ENUKPLAKPLA 60
Kpɔtɔ ayiyiɛ ŋkɔ
Le Bibla nukplakpla cɛ pleŋ mɛɔ, èkpla nu sugbɔ so Yehowa nu. Ŋciwo èkpla na èluin sugbɔ keke taŋfuin èsɔ eoɖeki ni yí wa ʒinʒindoshimɛ. Nɔ dewɛ ahan hɔɖoɔ, ɖowotɔ èjikɔ mɔ yeawɛ sabaɖe. Vɔ denyi ʒinʒindoshimɛ lɔ ɖekɛ àyi ŋkɔ awa yí anyi evɔ o. Àtɛnŋ akpɔtɔ atenɔ gogo Yehowa doji tɛgbɛɛ. Lé àwɛ doɔ?
1. Nyi yí taɖo èɖo akpɔtɔ adonɔ ŋsɛn exlɔ ci ènyi koɖo Yehowaɔ?
Mìɖo aje agbla yí akpɔtɔ adonɔ ŋsɛn exlɔ ci mìnyi koɖo Yehowa. Nyi yí taɖoɔ? “Nɔ wo ŋgbe cucu mì ɖaɖa azɔge” le gbɔ o. (Ebretɔwo 2:1) Nyi yí atɛnŋ akpenɔdo mì nu mìakpɔtɔ asɛnnɔ Yehowa le egbejinɔnɔ mɛɔ? Mìatɛnŋ awanɔ sugbɔ le kunuɖeɖedɔ lɔ mɛ yí aji emɔ bu ciwo ji mìato asɛn mìwo Mawu lɔ nywiɖe doji. (Hlɛn Filipitɔwo 3:16.) Yehowa sɛnsɛn yí nyi enunywitɔ le agbe mɛ!—Ehajiji Wema 84:10.
2. Nubu ci èɖo akpɔtɔ awanɔɔ?
Ci Bibla nukplakpla cɛ yikɔ vɔvɔnu yɛ can ɔ, àkpɔtɔ anɔnɔ agbe shigbe Kristotɔ nɛ. Bibla nu mɔ mìwo le “do amɛnyinyi yoyu.” (Efezitɔwo 4:23, 24, NWT) Nɔ èkpɔtɔ kplanɔ Mawu Nyɔ lɔ yí yinɔ hamɛ bɔbɔwoɔ, àkpla enu yoyuwo so Yehowa koɖo yi nɔnɔmɛwo nu. Ji emɔ ciwo ji àto asrannɔ yi nɔnɔmɛwo nywiɖe sɔwu le ao gbenɔnɔ mɛ. Kpɔtɔ awanɔ trɔtrɔ ɖekpokpui ci yí ʒan keŋ ado jijɔ nɔ Yehowa.
3. Lé Yehowa akpedo eo nu do nawa ŋkɔyiyiɔ?
Bibla mɔ: “Mawu . . . ŋtɔ aɖegbɔ ekpla lɔ nana mí. Ána míanɔ goŋgoŋ, ána míasɛnŋ, yí ána míanɔ te gogwiɖe.” (1 Piɛ 5:10, NWT) Mì pleŋ yí donɔ go tetekpɔwo. Vɔ Yehowa nanɔ mì enu ciwo mìʒan asɔ ɖunɔ wo ji. (Ehajiji Wema 139:23, 24) Éɖo gbe mɔ yeana edro koɖo ŋsɛn eo keŋ nɔ nasɛn ye le egbejinɔnɔ mɛ.—Hlɛn Filipitɔwo 2:13, NWT.
JI DWI NI KPƆ DOJI
Kpɔ lé àwɛ akpɔtɔ awanɔ ŋkɔyiyi koɖo lé Yehowa acu shi nɔ eo do.
4. Kpɔtɔ akannɔ seŋ koɖo ao Xlɔ vevitɔ lɔ
Gbedodoɖa koɖo Bibla kplakpla kpedo eo nu yí èvanyi Yehowa xlɔ. Lé enu cɛwo wawa atɛnŋ akpedo eo nu nagbete gogui doji doɔ?
Hlɛn Ehajiji Wema 62:8, keŋ agbeje biɔse cɛ mɛ:
-
Nɔ àdo ŋsɛn exlɔ ci ènyi koɖo Yehowa ɖe, nyiwo àtrɔ le lé èdonɔ gbe ɖaɖa do koɖo enyɔ ciwo ènunɔ ni nuɔ?
Hlɛn Ehajiji Wema 1:2, keŋ agbeje biɔse cɛ mɛ:
-
Nɔ àdo ŋsɛn exlɔ ci ènyi koɖo Yehowa ɖe, lé àwɛ akpɔnɔ nyɔna sugbɔ le ao Bibla hlɛnhlɛn mɛɔ?
Lé àwɛ akpɔnɔ nyɔna sugbɔ so ao Bibla hlɛnhlɛn mɛɔ? Nɔ àkpɔ susu ɖewoɔ, xo VIDEO lɔ, keŋ agbeje nyɔbiɔse ciwo yí gbɔgbɔ mɛ.
-
Le susu ciwo woyɔ le video lɔ mɛ ɖe, ci àtɛnŋ azan ɔ?
-
Nyɔta ciwo nu àji mɔ yeakpla nu soɔ?
5. Ðo tajinuwo le Yehowa sɛnsɛn mɛ
Nɔ èɖo tajinuwo le Yehowa sɛnsɛn mɛɔ, woakpedo eo nu nakpɔtɔ ayikɔ ŋkɔ. Xo VIDEO lɔ, keŋ agbeje nyɔbiɔse ciwo yí gbɔgbɔ mɛ.
-
Le video lɔ mɛ ɖe, nyɔna ciwo Cameron kpɔ ci eɖo gbɔngbɔn mɛ tajinuwoɔ?
Denyi mɛshiamɛ yí atɛnŋ ayi ci eju bu mɛ keŋ aɖe kunu le nɔ o. Vɔ mì pleŋ atɛnŋ aɖo tajinu ci gbɔ mìatɛnŋ aɖo. Hlɛn Elododo Wema 21:5, keŋ akpɔ tajinu ciwo àji mɔ yeaɖo . . .
-
le hamɛ lɔ mɛ.
-
le kunuɖeɖedɔ lɔ mɛ.
Lé gɔnmɛɖose ci yí le kpukpui lɔ mɛ atɛnŋ akpedo eo nu do naɖo ao tajinu lɔwo gbɔɔ?
Tajinu ciwo gbɔ àtɛnŋ atekpɔ mɔ yeaɖo
-
Donɔ gbe ɖaɖa nɔ anyɔnɔ doji.
-
Hlɛn Bibla lɔ pleŋ.
-
Tekpɔ ajeshi amɛshiamɛ ɖɛ le ao hamɛ lɔ mɛ.
-
Tɔ Bibla kplakpla koɖo mɛɖe keŋ akpɔtɔ akplɛni koɖi.
-
Wa kpedonu mɔɖeɖedɔ alo gbeshiagbe mɔɖeɖedɔ.
-
Nɔ nɔviŋsu yí ènyiɔ, tekpɔ aje anyi sumɔsumɔdɔwatɔ.
6. Se vivi nɔ agbe lɔ sɔyi mavɔ!
Hlɛn Ehajiji Wema 22:26, keŋ agbeje nyɔbiɔse cɛ mɛ:
-
Nyi àtɛnŋ awa keŋ ase vivi nɔ agbe lɔ so kakacɛ sɔyi mavɔɔ?
ENU CI ÈKPLA
Kpɔtɔ adonɔ ŋsɛn exlɔ ci ènyi koɖo Yehowa yí aɖo gbɔngbɔn mɛ tajinuwo. Eyi natɛnŋ ase vivi nɔ agbe lɔ sɔyi mavɔ!
Enumɛtoto
-
Nyi yí taɖo àtɛnŋ akando ji mɔ Yehowa akpedo ye nu yeasin le gbejinɔnɔ mɛɔ?
-
Lé àwɛ adonɔ ŋsɛn exlɔ ci ènyi koɖo Yehowaɔ?
-
Nɔ èɖo tajinuwo le Yehowa sɛnsɛn mɛ ɖe, lé woatɛnŋ akpedo eo nu do nayinɔ ŋkɔɔ?
KPƆ ŊCƐWO KPƆ
Nyi yí nɔnɔ veviɖe nɔ Yehowa wuɔ, ci mìawa enu gangan ɖe zeɖeka asɔ dasɛ ni mɔ mìnyi yi sɛntɔa? Alo ci mìasinni le egbejinɔnɔ mɛ ŋkeke ɖeshiaɖe le mìwo gbe mɛ?
Mɛ ci yí nyi Yehowa sɛntɔ egbejinɔtɔ can tɛnŋ dokpo jijɔ kpɔkpɔ. Kpɔ lé àwɛ agbekpɔ jijɔ nɔ ecɛ jɔ do eo ji.
Trɔ akpɔ jijɔ to Bibla kplakpla koɖo tamɛbubu so nu ji (5:25)
Lé àwɛ aɖo gbɔngbɔn mɛ tajinuwo keŋ aɖo wo gbɔɔ?
“Zan gbɔngbɔn mɛ tajinuwo asɔ kanfu ao Watɔ” (Jutakpɔxɔ 15 juillet 2004)
Nyi yí taɖo ele veviɖe mɔ, woanyi Kristotɔ ci yí shin le gbɔngbɔn mɛɔ, yí le àwɛ anyi Kristotɔ ci yí shin le gbɔngbɔn mɛɔ?
“Mìayi ŋkɔ keŋ ashin—‘Yehowa ŋkeke lɔ gogo’” (Jutakpɔxɔ 15 mai 2009)
Ebuwo Ke
ENYƆ CIWO AMƐWO BIƆNƆ SE BLAŊBLAŊ
Nyi Bibla nukplakpla ci Yehowa Kunuɖetɔwo sɔ ɖokɔ ŋmɛ nɔ amowo nyiɔ?
To seŋkankan toto ehomana ci Yehowa Kunuɖetɔwo sɔ ɖokɔ ŋmɛ nɔ amowo jiɔ, àtɛnŋ azan Bibla gɔnmɛɖeɖe ɖekpokpui. Vo faa ayɔ ao xomu lɔ pleŋ alo ao xlɔwo nɔ woava bɔdo eo nu le nukplakpla lɔ mɛ.
