PWONY ME 60
Medde ki Dongo i Yo me Cwiny
Ipwonyo jami mapol adada i kom Jehovah i kare ma ibedo ka kwano Baibul kun itiyo ki buk man. Jami ma ipwonyogi oweko idongo marri pi Jehovah ma gwok nyo dong oweko idyero kwoni bote dok inongo batija. Ka pud peya inongo batija, ci gwok itye ki yub me nongone macok cok-ki. Ento dongoni i yo me cwiny pe gik ki nongo batija keken. Pud itwero medde ki nyikke cok bot Jehovah pi naka. Man twere nining?
1. Pingo myero imedde ki jingo watti ki Jehovah?
Omyero watute matek me medde ki jingo watwa ki Jehovah. Pingo? Wek ‘pe waa woko motmot ki bot Lubanga.’ (Jo Ibru 3:12) Gin ango ma twero konyowa me medde ki tic pi Jehovah ki gen? Omyero walung wiwa i tic me pwony dok wayeny yo me medo cawawa i tic pi Lubanga. (Kwan Jo Pilipi 3:16.) Tic pi Jehovah aye yo me kwo ma pud dong ber loyo!—Jabuli 84:10.
2. Gin ango mukene ma myero imedde ki timone?
Kadi bed kwanwu me Baibul dong tye ka gik agika, ento kwoni macalo Lakricitayo pud bimedde. Baibul wacciwa ni myero ‘waruk kit pa dano manyen.’ (Jo Epeco 4:23, 24) Ka imedde ki kwano Lok pa Lubanga piri keni ki dong bedo i cokke, ibipwonyo jami manyen i kom Jehovah kacel ki kite. Yeny yo me lubo lanen pa Jehovah i kwoni. Medde ki timo alokaloka ma mitte wek iyom cwiny Jehovah.
3. Jehovah bikonyi nining me medde ki dongo i yo me cwiny?
Baibul waco ni: “Lubanga . . . kikome aye bicobo pwonnyeni. En bimini tekcwiny ki kero dok biweko icung matek.” (1 Petero 5:10, NWT) Wan ducu wawok ki i atematema. Ento Jehovah miniwa jami ducu ma mitte wek wacung matek. (Jabuli 139:23, 24) En ocikke me mini miti ki teko me tic pire ki cwinyi ducu.—Kwan Jo Pilipi 2:13.
NONG NGEC MATUT
Nen kit ma itwero medde kwede ki dongo i yo me cwiny, ki kit ma Jehovah bigoyo kwede laane i komi.
4. Medde ki kubbe ki Laremi macok loyo
Lega ki kwano Baibul okonyi me doko larem Jehovah. Jami magi twero konyi nining me medde ki nyikke cok bote?
Kwan Jabuli 62:8, ci wunyam lapeny man:
-
Me jingo watti ki Jehovah, alokaloka ango ma myero itim i kit ma ilego kwede?
Kwan Jabuli 1:2, ci wunyam lapeny man:
-
Me jingo watti ki Jehovah, alokaloka ango ma myero itim i kwanni me Baibul piri keni?
Gin ango ma itwero timo wek inong adwogi maber ma loyo ki i kwanni me Baibul piri keni? Me neno tam mogo ma twero konyi, tuk VIDIO, ci wunyam lapeny ma lubo.
-
Tam mene ma kinyuto i vidio-ni ma imito ni iket i tic?
-
Lok i kom gin ango ma imito kwanone i yo matut?
5. Ket yub i yo me cwiny
Bedo ki yub i yo me cwiny bikonyi me medde ki dongo. Tuk VIDIO, ci wunyam lapeny ma lubo.
-
Ki i vidio man, adwogi mabeco ango ma Cameron onongo ki i keto yub pi jami me cwiny?
Pe dano ducu gitwero dak i lobo mukene ka tito kwena. Ento, wan ducu watwero keto yub ma watwero cobone. Kwan Carolok 21:5, ci wunyam yub ma imito cobone . . .
-
i kacokke.
-
i tic me pwony.
Cik ma iye lac ma nonge i tyeng man twero konyi me cobo yubbi nining?
Yub ma itwero ketone
-
Yub kit ma ilego kwede.
-
Kwan Baibul nicakke i acakki nio i agikki.
-
Nge jo ducu me kacokkewu.
-
Cak kwano Baibul ki ngat mo.
-
Ti macalo painia pi tutunu nyo marii.
-
Ka in omego, tute matek wek ibed ma ipore me tic macalo lakony kor tic.
6. Bed ki kwo maber nakanaka!
Kwan Jabuli 22:26, ci wunyam lapeny man:
-
Gin ango ma itwero timo wek ibed ki kwo maber i kare-ni ki dong pi naka?
WOT WIYE WIYE
Medde ki dongo watti ki Jehovah dok iket yub i yo me cwiny, ci ibibedo ki kwo maber nakanaka!
Ngo ma ipwonyo?
-
Pingo itwero bedo ki gen ni Jehovah bikonyi me medde ki tic pire?
-
Itwero jingo watti ki Jehovah nining?
-
Keto yub i yo me cwiny twero konyi me dongo nining?
TIM KWED
Gin ango ma pire tek loyo bot Jehovah, timo gin mo acel madit ma nyuto ni wawore, kece tic pire ki cwinywa ducu nino ki nino pi kare me kwowa ducu?
Kadi wa latic pa Jehovah ma lagen twero rwenyo yomcwiny ma en tye kwede woko. Nen kit ma itwero nongo kwede yomcwiny odoco.
Itwero keto yub i yo me cwiny ki dok cobone nining?
“Ket Yub i Yo me Cwiny Wek Iket Deyo i kom Ngat ma Ocweyi” (Wi Lubele, Julai 15, 2004)
Pingo pire tek ni Lakricitayo odong i yo me cwiny, dok itwero timo man nining?
“Medde ki Dongo i Yo me Cwiny—‘Nino Madit pa Jehovah Dong Tye Cok’” (Wi Lubele, Mai 15, 2009)
