Yede yedi kɛɛ ozuma Gyehova yɩ nwʋ dɩyɛ sʋ̃maa wɔ buuku eyi nu. Na nninyeni mɔɔ ozuma nɩ, ɩma ɔlɔlɛ mɔɔ ɔwɔ ma yɩ nɩ yɛ kezi paa. Ebiye a, eyi ɩhã wʋ ma eyila wʋ nwʋ zʋ na onluma po. Na sɛ olónumanlɩ sʋ̃ a, ebiye a, ɩlɛ́kyɛ na wʋayɛ ɔzɔ. Naasʋ̃ sɛ onuma a, nɩ owie a? Anhã. Ɩsɛ kɛɛ ɔbɔ mmɔdɩnɩ kɛɛ ekeɣike Gyehova mmɩlɩ munwala. Kɛ ɛkɛyɛ yɩ keze a?

1. Mɩnla ti mɔɔ ɩsɛ kɛɛ ɔkɔ ɔzʋlɔ hyɛ ɛ nɩɩ Gyehova bɔ ɔhɔnwʋvalɛ nu ɛzɩzɩbɛ a?

Ɩsɛ kɛɛ yeminyia yɛ nwʋ kɛɛ yɛkɛhyɛ yɛ nɩɩ Gyehova ɔhɔnwʋvalɛ nu ɛzɩzɩbɛ. Mɩnla ti a? Na ama yɛzʋ̃ Gyehova yɩ pɛ “yeáminlini.” (Hibulumaa 2:1) Mɩnla yɛ ɩkɔwʋwa yɛ ma yɛkɔzʋ̃mɩ Gyehova nɔhʋanlɛ nu a? Ɩsɛ kɛɛ yeminyia yɛ nwʋ wɔ dasɩlɛlilɛ egyima yi nu na yɛpɩbɛ ɔhʋanɩ azʋlɔtʋ mɔɔ yɛkɛva yɛkɛdɛlɛ yɛ ɔzʋ̃mɩnlɛ nu. (Kɩnga Fɩlɩpɩmaa 3:16.) Dɩyɛ bela íni ɛkɛnɩ mɔɔ mfasʋ wɔ ɔzʋlɔ tɛla Gyehova mɔɔ yɛkɔzʋ̃mɩ yɩ nɩ!—Ndwomi 84:10.

2. Mɩnla dɔkʋ̃ yɛ ɩsɛ kɛɛ ɔkɔ ɔzʋlɔ yɛ a?

Ɩwɔ numɔ kɛɛ buuku eyi zumanlɛ ɩbaa awielɩyɛ dɩyɛ, naasʋ̃ ɩsɛ kɛɛ ɔkɔ ɔzʋlɔ bɔ wʋ ɛbɩla kɛɛ Kilisinyianii. Bayɩbʋlʋ kã kɛɛ, ihyinyia kɛɛ ‘yɛbɔ ɛbɩla fʋlɔ mɔɔ ikile kɛɛ yɛdɩ mmenii mvʋlɔ.’ (Ɛfɩsɛsɩmaa 4:23, 24) Mmɩlɩ mɔ osumaa Bayɩbʋlʋ na ɔkɔɔ dɩyɛzumanlɛ nɩ, okozuma Gyehova nɩɩ yi subanɩ nwʋ nninyeni mvʋlɔ. Pɩbɛ́ ahʋanɩ azʋlɔtʋ mɔɔ okoluwa zʋ kozuma yi subanɩ na wʋava wʋawɔ wʋ ɛbɩla. Kɔ ɔzʋlɔ yɛ nzɩnzanlɩyɛ bela mɔɔ ihyinyia wɔ wʋ ɛbɩlawɔlɛ nu na ama Gyehova anyɩ iale.

3. Mɩnla ɔhʋanɩ zʋ yɛ Gyehova kɔwʋwa wʋ ma ekenyia anyunumihɔlɛ a?

Bayɩbʋlʋ kã kɛɛ Nyamɩnlɩ “yɩzayɩ yi munli nɩ ikeziyeziye mʋnlʋmmɔ, ɩkɛma mʋnlʋmmɔ anwʋzɩzɩbɛ nɩɩ kɛnɣazɩzɩbɛ na ɩama mʋnlʋmmɔ bɛagyina pindinyii.” (1 Pita 5:10) Nninyeni tanɩ kɔhʋla kodwe ye munwala kehila. Naasʋ̃ Gyehova ɩma yenyia anwʋzɩzɩbɛ mɔɔ yehyinyia na ama yɛahʋla yeagyina yi munwa. (Ndwomi 139:23, 24) Ɩwɔ anʋhʋba kɛɛ, ɩkɛma ekenyia ɛpɛ nɩɩ anwʋzɩzɩbɛ mɔɔ ɛkɛva kɔzʋ̃mɩ yɩ wɔ nɔhʋanlɛlilɛ nu.—Kɩnga Fɩlɩpɩmaa 2:13.

 SUMÁ SƲ̃MAA

4. Kɔ́ ɔzʋlɔ ɛ nɩɩ wʋ ɔhɔnwʋ Gyehova beli nkitanwʋ

Mpayɩwɔlɛ nɩɩ Bayɩbʋlʋ zumanlɛ wʋwa wʋ ma ɛɣa yɛ Gyehova yɩ ɔhɔnwʋ. Mɩnla ɔhʋanɩ zʋ yɛ eyimmɔ kɔhʋla kɔwʋwa wʋ ma ekeɣike yɩ paa a?

Kɩnga Ndwomi 62:8, na akʋ̃ bozunzú odwokɔɣizialɛ eyi nwʋ:

• Sɛ ɛ nɩɩ Gyehova bɔ ɔhɔnwʋvalɛ yi nu kɔhɔ ɔzʋlɔ kɛyɛ sɩ a, mɩnla nzɩnzanlɩyɛ yɛ ɔkɔhʋla kɛyɛ wɔ kezimɔ ɔbɔ mpayɩ nɩɩ ndwokɔ mɔɔ ɛkã wɔ wʋ mpayɩwɔlɛ nu a?

Kɩnga Ndwomi 1:2, na akʋ̃ bozunzú odwokɔɣizialɛ eyi nwʋ:

• Mɩnla ɔhʋanɩ zʋ yɛ sɛ osuma Bayɩbʋlʋ yɩ bʋwɔ a, ɩkɛma ɛ nɩɩ Gyehova bɔ ɔhɔnwʋvalɛ yi nu kɛyɛ sɩ a?

Mɩnla yɛ ɔkɔhʋla kɛyɛ na ama wʋzawʋ wʋ dɩyɛzumanlɛ iadu mpʋnɩ a? Sɛ ɛpɛ kɛɛ enyia nwʋmɔ adwɩnɩhilelɛ be a, yɩ́ VIDIYO nɩ, na akʋ̃ bozunzú ndwokɔɣizialɛ mɔɔ ili ɛkɛnɩ nɩ nwʋ.

• Adwɩnɩhilelɛ azʋlɔtʋ mɔɔ ɩwɔ vidiyo yi nu nɩ, numɔ ɛhɩnla dɩyɛ yɛ ɔkɔhʋla kɛva kɛyɛ egyima a?

• Mɩnla odwokɔtile yɛ ɛkɛbɛ kɛɛ okozuma nwʋmɔ dɩyɛ a?

 YƖ DƆKƆWƆLƐ

Kɔ ɔzʋlɔ hyɛ ɛ nɩɩ Gyehova bɔ ɔhɔnwʋvalɛ yi nu ɛzɩzɩbɛ na fá sunzuma ɔfʋã nu bʋtayɩ azʋlɔtʋ siye wʋ anyɩ zʋ. Eyi kɛma ekenyia anyɩnlɩlelɛ daabaa!

Kɛ Okowuwa Ekeze a?

• Mɩnla ti mɔɔ ɔwɔ anwʋlazʋ kɛɛ, Gyehova kɔhʋla kɔwʋwa wʋ ma ɔkɔzʋ̃mɩ yɩ wɔ nɔhʋanlɛ nu a?

• Kɛ ɩkɛyɛ na wʋahyɛ ɛ nɩɩ Gyehova bɔ ɔhɔnwʋvalɛ yi nu ɛzɩzɩbɛ a?

• Mɩnla ti mɔɔ sɛ ɛfa sunzuma ɔfʋã nu bʋtayɩ siye wʋ anyɩ zʋ a, ɩkɔwʋwa wʋ ma ekenyia anyunumihɔlɛ a?