Minanam kiso to Fangcalay Cudad ikor, matongalayto ko kacipanang ci Yihofaan. Maolahayto kiso Cingranan, alatek patafangayto to tireng ci Yihofaan halo micadaayto to paputisem, anca miharatengay kiso cowa ka halafin wa mihaen ko demak. Ano samaanto i, cowa ko hererekan ko mipaputisemay, wa ngaˈay kiso padadotoc mitongal to kalawidang ci Yihofaan. Kawra, sasamaan ko demak hani?

1. Hano padadotocen a mitongal ko kalawidang iso aci Yihofaan hani?

Ka pisaˈicel kita, padadotoc matongal ko kalawidang aci Yihofa, ho eca ka ‘pawpaw sa a maˈalol’, miliyas ci Yihofaan. (Hipray 2:1) Sapipadadotocaw madimadi midoko ci Yihofaan, wa misamaan ko demak ita hani? Ceriden a mitosil, anca sakadademaken ko toki matayal saki ci Yihofaan. (ˈOsien ko Filipi 3:16.) Haratengen, midoko ci Yihofaan o sangaˈayay a pakayraan no kaˈorip!​—ˈOlic 84:10.

2. Padadotocenho ko manan a demak?

Soˈlin mamihererekto koniya pinanam, kawra padadotocen ko kaˈorip no Krisciyang iso. Palimoˈotay ko Fangcalay Cudad kitanan ‘caˈedongen ko faelohay a capeling.’ (Ifiso 4:23, 24) Ano padadotoc kiso mikingkiw to kimad no Kawas, mirienang to saˈopo i, wa matongal ko kacipinang ci Yihofaan ato capeling Ningra. Todongen ci Yihofa itini i kaˈorip iso, pahecaden ko makapahay waywayan no niyah Cingranan; makalim misalof to niyah, pakahemek ci Yihofaan.

3. Sasamaan padama ci Yihofa tisowanan a macakat hani?

Sanay ko sowal no Fangcalay Cudad: ‘O Kawas ko papalaheci to sapahatatanam i tamowanan. Patanoktok Cingra tamowanan a paˈicel, eca ka ngiyangi a tanektek.’ (1 Pitiro 5:10) O mamakayhid kita maemin, kawra pafelien ni Yihofa to kihcod a saali ita a padama kitaanan, eca ka ngiyangi a tanektek. (ˈOlic 139:23, 24) O sakiˈok Ningra pakalalokay kitaanan, makalim kamayan ciˈicel madimadi midoko Cingranan.​—ˈOsien ko Filipi 2:13.

 CALEPEN MIKADKAD

4. Ceriden masasowal to ngaˈayay a widang iso

Samaanay kiso patireng to kalawidang ci Yihofaan hani? Misaaliay to satolon ato mikingkiw to Fangcalay Cudad. Ano misaˈicel kiso toniya tosa pakayraan i, wa matongal matongal ko kalawidang aci Yihofaan.

ˈOsien ko ˈOlic 62:8, ikor lengoen ko ilaenoay a salicay:

• Sapitongalaw to kalawidang ci Yihofaan, itini i satolon sasamaan paihkal to nafalocoˈan iso hani?

ˈOsien ko ˈOlic 1:2, ikor lengoen ko ilaenoay a salicay:

• Sapitongalaw to kalawidang ci Yihofaan, mikingkiw kiso to Fangcalay Cudad i, iraayho ko sasalofen han?

Nengnengen hena, itini notekedan a pikingkiw iso, sasamaan milifok to adihayay a epoc. Nengnengen ko IKA, ikor lengoen ko ilaenoay a salicay:

• Sakadademakaw kiso to manan a sapaini noniya ika han?

• Itini i notekedan iso a pikingkiw, sapitongalaw kiso cipinang to manan a lalakaw han?

 KALIMLAAN

Padadotocen patongal ko kalawidang ci Yihofaan, patirengho to patosokan i pidokoan, ano mihaen kiso i, wa ngaˈay milayap to midaˈocay a ˈorip!

Lomalen

• Hano pakasoˈlin kiso to mamipadama ci Yihofa tisowanan a madimadi midoko Cingranan hani?

• Sasamaan kiso patongal to kalawidang ci Yihofaan hani?

• Patireng to patosokan i pidokoan hano ngaˈay padama tisowanan a macakat?