NÍ KASEMI 60
Yaa Nɔ Nɛ O Hɛ Kɛ Su Yehowa He
O kase Yehowa he níhi fuu ngɛ womi nɛ ɔ mi. Níhi nɛ o kase ɔ ha nɛ o ba ná suɔmi nɛ mi wa wawɛɛ kɛ ha Yehowa, nɛ eko ɔ, o jɔɔ o wami nɔ kɛ ha lɛ, nɛ o ha nɛ a baptisi mo, aloo eko ɔ, e be kɛe nɛ o maa pee jã. Se ke a baptisi mo ɔ, lɔ ɔ tsɔɔ we kaa o gbe nya. E sa nɛ o ya nɔ nɛ o hɛ kɛ su Yehowa he daa. Mɛni blɔ nɔ o maa gu kɛ pee jã?
1. Mɛni he je nɛ e sa kaa o ha nɛ huɛ bɔmi nɛ ngɛ o kɛ Yehowa nyɛ kpɛti ɔ mi nɛ hi wae ɔ?
E sa nɛ waa bɔ mɔde wawɛɛ nɛ wa ha nɛ huɛ bɔmi nɛ ngɛ waa kɛ Yehowa wa kpɛti ɔ mi nɛ hi wae daa. Mɛni he je? “Konɛ wa ko gba kɛ je [Mawu] he kɔkɔɔkɔ.” (Hebri Bi 2:1) Mɛni maa ye bua wɔ konɛ waa ya nɔ nɛ waa kɛ anɔkuale yemi nɛ sɔmɔ Yehowa? Wa ma nyɛ ma tsu babauu ngɛ fiɛɛmi ní tsumi ɔ mi, nɛ wa ma nyɛ ma hlá blɔ kpahi hu nɛ wa maa gu nɔ kɛ sɔmɔ Mawu wawɛɛ. (Kane Filipi Bi 3:16.) Yehowa nɛ wa ma sɔmɔ ɔ ji nɔ́ nɛ hi pe kulaa ngɛ wa si himi mi!—La 84:10.
2. Mɛni hu nɛ e sa kaa o ya nɔ nɛ o pee?
E ngɛ mi kaa o ma Baiblo mi ní kasemi nɛ ɔ nya gbemi mohu lɛɛ, se níhi nɛ e sa nɛ o pee kaa Kristofo no ɔ lɛɛ e ma tsa nɔ. Baiblo ɔ de ke, “e sa kaa [waa] wo su ehe ɔ.” (Efeso Bi 4:23, 24) Ke o ya nɔ nɛ o kase Mawu Munyu ɔ, nɛ o ya asafo mi kpehi be fɛɛ be ɔ, o ma ba le ní kpahi fuu ngɛ Yehowa he. Mo hla blɔ nɔ nɛ o maa gu kɛ kase Yehowa wawɛɛ ngɛ o si himi mi. Yaa nɔ nɛ o pee tsakemihi ngɛ o si himi mi konɛ Yehowa bua nɛ jɔ.
3. Mɛni Yehowa maa pee kɛ ye bua mo konɛ o ya o hɛ mi?
Baiblo ɔ de ke: ‘Mawu nitsɛ maa gbe o tsɔsemi ɔ nya. E maa waje mo, e ma ha nɛ o he maa wa, nɛ e ma ha nɛ o maa pi si wawɛɛ.’ (1 Petro 5:10) Wɔ tsuo waa kɛ kahi kpeɔ. Se Yehowa haa wɔ níhi nɛ wa hia konɛ wa nyɛ nɛ waa da nya. (La 139:23, 24) E wo si kaa e ma ha nɛ o ná suɔmi ɔ kɛ nyɛmi ɔ konɛ o nyɛ nɛ o kɛ anɔkuale yemi nɛ sɔmɔ lɛ.—Kane Filipi Bi 2:13.
MOO KASE BABAUU
Moo hyɛ bɔ nɛ o ma plɛ kɛ ya o hɛ mi ha, kɛ bɔ nɛ Yehowa maa jɔɔ mo ha ke o ngɛ o hɛ mi yae.
4. Yaa nɔ nɛ o kɛ o Huɛ Yehowa nɛ sɛɛ ní
Sɔlemi nɛ o sɔleɔ kɛ Baiblo ɔ nɛ o kaseɔ ɔ ye bua mo nɛ o ba pee Yehowa huɛ. Kɛ ní enyɔ nɛ ɔmɛ nɛ o maa ya nɔ maa pee ɔ maa ye bua mo konɛ o hɛ kɛ su Yehowa he wawɛɛ ha kɛɛ?
Nyɛɛ kane Kɔmɔ Yemi 2:19, nɛ́ nyɛ susu sane bimi nɛ ɔ he:
-
Bɔ nɛ pee nɛ huɛ bɔmi nɛ ngɛ o kɛ Yehowa nyɛ kpɛti ɔ mi nɛ wa a, kɛ e sa nɛ sɔlemi nɛ o sɔleɔ ɔ nɛ hi ha kɛɛ?
Nyɛɛ kane La 1:2, nɛ́ nyɛ susu sane bimi nɛ ɔ he:
-
Mɛni o maa pee konɛ o ná o Baiblo kanemi ɔ he se wawɛɛ konɛ huɛ bɔmi nɛ ngɛ o kɛ Yehowa nyɛ kpɛti ɔ mi nɛ wa?
Mɛni o ma nyɛ maa pee konɛ o dɛ he ní kasemi nɛ nu tso saminya? Mo je VIDEO ɔ, nɛ́ o hyɛ ní komɛ nɛ maa ye bua mo. Lɔ ɔ se ɔ, nyɛ susu sane bimihi nɛ nyɛɛ se nɛ ɔmɛ a he.
-
Ga womihi nɛ a kɛ ha ngɛ video ɔ mi ɔ te nɛɛ nɛ o suɔ kaa o kɛ ma tsu ní?
-
Mɛni munyuyihi lɛ o suɔ kaa o maa kase a he ní?
5. Ngɔɔ Mawu jami mi otihi kɛ ma o hɛ mi
Mawu jami mi otihi nɛ o kɛ maa ma o hɛ mi ɔ maa ye bua mo konɛ o hi o hɛ mi yae. Mo je VIDEO ɔ, nɛ́ nyɛ susu sane bimi nɛ nyɛɛ se ɔ he.
-
Ngɛ video nɛ ɔ mi ɔ, kɛ Cameron ná Mawu jami mi otihi nɛ e kɛ ma e hɛ mi ɔ he se ha kɛɛ?
Pi nɔ fɛɛ nɔ nɛ́ e ma nyɛ maa hia blɔ kɛ ya fiɛɛ ngɛ ma kpa nɔ. Se wɔ tsuo wa ma nyɛ maa ngɔ otihi nɛ wa ma nyɛ maa su he kɛ ma wa hɛ mi. Nyɛɛ kane Abɛ 21:5, nɛ́ nyɛ susu sane bimihi nɛ nyɛɛ se ɔmɛ a he. Mɛni otihi o suɔ kaa o kɛ maa ma o hɛ mi . . .
-
ngɛ asafo ɔ mi?
-
ngɛ fiɛɛmi ní tsumi ɔ mi?
Kɛ sisi tomi mlaa nɛ ngɛ ngmami nɛ ɔ mi ɔ maa ye bua mo ha kɛɛ konɛ o nyɛ nɛ o su otihi nɛ o kɛ ma o hɛ mi ɔ he?
Oti komɛ nɛ o kɛ ma nyɛ maa ma o hɛ mi
-
O sɔlemi nɛ o ma ha nɛ e nu tso saminya.
-
Baiblo mluku ɔ tsuo nɛ o maa kane.
-
Nyɛmimɛ nɛ a ngɛ o we asafo ɔ mi nɛ o maa bɔ mɔde kaa o maa le mɛ tsuo.
-
O kɛ nɔ ko maa je Baiblo ɔ kasemi sisi nɛ nyɛ tsa nɔ.
-
O ma sɔmɔ kaa blɔ gbali a walɔ, aloo daa blɔ gbalɔ.
-
O hɛ mi nɛ o maa ya konɛ o ba pee asafo mi sɔmɔlɔ ke nyumu ji mo.
6. Mo ná bua jɔmi kɛ ya neneene!
Nyɛɛ kane La 22:26, nɛ́ nyɛ susu sane bimi nɛ ɔ he:
-
Mɛni o maa pee konɛ o ná bua jɔmi ngɛ si himi mi kɛ je piɔ kɛ ya neneene?
NYA MWƆMI
Yaa nɔ nɛ o hɛ kɛ su Yehowa he, nɛ o ngɔ Mawu jami mi otihi kɛ ma o hɛ mi. Ke o pee jã a, o ma ná bua jɔmi kɛ ya neneene!
Mi Nylɔmi
-
Mɛni he je nɛ o ma nyɛ ma ná nɔ mi mami kaa Yehowa maa ye bua mo konɛ o sɔmɔ lɛ ngɛ anɔkuale mi ɔ?
-
Mɛni o maa pee konɛ huɛ bɔmi nɛ ngɛ o kɛ Yehowa nyɛ kpɛti ɔ mi nɛ wa?
-
Ngɛ mɛni blɔ nɔ nɛ Mawu jami mi otihi nɛ o kɛ maa ma o hɛ mi ɔ maa ye bua mo konɛ o hɛ kɛ su Yehowa he?
NÍ KPAHI NƐ MAA YE BUA MO
Nɔ́ ngua kake ko nɛ wa maa pee kɛ tsɔɔ kaa wa jaa Yehowa, kɛ Yehowa nɛ wa maa ye lɛ anɔkuale daa ligbi ɔ, te nɛɛ lɛ Yehowa bua jɔɔ he wawɛɛ?
Be komɛ ɔ, e ma nyɛ maa ba kaa nɔ ko nɛ e kɛ anɔkuale yemi sɔmɔɔ Yehowa po be bua jɔmi náe. Ke e ba jã ngɛ o blɔ fa mi ɔ, moo hyɛ bɔ nɛ o ma plɛ kɛ ná bua jɔmi ekohu ha.
Mɛni blɔ nɔ o maa gu kɛ ngɔ Mawu jami mi otihi kɛ ma o hɛ mi konɛ o su a he?
“Ngɔɔ Mawu Jami Mi Otihi Kɛ Ma O Hɛ Mi” (Hwɔɔmi Mɔ, July 15, 2004)
Mɛni he je nɛ e he hia nɛ o ya o hɛ mi konɛ o ba pee Kristofo no nɛ e nane pi si ngɛ Mawu jami mi ɔ, nɛ kɛ o maa pee kɛɛ konɛ o nane nɛ pi si?
“Yaa O Hɛ Mi Konɛ O Nane Nɛ Pi Si—‘Yehowa Ligbi Ngua a Su Si Ta’” (Hwɔɔmi Mɔ, May 15, 2009)
Eko ɔ, O Bua Maa Jɔ Enɛ ɔ Hu He
SANEHI NƐ NIHI PƆƆ BIMI
Mɛni Blɔ Nya Yehowa Odasefohi To Nɛ́ Nihi Kɛ Kaseɔ Baiblo ɔ?
Yehowa Odasefohi kɛ nihi kaseɔ Baiblo ɔ nɛ a he we nɔ́ ko. Ke a kɛ mo ngɛ Baiblo ɔ kasee ɔ, o ma nyɛ maa ngɔ Baiblo sisi tsɔɔmi fɛɛ ko kɛ tsu ní. O ma nyɛ maa fɔ o weku ɔ, aloo o huɛmɛ nine nɛ a ba piɛɛ o he kɛ kase ní ɔ.
