri hu dzule hu na mulalo na u dzula ri tshi fhulufhedzea kha Yehova?
“Ngoho I ‘Ḓisa Banga, Hu Si Mulalo’” (Tshiingamo, October 2017)
You May Also Like
MBUDZISO DZINE DZA ANZELA U VHUDZISWA
Ngudo Ya Bivhili Ndi Mini?
Musi ni tshi khou guda na Ṱhanzi dza Yehova nga mahala, ni nga shumisa Bivhili iṅwe na iṅwe ine na i takalela. Ni nga vhidza vha muṱani ha waṋu kana khonani dzaṋu uri na vhone vha vhe hone musi ni tshi guda.
