Dépi ou koumansé étidyé ti liv sala, ou ja apwann an chay bagay konsèné Jéhova. Pitèt sa ou apwann fèʼw enmen Jéhova si tèlman, ou ja dèdiké laviʼw pou li, épi batizé. Èk si ou pʼòkò batizé, pitèt sa sé an bagay ou vlé fè touswit. Mé chonjé, apwé ou batizé ou ni pou kontiné fòtifyé wilasyonʼw épi Jéhova. Anfen, ou sa kontiné vansé pli pwé Jéhova pou tout tan. Ki mannyè ou sa fè sa?

1. Pouki ou sipozé kontiné fòtifyé wilasyonʼw épi Jéhova?

Nou bizwen twavay wèd pou tjenn wilasyon nou épi Jéhova fò. Pouki? Nou ni pou fè sa, “pou anyen pa chayé nou [alé]” èk anpéché nou wèsté pwé Jéhova. (Hibrou 2:1) Alò, kisa ki sa édé nou pou wèsté fidèl pou Jéhova? Nou ni pou fè tout sa nou pé an twavay pwèchman-an. Épi nou ni pou gadé pou lòt mannyè pou nou fè pli an sèvis Jéhova. (Li Filipay 3:16.) Vwéman, la pa ni anyen ki pli mèyè pasé lè nou ka sèvi lavi nou an sèvis Jéhova!​—Sam 84:10.

2. Ki lòt bagay ou ni pou kontiné fè?

Magwé ou fini étidyé liv sala, ou kay kontiné viv laviʼw kon yon Kwityen. Bib-la di, nou “sipozé mété an kawaktè ki nèf.” (Èfésòs 4:23, 24) Konʼw kontiné étidyé Pawòl Bondyé épi atandé sé mitin-lan, ou kay apwann pli konsèné Jéhova, épi sé bèl kawaktèʼy-la. Konsa, toujou gadé pou diféwan mannyè ou sa imité kawaktè Jéhova an laviʼw. Èk kontiné fè tout sé chanjman-an ki nésésè pouʼw sa plè Jéhova.

3. Ki mannyè Jéhova kay édéʼw fè pwogwé?

Bib-la di: “Bondyé . . . kay fè tout sa ki nésésè baʼw. I kay fèʼw fò an lafwaʼw. I kay fè lidéʼw fò épi i kay anpéchéʼw tiwé lidéʼw asou Jézi.” (1 Pita 5:10) Nou tout kay twapé tantasyon pou fè bagay ki pa bon. Mé, Jéhova kay ban nou sa nou bizwen pou nou wèsté fidèl. (Sam 139:23, 24) I pwonmèt pou baʼw dézi-a pou fè sé bagay-la ki ka plèʼy, épi kouway-la pouʼw sa wèsté fidèl.​—Li Filipay 2:13.

 ANNOU APWANN PLI

4. Kontiné palé épi Jéhova an lapwiyè épi toujou étidyé Bib-la

Pouʼw té sa vini jan épi Jéhova ou té ka toujou pwédyé èk étidyé Bib-la. Si ou kontiné fè sa, ki mannyè sa kay édéʼw an wilasyonʼw épi Jéhova?

Annou li Sam 62:8, èk apwé nou kay kozé asou kwèsyon sala:

• Pli ou ouvè tjèʼw an lapwiyè pou Jéhova, sé pli ou kay vini pwéʼy. Kisa ki kay édéʼw pou palé épi Jéhova ofon tjèʼw lèʼw ka pwédyé?

Annou li Sam 1:2, èk apwé nou kay kozé asou kwèsyon sala:

• Lèʼw ka li Bib-la, kisa ou sa fè pou édéʼw fòtifyé wilasyonʼw épi Jéhova?

Kisa ou sa fè pouʼw twapé pli bennéfis lèʼw ka étidyé Bib-la? Pou wè déotwa bagay ou sa fè lèʼw ka étidyé Bib-la, annou gadé VIDIYO-A, Mannyè Ou Sa Twapé Pli Bennéfis Lèʼw Ka Fè Létid Pèsonnèl Ou èk apwé nou kay kozé asou sé kwèsyon sala:

• Ki konsèy an vidiyo-a ou sa sèvi lèʼw ka étidyé Bib-la?

• Ki sijé ou té kay kontan pou étidyé?

 CHONJÉ SÉ PWEN SALA

Kontiné fòtifyé wilasyonʼw épi Jéhova èk fè an plan pouʼw fè pli an sèvis li. Lè sala ou kay sa enjwi lavi apwézan èk pou tout tan!

Annou Wivizé Sa Nou Ja Apwann

• Pouki ou sa ni konfyans Jéhova kay édéʼw wèsté fidèl?

• Kisa ou sa fè pou fòtifyé wilasyonʼw épi Jéhova?

• Lèʼw ni an plan pou fè pli an sèvis Jéhova, ki mannyè sa kay édéʼw vansé pli pwéʼy?