YOOSOMA 59
Nivileleke osonttiwa moolipa murima!
Moohipisa, makristu ootheene ankela oviriha ovanyihiwa, mpaka osonttiwa. Neereke eyo enoonopopiha?
1. Mwaha wa heeni nintthuneyaahu oweherera osonttiwa?
Biblya enre: ‘ootheene ale antthuna okhala nokumi wa phama mwa Kristu Yesu, enettharatthariwe.’ (2 Timotheyo 3:12) Yesu asonttiwa mwaha woowera kherela eparte elapo ela enlamuleliwa ni Satana. Ni hiyo tho olelo va, khannerela eparte elapo ela. Mene hiyo khanintikhina vaavo ninwoonaahu anamalamulela a elapo ni asitokweene a ittiini anisonttaka.—Yohani 15:18, 19.
2. Ninkela wireherera moota heeni niwehereraka osonttiwa?
Ootheene hiyo nintthuneya olipiha nroromelo naahu wa Yehova vaanaano va. Mwiisukereke ehuhu weera nvekele ni omusoma Biblya mahuku ootheene. Ni woonela mithukumano moohihiyerera. Mwapaka itthu sootheene iyo, sinkela woovahani ikuru weera nvilele osonttiwa ori woothene, hata wa veemusini. Murummwa Paulo ahaawa vantxipale osonttiwa, owo ohimme há: “Apwiya ti ekhavihero aka; nkinova etthu aneraiye akerele mutthu.”—Aheberi 13:6.
Moota mukina wowaatxerera olipa murima, ori olaleera moohihiyerera. Olaleera onimookhaviherani waatxerera nroromelo nanyu wa Yehova ni owina omoova mutthu. (Miruku 29:25) Wakhala weera noovirelela olaleera vanaano va, ninkela okhala olikaneene weera nivirelele olaleera muhoolo, nnamwera anamalamulela yeereraka okhottiha muteko owo.—1 Atesalonika 2:2.
3. Mwaha wa heeni ovilela emaara ninsonttiwaahu onikhaviheraaya?
Ekhaikhai weera khaavo mutthu ommusivela osonttiwa. Mene etempu yeeyo ninvilelaahu, nroromelo naahu ninnalipa. Ninkhala vakhiviru ni Yehova mwaha wooweera, etempu yeeyo nnoonaahu weera khanniwera ovilela, owo onnanivaha ikuru weera nivilele. (Mmusome Yakobe 1:2-4.) Yehova onnawereya murima vaavo oniwehaawe nihaawaka. Mene owo onnahakalala vaavo onnoonaawe nivilelaka. Biblya oneera: “Muri ovilela mohawani, anyi, ola ti muteko wothamaleya va maithoni va Muluku.” (1 Pedru 2:20) Yehova olaihera ekumi yoohimala, elapo yeeyo ohinkelaaya okhala osonttiwa wa ale anrowa enavilele mpaka okhwipi.—Matheyo 24:13.
WEERA MUXUTTERE SINTXIPALE
Moone moota oraaya wooreera okhala oororomeleeya wa Yehova nnamweera musonttiwaka. Nave-tho, moone mareeliho munkelaanyu waakhela mwaha woopaka eyo.
4. Nyuwo pooti owina ovaanyihiwa vemusini vanyu
Yesu aahima weera amusi anyu khankela osiveliwa yaawoonakani munvarelaka muteko Yehova. Mmusome Matheyo 10:34-36. Avinyaka mutthekule ni epontu enttharelana:
-
Eheeni enkela okhumelela etempu yeeyo mmusi anyu onthanlaawe onvarela muteko Yehova?
Weera moone ntakihero na yeeyo, moone EVIIDIYU. Avinyaka mutthekule ni epontu enttharelana.
-
Eheeni nyuwo mwakelaanyu opaka wakhala weera nthamwene anyu onnohihani onvarela muteko Yehova?
Musome Nsalmu 27:10 ni Marko 10:29, 30. Mwamaliha osoma mutthekule woohima sa epontu enttharelana wa yeele eri yoolepa:
-
Moota heeni yoolaihera ela enkelaaya wookhaviherani ovilela ovanyihiwa veemusini naari ni asinthamwene anyu?
5. Nvirelele onvarela muteko Yehova nnamweera musonttiwaka
Ninaatthuneya olipa murima weera ninvarele muteko Yehova, vaavo atthu akina aneereraaya onikhottiha opaka eyo. Moone EVIIDIYU. Avinyaka mutthekule ni epontu enttharelana.
-
Moota heeni matakihero a eviidiyu ela alipinhaaya nroromelo nanyu?
Musome Miteko 5:27-29 ni Aheberi 10:24, 25. Avinyaka mutthekule ni epontu enttharelana wa yeele eri yoolepa:
-
Mwaha wa heeni oraaya wootthuneya ovirelela onvarela muteko Yehova nlaleeraka ni noonelaka mithukumano nnamweera nikhottiheriwaka?
6. Yehova onkela wookhaviherani weera nvilele
Anamoona a Yehova ta makhalelo oovirikana, awo ennavirelela onvarela muteko Yehova nnamweera esonttiwaka. Weera moone etthu yaakhavihenre asinna, moone EVIIDIYU. Avinyaka mutthekule ni eponto enttharelana.
-
Nviidiyuni, heeni yaamukhavihenre munna ovilela?
Mmusome Aroma 8:35, 37-39 ni Afilipi 4:13. Avinyaka mutthekule ni epontu enttharelana khula yoolepa:
-
Moota heeni yoolepa ela enlipihaaya nroromelo nanyu weera munooweera ovilela weereriwa ori wootheene?
Mmusome Matheyo 5:10-12. Avinyaka mutthekule ni epontu enttharelana:
-
Mwaha wa heeni nyuwo munhakalalaanyu nnamweera musonttiwaka?
Imiliyawu sintxipale sa arumeyi a Yehova, aawera ovilela ovaanyihiwa. Nave-tho, nyuwo munoowera!
ATTHU AKINA ANEERA: “Miyo nkiwera ovilela osonttiwa.”
-
Yoolepa heeni enkela omukhavihera mutthu owo weera akhale oolipa murima ntoko owo ontthunaawe?
NYAHA SOOTTHUNEYA
Yehova onnahela mwitti wilipihera waahu weera ninvarele muteko, nnamweera nisonttiwaka. Owo onkela onikhavihera weera nivilele!e!
Wuuluula
-
Mwaha wa heeni makristu enwehereraaya osonttiwa?
-
Eheeni nyuwo munkelaanyu opaka vaanano-va weera mwirehere mwarowaka osonttiwa?
-
Mwaha wa heeni muntthuneyaanyu ororomela weera ti wootthuneya onvarela muteko Yehova, nnamweera musonttiwaka?e!
WEERA MUSUWELE ITTHU SINTXIPALE
Moone moota Yehova amukhaviheraawe munna mmoha emaara yeeyo atthukinwaawe mwaha wa ohirowa okhottoni.
Moone etthu emoha yaakhavihenre ntheli nimoha onvarela muteko Yehova mpuwa mwa iyaakha sintxipale, nnamweera yaavanyihiwa.
Moone moota munkelaanyu ovilela osonttiwa moolipa murima.
“Mwiirehere vaanano-va weera nvilele osonttiwa” (Owehaweha, a Julho a 2019)
Moone moota munkelaanyu ohitutuxereya ovanyihiwa veemusini. Nave-tho, moone moota munkelaanyu ovirelela okhala oororomeleya ni okhalano murettele wakhala weera eyo enimweereya ni nyuwo.
“Ekhaikhai khenwiiha ‘ohiya murettele, mene nivaka’” (A Sentinela, Outubro a 2017)
