PES 60
Kee ni bisu i hol
Ni njel yigil yoñ i Bibel, u nigil ngandak mam inyu Yéhôva. I mam u nigil ma mboñ le u gwés Yéhôva kayéle u ti wemede nkikip, u kôs sôble. Ibale u yé ngi sôblana, bebek u gwé mahoñol le ndék ngéda, u ga boñ hala. Ndi to i mbus sôble, u nlama bé waa kôôge bebee ni Yéhôva. Maliga ma yé le, u nlama ke ni bisu i kôôge bebee ni Yéhôva niñ yoñ yosôna. Lelaa?
1. Inyuki u nlama ke ni bisu i lédés maada moñ ni Yéhôva?
Di nlama boñ biliya bi ngui inyu ke ni bisu i lédés maada més ni Yéhôva. Inyuki? Inyu boñ le ‘kekikel di ke bañ haa’ ni nye. (Lôk Héber 2:1) Kii i nla ni hôla bés i ke ni bisu i gwélél Yéhôva? Di nlama pagap i nson likalô, di yéñ ki minson mimpe di nla gwel i ntôñ u Yéhôva. (Añ Filipi 3:16) I gwélél Yéhôva i yé nsima nkeñi mut binam a nla bana i niñ yé!—Tjémbi 84:10.
2. Kii ipe u nla ke ni bisu i boñ?
Yigil yoñ i Bibel i mal, ndi niñ yoñ i kristen i mbôdôl ndigi mbôdlak. Bibel i nkal le “ni haba ki mut yondo.” (Éfésô 4:23, 24) W’a boñ hala ibale u nke ni bisu i nigil Bibel, i ke makoda, i nigil mam ma mondo mu bilem bi Yéhôva ni i ôt pék mu. Kee ni bisu i boñ biliya i kôna bilem bi Yéhôva mu niñ yoñ. U waa bañ boñ mahéñha ma mbéda inyu kônha Yéhôva maséé.
3. Lelaa Yéhôva a ga hôla we i ke ni bisu i hol?
Bibel i nkal le: “Nyambe . . . nyemede a ga mélés yigil nan. A ga téé bé siñ siñ, a ga ti bé ngui, a ga boñ le ni piñgla bañ.” (1 Pétrô 5:10) Bésbobasôna di mboma manoodana i niñ yés, ndi Yéhôva a nti bés i mam ma mbéda inyu hônba mo. (Tjémbi 139:23, 24) A mbôn le a ga ti bés ngôñ ni ngui i sélél nye niñ yés yosôna.—Añ Filipi 2:13.
KÔNDE TÉM
Béñge lelaa u nla ke ni bisu i hol ni lelaa Yéhôva a ga sayap we.
4. U waa bañ kwel ni bañga yoñ liwanda
Masoohe ni yigil i Bibel bi bi hôla we i yila liwanda li Yéhôva. Lelaa i mam ma, ma ga hôla we i ke ni bisu i kôôge bebee ni Yéhôva?
Añ Tjémbi 62:8, i mbus ni kwélél mbadga ini:
-
Lelaa u nla lémés masoohe moñ inyu kônde lédés liwanda joñ ni Yéhôva?
Añ Tjémbi 1:2 ni buk isi lipep, i mbus ni kwélél mbadga ini:
-
Lelaa u nla lémés lisoñgol joñ li Bibel inyu kônde kôôge bebee ni Yéhôva?
Kii u nla boñ, inyu boñ le yigil yoñ i Bibel i kônha we maséé? Inyu tehe ngim mam i i nla hôla we, tuk VIDÉÔ, i mbus ni kwélél mambadga mana:
-
Mu vidéô, mambe maéba u nsômbôl bii bisélél?
-
Kii u gwé ngôñ i nigil?
5. Téé ngim mam u nsômbôl boñ i pes mbuu
Ibale di ntéé ngim mam di nsômbôl boñ i nson u Yéhôva, hala a ga hôla bés i kônde hol. Tuk VIDÉÔ, i mbus ni kwélél i mbadga ini.
-
Mu vidéô, Cameron a bi boñ ngim ntjega, a téé ki ngim mam a nsômbôl yônôs i pes mbuu, mambe maséé hala bi lona nye?
Bôt bobasôna bé bon ba nla ke téé likalô i loñ ipe, ndi, di nla téé ngim mam di nsômbôl yônôs i pes mbuu. Añ Bingéngén 21:5, i mbus téé ngim mam u nla boñ . . .
-
i likoda.
-
i likalô.
Lelaa litiñ di nléba munu nlôñ Bibel unu, li nla hôla we i yônôs i njômbi i?
Ngim mam u nla boñ
-
I lémés masoohe moñ.
-
I añ Bibel yosôna.
-
I yi bôt ba likoda joñ bobasôna.
-
I bôdôl yigil i Bibel ni mut.
-
I yila nsañal nu pes ngéda tole nsañal nu ngéda yosôna.
-
Ibale u yé mankéé nu munlôm, boñ biliya i yila nhôla nson.
6. Niñ ilam i boga ni boga!
Añ Tjémbi 22:26, i mbus ni kwélél i mbadga ini:
-
Kii u nla boñ inyu bana loñge niñ ibôdôl i len ini ikepam i boga ni boga?
I SEM KWEP
Kee ni bisu i lédés liwanda joñ ni Yéhôva, u téé ngim mam u nsômbôl boñ i pes mbuu. Ha nyen w’a bana niñ ilam i boga ni boga!
Mambadga ma mbigda
-
Inyuki u nla ba nkwoog nkaa le Yéhôva a ga hôla we i gwélél nye?
-
Lelaa u nla lédés liwanda joñ ni Yéhôva?
-
Inyuki i téé ngim mam u nsômbôl boñ i pes mbuu i nla hôla we i kônde hol?
KÔNDE YÉÑ
Inyu Yéhôva kii i nlôôha ba nseñ, i boñ ngim jam i i ñunda bôt bobasôna le u gwé hémle tole i gwélél nye niñ yoñ yosôna?
I nla pam le kristen i i ngwélél Yéhôva ibôdôl behee i nimis maséé mé. Ndi, béñge kii i nla hôla nye i témbna mo.
Lelaa di nla téé ngim mam di nsômbôl boñ i pes mbuu, di yônôs ki mo?
“Gwel ngim minson inyu ti Nhek woñ lipém” (Nkum Ntat 15 Njéba, 2004)
Inyuki i yé nseñ i yila nhôôlak kristen i pes mbuu? Lelaa u nla pam likala li?
“Di boñ biliya i yila minhôôlak mi bôt—‘Hilo hikeñi . . . hi yé bebee’” (Nkum Ntat, 15 Mpuye, 2009)