60 УРОК
Иеговала колбулараар оноҥ ло ары тыҥызын
Слер бу библиялык курстаҥ Иегова керегинде кӧпти билип алганаар. Бу билгирлердеҥ улам слер оны андый тыҥ сӱӱп, ого јӱрӱмигерди учурлап, сууга чӧҥӱрилген болороор. Јок болзо, јаан удабай, слер бу алтамды эдереер деп амаду тургузып алган болороор. Је сууга чӧҥӱрилери — бу христиан јолдыҥ учы эмес, а јӱк бажы болуп јат. Оныҥ учун слердиҥ алдаарда јажын-чакка Иеговага јууктайтан арга бар.
1. Нениҥ учун биске оноҥ ло ары Иеговала најылыгысты тыҥыдар керек?
Биске оноҥ ло ары Иеговала најылыгысты тыҥыдар керек. Нениҥ учун? «Бисти бу јолдоҥ туура апарбазын» деп (Еврейлерге 2:1). Биске оноҥ ло ары Иеговага чындык иштеерге не болужар? Јарлаар ишке эрчимдӱ туружып, оноҥ ло ары бистиҥ Кудайыска иштейтен кандый ла эп-аргаларды бедиреер керек. (Филиппыдагыларга 3:16 кычырыгар.) Иеговага иштеери — бу јӱрӱмниҥ эҥ јакшы јолы болуп јат! (Сарын 84:10).
2. База неге албаданар керек?
Бу библиялык курс учына једип келди. Је мында слердиҥ христиан јолыгар божобой јат. Агару Бичикте айдылганыла, јаҥы кижини бойыбыска кийип алар керек (Эфестегилерге 4:23, 24). Јуунныҥ туштажуларында ла Агару Бичикти таҥынаҥ ӱренер ӧйдӧ слер Иегова ла оныҥ кылык-јаҥдары керегинде јаантайын јаҥы билгирлер алып турарыгар. Кудайдыҥ кылык-јаҥдарына ӱренип, ого там ла там тӱҥей болорго албаданыгар. Иегованы оноҥ ло ары сӱӱндирерге, солынарга белен болугар.
3. Иегова слерге канайып болужар?
Агару Бичикте айдылып јат: «Кудай... бойы слердиҥ ӱредӱгерди учына јетирер. Ол слерди тыҥыдып, кӱчтӱ ле турумкай эдер» (1 Пётр 5:10). Бистиҥ кажыбыста ла ченелтелер болор. Је Иегова бисти бу ченелтелерди ӧдӧр аргалу болзын деп, ончо керектӱ немени берет (Сарын 139:23, 24). Ол слерди ого чындык иштезин деп, кӱӱн де, ийде-кӱч те берерим деп сӧзин берет. (Филиппыдагыларга 2:13 кычырыгар.)
ТЕРЕҤЖИДЕ КӦРӰГЕР
Оноҥ ло ары Иеговала најылыгарды тыҥыдарга не болужар деп ле Иегова слерге канайып болужарын билип алыгар.
4. Эҥ јакшы Најыгарла куучындажып, оны угугар!
Мӱргӱӱл ле Агару Бичикти ӱренери слерге Иегованыҥ најызы болорго болушкан. Бу јакшы темигӱлер ого оноҥ јуук болуп каларга слерге канайып болужар?
Сарын 62:8 кычырып, суракты шӱӱжип ийигер:
-
Мӱргӱӱлдерис тереҥ учурлу ла акту јӱректеҥ болзын деп нени эдер керек?
Сарын 1:2 ле сносканы кычырып, суракты шӱӱжип ийигер:
-
Агару Бичик тузалу болзын деп, оны канайып кычырар керек?
Агару Бичикти таҥынаҥ ӱренери оноҥ јаан туза экелзин деп, слер нени эдер аргалу? Бир канча эп-аргаларды кӧрӱп ийигер. ВИДЕОНЫ кӧрӱп, сурактарды шӱӱжип ийигер.
-
Слер бу эп-аргалардыҥ кажызын тузаланарга кӱӱнзейдеер?
-
Слер кандый темаларды оноҥ тереҥ шиҥдеер эдеер?
5. Чокум амадулар тургузыгар
Иеговага иштееринде чокум амадулар тургусканы, слерге Иеговала најылыгарды тыҥыдарга болужар. ВИДЕОНЫ кӧрӱп, суракты шӱӱжип ийигер.
-
Јарлаар иште чокум амадулар тургусканы бу кыстыҥ јӱрӱмин канайып јилбилӱ эткен?
Ӧскӧ ороондо јарлаарга кажы ла кижи кӧчӱп болбос. Је бис ончобыс једингедий амадулар тургузар аргалу. Укаа сӧстӧр 21:5 кычырып, слер кандый амадулар тургузар аргалу деп айдып беригер:
-
јуунда;
-
јарлаар иште.
Бу ӱлгердеги принцип слерге амадугарга јединерге канайып болужар?
Једингедий амадулар
-
Тереҥ учурлу мӱргӱӱлдер айдарга.
-
Агару Бичикти бӱдӱнге кычырарга.
-
Јуунныҥ ончо улузыла таныжарга.
-
Агару Бичикле ӱредӱ баштаарга ла ӧткӱрерге.
-
Подсобный эмезе текши пионер болуп иштеерге.
-
Јуунныҥ болушчы ишчизи болорго (ака-карындаштарга).
6. Ӱргӱлји јӱрӱмле јакшызыныгар!
Сарын 22:26 кычырып, суракты шӱӱжип ийигер:
-
Јӱрӱмге эмди ле јажын-чакка сӱӱнерге нени эдер керек?
ТӦС ШӰӰЛТЕЗИ
Оноҥ ло ары Иеговала колбулараарды тыҥыдып, ого иштеерге чокум амадулар тургузыгар. Ол тушта слер ӱргӱлји јӱрӱмле јажын-чакка јакшызынып јӱререер!
Нени билип алдыгар?
-
Иегова слерге оноҥ ло ары ого чындык иштеерге болужар деп, нениҥ учун алаҥзыбай јадыгар?
-
Иеговала најылыгарды канайып тыҥыдараар?
-
Иеговага иштееринде чокум амадулар тургусканы, слерге Иеговала најылыгарды тыҥыдарга канайып болужар?
ШИҤДЕЙТЕН МАТЕРИАЛ
Иегова нени тыҥ баалап јат: јӱк ле бир катап јакшы нени-нени эткенигерди бе эмезе Кудайга бастыра јӱрӱмеерге чындык иштеп јӱргенеерди бе?
Керек дезе Кудайдыҥ чындык ишчизи де сӱӱнчизин јылыйтып салар аргалу. Сӱӱнчини јылыйтпаска нени эдерин билип алыгар.
«Агару Бичикти ӱренери ле шӱӱп сананары јылыйган сӱӱнчиҥди кайра экелзин» (5:25)
Јарлаар ишке чокум амадулар тургузып, олорго јединерге слерге не болужар?
«Сениҥ кӧгӱс амадуларыҥ Јайаачыны макка чыгарзын» («Каруулчы шибее», 2004 јыл, јаан изӱ ай 15)
Кӧгӱзи тереҥ христиан кижи болорго нениҥ учун албаданар керек ле ого канайып јединер?
Анайда ок слерге јараар болор
ЈААНТАЙЫН БЕРИЛИП ТУРГАН СУРАКТАР
Иегованыҥ Керечилериниҥ Агару Бичикти ӱренетен курсы канайып ӧдӧт?
Иегованыҥ Керечилеринде Агару Бичик неге ӱредип турганын билип аларга болужатан тузалу курс бар. Ӱредӱниҥ ӧйинде слер бойоордыҥ Агару Бичигерле тузаланар аргалу, анайда ок ӱредӱлерге бойоордыҥ билегерди ле најылараарды айдып алар аргалу.
