Dị eego esi ituughạ aBaibul phọ iphẹn phọ, nạ matuughạ ni ibadị araraạr ilọ aZihova. Araraạr phọ nạ matuughạ bọ dị iikia i/lo meḍighi ni idị nạ maphomhoghiạn aZihova iboom dị eeni nạ maḅọgh ni loor anạ angọ nyodị aḅilhẹ aḍiiny muụm. Eḍighi maạr dị nạ ko/ḍighi iduọn phọ, pọ eeni nạ raatughiạn ni oḍighi iduọn phọ moọny amem. Kuolọ ghalhamọ nạ maḍiiny ni muụm, kewạ ni mọ kiọm ghisigh akparamhị ghan siya arighirị phọ anạ r’aZihova. Nạ katue ni aḍighi iduọn phọ k’agee-pọ. Ika?

1. Eeghe kụ iḍighi kụ nạ kakiọm bọ ghisigh akparamhị ghan siya arighirị phọ anạ r’aZihova?

Ewạ mọ olhọgh inyaạm oghiọm ghisigh okparamhị ghan siya arighirị phọ ayira r’aZihova. Eeghe kụ iḍighi? ‘Obọ yira komeel ghan bọ oḍuạ’ esi odị. (Hibru 2:1) Eeghe kụ kilhoghonhaạn iyira ḍighaạgh oghiọm aghisigh okumu aZihova? Yira kotue ni olọgh mem oḍighi oghaạph ilọ omhạr phọ, oḅilhẹ owạ inhọn areten okumu Enhaạn obughẹ. (Ibạl Filipai 3:16.) Okumu aZihova kụ emạ eten aghuḍum dị enhighẹ epelheghiom—Psalm 84:10.

2. Eeghe iyaạr kụ edị nạ kaḅilhẹ akiọm ghisigh aḍighi ghan?

Ghalhamọ r’iduọn ituughạ aBaibul phọ anạ iphẹn phọ resi bọ eekunha, adọl phọ anạ idiphọ onyọ aKristẹn ke/si eekunha. ABaibul phọ aḅẹm mọ ewạ ni dị yira ‘kokpolhoghiạn imoom igey aroozọ phọ.’ (Efesọs 4:23, 24) Iduọn nạ aghiọm bọ ghisigh ratuughạ ghan Ekpo-onhụ phọ Enhaạn, aḅilhẹ rakị ghan ituughạ, nạ katuughạ ni imhoom araraạr ilọ aZihova r’araagharạ phọ odị. Wạ reten dị nạ kakuamhị atuughaạny raagharạ phọ odị siphẹ adọl aghuḍum mọ anạ. Kiọm ghisigh anmeeghi ghan raraạr siphẹ adọl aghuḍum mọ anạ orue oḍighi idị olhoghi aZihova kaḅaạl.

3. Ika kụ idị aZihova kalhoghonhaạn nyinhạ ḍighaạgh ophoph oghị aghisigh?

ABaibul phọ aḅẹm mọ: “Enaạn . . . kimuneni ni inyina, imiighe inyina, ingọ inyina inyaạm, iphighi inyina ekparamị.” (1 Pita 5:10) Oomo phọ ayira rosoman ghan ni odẹgh ophogh. Kuolọ aZihova rulhoghonhaạn ghan ni iyira ḍighaạgh okpạr opu. (Psalm 139:23, 24) Odị aguanhaan ongọ anạ eephuạ r’inyaạm oḍighi ghan ipẹ eḅeraạn bọ nyodị.—Ibạl Filipai 2:13.

 OLHEGHERI OBUGHẸ

4. Kiọm ghisigh aghaaphạn ghan ogbogh Oyaghirị phọ anạ

Iiḅereghị r’ituughạ aBaibul phọ melhoghonhaạn ni nyinhạ ḍighaạgh oḍighi oyaghirị aZihova. Ika kụ idị oḍighi ghan iphẹn phọ kelhoghonhaạn nyinhạ ḍighaạgh oghiọm aghisigh oḍuraan otuman odị?

Ibạl Psalm 62:8, kụ eeḅeghiọn ḍipuru phọ aḍiẹn:

• Nạ kaḍighi ika kụ anighemhị iiḅereghị phọ anạ pidị asiya arighirị phọ anạ r’aZihova ekpạr?

Ibạl Psalm 1:2, kụ eeḅeghiọn ḍipuru phọ aḍiẹn:

• Nạ kaḍighi ika kụ anighemhị ituughạ aBaibul phọ anạ pidị asiya arighirị phọ anạ r’aZihova ekpạr?

Ika kụ idị nạ katue akạr amooghọm suọ ituughạ oginha anạ? Orue omhiịn araraạr dị nạ katue aḍighi, ipegh VIDIO phọ, kụ eeḅeghiọn sipuru phọ edaphạn bọ siẹn.

• Eeghe iyaạr dị omạ siphẹ avidio phọ kụ edị nạ rawạ osighẹ oḍighinhom?

• Ighẹn arumhuoghaạph kụ iḅeraạn nyinhạ otuughạ?

 OGHAẠPH OOKARAGH

Kiọm ghisigh akparamhị ghan siya arighirị phọ anạ r’aZihova kụ aḅilhẹ aphighi siigbu okumu aZihova obughẹ. Opọ kụ amem dị nạ kakelhọm ghuḍum nyiidiphọ ḅilhẹ k’agee-pọ!

Ooḅula

• Uḍighi ika kụ nạ kaḍuom bọ ni olhoghi mọ aZihova kalhoghonhaạn ni nyinhạ ḍighaạgh oghiọm aghisigh okumu odị?

• Ika kụ idị nạ kakparamhị siya arighirị phọ anạ r’aZihova?

• Ika kụ idị ophighi asiigbu okumu aZihova obughẹ kelhoghonhaạn nyinhạ ḍighaạgh oḍuraan otuman odị?