Nikadh’i ponji peri mi Biblia ku buku maeni, ituc ning’eyo lembe lee dit iwi Yehova. Lembene uketho imaru Yehova lee man saa moko nyo idaru thiero kwo peri ire man ilimo batizo. Ka fodi de, copere nia ibepangu nitimo kumeno i ng’ei nindo ma ceng’ini. Re ng’ey nia mediri peri i thenge mi tipo ucikere ngo nijik kende kende i batizo peri. Ubekwayu imediri nja ku nja nicoro i vut Yehova. Icopo timo kumeno nenedi?

1. Pirang’o ubekwayu imediri nitielo i mer peri ku Yehova?

Wacikara nitimo kero kubang’ ceng’ niketho mer mwa ku Yehova umedere ameda man ebed ma tek. Pirang’o? “Kara kud wakier nyanok de” kud i kume. (Juebrania 2:1) Lembang’o ma bikonyowa kara wamedara nitimo ni Yehova ku bedopwe? Kwayu wabed warwey lembanyong’a kud amora ceke man wayeny bende yo mange ma waromo timo ko ni Mungu lee nisagu. (Som Jufilipi 3:16.) Lembe mange mbe i kwo mwa ma ber nisagu timo ni Yehova!​—Zaburi 84:10.

2. Lembang’o mange m’ukwayu imediri nitimo?

Kadok ponji peri mi Biblia ku buku maeni ubecijik de, re kwo peri m’itie ko Jakristu ubejik ungo. Biblia uyero nia wacikara “nironyo ng’atu (niwacu kura) ma nyen.” (Juefeso 4:23, 24) Dong’ mediri niponjo Lembe pa Mungu man nicidho i coko mwa, e ibiwotho ponjo lembe dupa ma nyen iwi Yehova man iwi kite pare ma tung’ tung’. Tim kero nilubo lapor mi kite parene cuu mandha i kwo peri. Eyo, tim alokaloka moko ci m’ubekwayere i kwo peri pi ninyayu mutoro i Yehova.

3. Yehova bikonyi nenedi kara imediri i thenge mi tipo?

Biblia uwacu kumae: “Mungu . . . bidaru en ponji mwu. Ebiketho wucung nging’ nging’, ebidwokowu tek man ebiketho wucung iwi kathere ma tek.” (1 Pethro 5:10) Wan ceke wabinwang’ara kud abidhe i kwo mwa. Ento Yehova ubekonyowa ku gin ma watie ku yenyne kara wacerara i wang’ abidhe ceke. (Zaburi 139:23, 24) Eng’olo nia ebimiyo iri ava man bende tego m’ibimediri nitimo ko ire ku bedopwe.​—Som Jufilipi 2:13.

 MED NYANG’ PERI

4. Mediri niweco ku Jarimbi m’usagu zoo

Ma jiji mbe, rwo man ponji mi Biblia ukonyi nidoko Jarimb Yehova. Lembe ma rom eno copo medere nikonyi kara kindwu ubed ceng’ini magwei kude. Nenedi?

Som Zaburi 62:8, man i ng’eye wuwec iwi penji m’ulubo e:

• Kara kindwu bed ceng’ini magwei ku Yehova, iromo yiko lembang’o i kum ayi m’ibed irwo ko man lembe m’ibed irwo pire?

Som Zaburi 1:2, man i ng’eye wuwec iwi penji m’ulubo e:

• Kara inwang’ kony lee niai i som mi Biblia man ibed ku winjiri ma ceng’ini ku jarimbi ma Yehova, iromo betimo ang’o?

Icopo timo ang’o pi ninwang’u kony lee niai i ponji peri ma segi? Pi ning’eyo lembe moko m’icopo timo, nen VIDEO, man i ng’eye wuwec iwi penji m’ulubo e:

• Paru ma kani ma junyutho i video maeni m’inwang’u nia icopo tiyo ko bende?

• Icopo maru iponj lembe iwi thiwiwec moko ma kani?

 I ADUNDO

Mediri nitimo kero ibed ku winjiri ma ceng’ini saa ceke ku Yehova man ibed ku lembakeca mi tipo. E ibikwo kud anyong’a rondo ku rondo!

Penji mi poyowic

• Pirang’o ukwayu cwinyi bed tek nia Yehova bikonyi kara itim ire ku bedopwe?

• Iromo timo ang’o pi nitielo i mer mwu ku Yehova?

• Nibedo ku lembakeca mi tipo copo konyi nenedi i tic pa Yehova?