LIJIGANYO 59
Yili Yakomboleka Kupilila Ŵane Pakwalagasya
Chinga pachangakaŵapa kapena kusogolo, Aklistu wosope chachisimana ni ŵakusisya soni ŵakulagasya. Nambo ana yeleyi yitutendekasyeje woga?
1. Ana ligongo chichi tukusajembecheya ŵane kutulagasya?
Baibulo jikusasala mwakupikanika kuti: “Wosope ŵakusaka kuŵa ni umi wakumlumba Mlungu mwa Klistu Yesu tachisimana ni yisawusyo.” (2 Timoteo 3:12) Ligongo lyakuti Yesu nganaŵa mbali ja chilambo cha Satana, ŵandu ŵamlagasisye. Pakuŵa m’wejisoni nganituŵa mbali ja chilambochi, ngatukusasimonga naga ŵaboma soni ŵadini akutulagasya.—Yohane 15:18, 19.
2. Ana mpaka tukosechele chamtuli kulagasidwa?
Apano tukusosekwa kumkulupililaga mnope Yehofa. Myoyo, lisiku lililyose apateje ndaŵi jakupopela soni kuŵalanga Maloŵe gakwe. Asimanikweje pamisongano jampingo mwakutamilichika. Yeleyi yichakamuchisya kuti aŵe ŵakulimba, atamose achalongo achimjawo kapena ŵane ali mkwalagasya wawojo. Ndumetume Paulo jwele ndaŵi ni katema ŵandu ŵamlagasyaga, jwatite, “Ambuje ni ŵakungamuchisya ŵangu ngasindenda woga.”—Ahebeli 13:6.
Naga akusalalichilaga mwakutamilichika, yichakamuchisyasoni kuŵa ŵakulimba mtima. Masengo gakulalichila gakusatukamuchisya kuti tumkulupilileje Yehofa soni kuti tukajogopaga ŵandu. (Misyungu 29:25) Naga apano akusalimba mtima kulalichila, nikuti chachiŵa ŵakoseka kupitilisya kulalichila atamose ŵaboma ali alekasisye masengo getu.—1 Atesalonika 2:2.
3. Ana tukusapata umbone wamtuli patukuŵa ŵakulupichika kwa Yehofa ŵane pakutulagasya?
Kusala yisyene, ngatukusasangalaga ŵane pakutulagasya. Nambo patukombwele kupilila, chikulupi chetu chikusalimbaga. Soni tukusaŵa paunasi ŵambone ni Yehofa patumanyilile kuti jwalakwe atukamuchisye pandaŵi jatuyiweni kuti nganituŵasoni tupilile. (Aŵalanje Yakobo 1:2-4.) Ngaŵa kuti Yehofa akusasangalalaga pakutuwona tuli mkulaga. Nambo jwalakwe akusasangalalaga patukupilila. Ni ligongo lyakwe Baibulo jikusati: “Naga mkupilila mu yipwetesi timchitenda chenene, pelepo nikuti mtesile chakwitichisidwa pameso pa Mlungu.” (1 Petulo 2:20) Naga tukuŵa ŵakulupichika kwa Yehofa, jwalakwe chachitupa umi wangamala mchilambo chasambano. Wosope ŵachachitamaga m’chilambochi, chachimtumichilaga jwalakwe pali pangali jwakwalagasya.—Mateyu 24:13.
KULIJIGANYA YEJINJI
Chitulijiganye ligongo lyakwe yili yakomboleka kuŵa ŵakulupichika kwa Yehofa ŵane pakutulagasya soni majali gachachitupa Yehofa.
4. Mpaka apilile ŵamwiŵasa mwawo pakwasisya
Yesu ŵamanyililaga chenene kuti ŵane mwiŵasa mwetu nganaŵa asachile kuti tumtumichileje Yehofa. Aŵalanje Mateyu 10:34-36, kaneko akambilane chiwusyo achi:
-
Ana ni chichi champaka chitendekwe naga jwine mwiŵasa asagwile kumtumichila Yehofa?
Alole chisyasyo panganiji, alolele FIDIYO, kaneko akambilane chiwusyo achi.
-
Ana mpaka atende yamtuli naga jwamwiŵasa mwawo kapena mjawo akwalekasya kumtumichila Yehofa?
Aŵalanje Salimo 27:10 soni Maliko 10:29, 30. Pachaŵalanje lilemba lililyosye, akambilane chiwusyo achi:
-
Ana yindu yayisasile palilembali mpaka yakamuchisye chamtuli naga ŵamwiŵasa mwawo kapena achimjawo akwasisya?
5. Apitilisyeje kumlambila Yehofa atamose pakwalagasya
Tukusasosekwa kulimba mtima kuti tumlambileje Yehofa ŵane pakutulekasya kutenda yeleyo. Alolele FIDIYO, kaneko akambilane chiwusyo achi.
-
Ana yisyasyo ya mu fidiyoji yalimbikasisye mwamtuli?
Aŵalanje Masengo 5:27-29 soni Ahebeli 10:24, 25. Pachaŵalanje lilemba lililyose ajanje chiwusyo achi:
-
Ligongo chichi yili yakusosekwa mnope kupitilisya kumlambila Yehofa atamose ŵaboma ali alekasisye masengo gakulalichila kapena kusongana?
6. Yehofa chachakamuchisya kupilila
Ŵa Mboni sya Yehofa ŵakutyochela m’mitundu jakulekanganalekangana, chinga aŵe ŵachikulile kapena ŵanache aŵele ali mkupitilisya kumtumichila Yehofa mwakulupichika atamose pakwalagasya. Kuti amanyilile chachakamuchisye jemanjaji, alolele FIDIYO. Kaneko akambilane chiwusyo achi.
-
Mwakamulana ni fidiyoji, ana ni chichi chachakamuchisye ŵa Mboniŵa kupilila?
Aŵalanje Aloma 8:35, 37-39 soni 2 Akolinto 4:7. Pachaŵalanje lilemba lililyose, akambilane chiwusyo achi:
-
Ana lilembali likwasimichisya chamtuli kuti mpaka akombole kupilila chakusawusya chilichose?
Aŵalanje Mateyu 5:10-12, kaneko akambilane chiwusyo achi:
-
Ana ligongo chichi akusosekwa kuŵa ŵakusangalala atamose pakwalagasya?
Ŵa Mboni sya Yehofa ŵajinji akombwele kupilila ŵandu pakwasisya. Wawojosoni mpaka apilile
YAKUSAŴECHETA ŴANDU ŴANE: “Nganimba ngombwele kupilila ŵane pakulagasya.”
-
Ana ni malemba gapi gampaka amsalile munduju kuti aŵe jwakulimba mtima?
YALIJIGANYISYE
Yehofa akusayamichila mnope patukutenda yakomboleka kumtumichila jwalakwe atamose ŵane pakutulagasya. Ni chikamuchisyo chakwe mpaka tukombole kupilila.
Yiwusyo Yakuwilisya
-
Ana ligongo chichi Aklistu akusajembecheya kulagasidwa?
-
Ana apano akusosekwa kutenda chichi pakosechela kulagasidwa kusogolo?
-
Ana ni chichi champaka chakamuchisye kuŵa ŵakusimichisya kumtumichila Yehofa atamose ali achingangene ni chakusawusya chilichose?
YAKULINGA YINESONI
Alole yaŵaŵechete m’bale jwine payaŵatesile Yehofa kumkamuchisya kupilila ali amŵisile mu ukayidi ligongo lyakana kwinjilila ya m’chilambo.
Alole chachakamuchisye liŵasa line kuti limtumichile Yehofa kwa yaka yejinji atamose kuti papali ŵakusisya.
Alijiganye yampaka atende kuti aŵe ŵakulimba mtima ŵandu pakwalagasya.
“Ajino Jili Ndaŵi Jambone Jakosecela Kulagasidwa” (Sanja ja Mlonda, Julayi 2019)
Ana tukoleje nganisyo syamtuli naga ŵamwiŵasa mwetu akutulagasya? Soni mpaka tutende yamtuli kuti tupitilisye kuŵa ŵakulupichika kwa Yehofa?
“Usyesyene Wangayikasya Mtendele, Nambo Upanga’” (Sanja ja Mlonda, Okotoba 2017)
You May Also Like
YIWUSYO YAKUSANONYELA ŴANDU KUWUSYA
Ana Ljiganyo lya Baibulo Lyakusatendesya Ŵamboni sya Yehofa Likusatendekwa Mwamtuli?
Muyakambilana ni Ŵamboniyi akwete ufulu ŵakamulichisya masengo Baibulo jawo. Yili yakomboleka kwaŵilanga achimjawo soni ŵamwiŵasa mwawo kuti atende nawo lijiganyoli.
