LEKSYON 59
Maiilob Mo an Pagtimaraot
Maabot an panahon, an ngatanan nga Kristiano makakaeksperyensya hin pagkontra, o pagtimaraot pa ngani. Angay ba kita mahadlok hito?
1. Kay ano nga maaram kita nga maabot an pagtimaraot?
An Biblia klaro nga nasiring: “Pagtitimarauton liwat an ngatanan nga naghihingyap magkinabuhi nga may debosyon ha Dios sugad nga mga disipulo ni Kristo Jesus.” (2 Timoteo 3:12) Gintimaraot hi Jesus tungod kay diri hiya bahin han kalibotan ni Satanas. Diri liwat kita bahin han kalibotan, salit diri kita nahipapausa kon gintitimaraot kita han mga gobyerno ha kalibotan ngan han relihiyoso nga mga organisasyon.—Juan 15:18, 19.
2. Paonan-o kita makakapangandam para ha pagtimaraot?
Kinahanglan naton yana parig-unon an aton pagsarig kan Jehova. Paggahin hin panahon kada adlaw para mag-ampo ha iya ngan magbasa han iya Pulong. Atender hin regular ha mga katirok han kongregasyon. Ini nga mga buruhaton maghahatag ha imo han kusog nga imo ginkikinahanglan basi maisugon nga atubangon an anoman nga pagtimaraot, bisan kon tikang ito ha imo mga kapamilya. Hi apostol Pablo nga damu ka beses nga gintimaraot, nagsurat: “Hi Jehova an akon parabulig; diri ako mahahadlok.”—Hebreo 13:6.
Makukultibar liwat naton an aton kaisog pinaagi han regular nga pagsangyaw. Kon nagsasangyaw kita, nahibabaro kita kon paonan-o masarig kan Jehova ngan malamposan an bisan ano nga kahadlok ha tawo. (Proberbios 29:25) Kon makultibar mo yana an kaisog ha pagsangyaw, magigin andam ka gud nga padayon nga magsangyaw bisan kon mangalimbasog an gobyerno nga pugngan an aton buruhaton.—1 Tesalonica 2:2.
3. Ano an kapulsanan ha aton kon iilubon naton an pagtimaraot?
Syempre, diri kita nalilipay kon gintitimaraot kita, pero kon malampuson nga gin-iilob naton an pagtimaraot, an aton pagtoo nagigin mas marig-on. Nagigin mas duok kita kan Jehova tungod kay naieksperyensyahan naton an iya bulig ha mga panahon nga naabat kita nga diri na naton kaya. (Basaha an Santiago 1:2-4.) Masakit kan Jehova nga makita kita nga nag-aantos, pero nalilipay hiya nga makita kita nga nagpapailob. An Biblia nasiring: “Kon gin-iilob niyo an pag-antos tungod han pagbuhat hin maopay, nakakapalipay ini ha Dios.” (1 Pedro 2:20) An balos nga ihahatag ni Jehova ha ngatanan nga matinumanon nga nagpapailob amo an waray kataposan nga kinabuhi ha kalibotan diin waray na makontra ha tinuod nga pagsingba.—Mateo 24:13.
DUGANG NGA USISAHA
Hibaroi kon kay ano nga posible nga magpabilin nga maunungon kan Jehova bisan pa han pagtimaraot, ngan kon paonan-o kita niya babalosan.
4. Maiilob mo an pagkontra han imo pamilya
Maaram gud hi Jesus nga an pipira han aton kapamilya bangin diri maruyag nga mag-alagad kita kan Jehova. Basaha an Mateo 10:34-36, katapos, hisguti niyo ini nga pakiana:
-
Ano an posible nga mahitabo kon an usa nga membro han pamilya magdesisyon nga mag-alagad kan Jehova?
Basi makita an usa nga ehemplo hini, i-play an VIDEO, katapos, hisguti niyo an masunod nga pakiana.
-
Ano an imo hihimoon kon an imo paryente o sangkay maningkamot nga paundangon ka ha pag-alagad kan Jehova?
Basaha an Salmo 27:10 ngan Marcos 10:29, 30. Katapos basahon an tagsa nga teksto, hisguti niyo ini nga pakiana:
-
Paonan-o ini nga saad makakabulig ha imo kon kontrahon ka han imo pamilya o kasangkayan?
5. Padayon nga singbaha hi Jehova bisan kon gintitimaraot
Ginkikinahanglan an kaisog basi mag-alagad kan Jehova kon naniningkamot an iba nga pugngan kita nga buhaton ito. I-play an VIDEO, katapos, hisguti niyo an masunod nga pakiana.
-
Paonan-o an mga ehemplo hini nga video naghahatag ha imo hin kaisog?
Basaha an Buhat 5:27-29 ngan Hebreo 10:24, 25. Katapos basahon an tagsa nga teksto, hisguti niyo ini nga pakiana:
-
Kay ano nga importante gud nga padayon nga singbahon naton hi Jehova bisan kon gindidiri han gobyerno an aton pagsangyaw nga buruhaton o mga katirok?
6. Bubuligan ka ni Jehova nga makailob
An mga Saksi ni Jehova ha bug-os nga kalibotan, batan-on man o lagas, padayon nga nag-aalagad hin maunungon kan Jehova bisan kon gintitimaraot hira. Basi makita kon ano an nakabulig ha ira, i-play an VIDEO. Katapos, hisguti niyo an masunod nga pakiana.
-
Ha video, ano an nakabulig hini nga mga Saksi nga makailob?
Basaha an Roma 8:35, 37-39 ngan Filipos 4:13. Katapos basahon an tagsa nga teksto, hisguti niyo ini nga pakiana:
-
Paonan-o ini nga teksto nagpapasarig ha imo nga maiilob mo an bisan ano nga pagsari?
Basaha an Mateo 5:10-12, katapos, hisguti niyo ini nga pakiana:
-
Kay ano nga puydi ka magin malipayon bisan kon gintitimaraot?
Minilyon nga nagsisingba kan Jehova an malampuson nga nakapailob ha mga pagkontra. Mahihimo mo liwat ito!
AN IBA NASIRING: “Diri ko maiilob an pagtimaraot.”
-
Ano nga mga teksto an puydi makahatag ha ira han kompyansa nga ira ginkikinahanglan?
SUMARYO
Ginpapabilhan ni Jehova an aton mga paningkamot nga mag-alagad ha iya bisan pa han pagtimaraot. Pinaagi han iya bulig, malampuson nga maiilob naton ito!
Repaso
-
Kay ano nga maaram an mga Kristiano nga maabot an pagtimaraot?
-
Ano an puydi mo himoon yana basi magin andam ka kon umabot an pagtimaraot?
-
Ano an makakabulig ha imo nga magkaada kompyansa nga makakag-alagad ka kan Jehova bisan ano pa an pagsari?
DUGANG NGA IMPORMASYON
Kitaa kon paonan-o an usa nga batan-on nga brother ginbuligan ni Jehova nga makailob han ginpriso hiya tungod han iya pagin neutral.
Usisaha kon ano an nakabulig ha usa nga mag-asawa nga magin matinumanon kan Jehova ha sulod hin damu nga katuigan bisan kon ginkukontra.
Hibaroi kon paonan-o maisugon nga aatubangon an pagtimaraot.
“Pag-andam Yana Para ha Pagtimaraot” (An Barantayan, Hulyo 2019)
Ano an angay nga magin panhunahuna naton ha pagkontra han pamilya, ngan paonan-o naton malalamposan ito?
“An Kamatuoran Nagdadara ‘Diri hin Kamurayawan, Kondi hin Espada’” (An Barantayan, Oktubre 2017)
Bangin Maruyagan Mo Liwat
KOMON NGA MGA PAKIANA
Ano an Pag-aram ha Biblia nga Igintatanyag han mga Saksi ni Jehova?
Ha libre nga interactive nga programa nga igintatanyag han mga Saksi ni Jehova, puydi mo gamiton an bisan ano nga bersyon han Biblia. Ayaw pag-alang nga paupdon an imo bug-os nga pamilya o an imo kasangkayan.
