JIʼTE 60

Le ne kwye tchum jwégne ne gô pe dze.

YOU’ NE

O tchye m ne you jiʼte Bible pou a yeng ŋwaʼgne, dagne medou potse ne Jéova. Potse tsye o dagne a, ghe ge o tchente khoung é, te mouʼtchwe o ha ne o bii, neng gre nouʼshye. A pe ge o ka woung gre ya, be mouʼtchwe o bo sè ne ghe ya ne mtyèʼdzu mye a bo sôʼ a. Daʼge, ne kwye tchum jwégne te djaʼ tchwe ye o ghe nouʼshye a pe. O fing ne pe fouʼte ne o ha beng Jéova ne gô pe dze ne mama. M tchi ge ke ?

1. Nweke a tcheng ge o le ne soumte you ne pe mso pou a Jéova ne gô pe dze ?

Pe gô tchente faʼ téʼ, ne ne soumte yôkpe ne pe mso pou a Jéova pe te yaʼ. Nweke ? Poʼo, “bwôk ge pe ke ghing m jye dyèʼ.” (Ébraika 2:1) Ke fing ne kwite wôkpe ne le dendeng gamte Jéova ne gô pe m dze ? Ne pe tchente faʼ tchum faʼ ne sing Ghôm Si, neng tcheng she mtchi ne bing tchente faʼ bi Si yôkpe. (Ké Filipo 3:16.) Ne faʼ bi Jéova be ye tchi ne tchwe ye a be a poung téʼ a !—Mghôm ghamte 84:10.

2. O gô ping ghe la ne ghô pe dze ?

Ba m paʼ you jiʼte Bible bo ming tchwelô a, you vôk kritè bo gô pe dze. Bible gôm ge a tcheng ge pe ‘kwa mo se ne pe paʼ dze a.ʼ (Éféso 4:23, 24) O gô pe ne jiʼte Ghôm Si, neng pe sôʼ mtchouʼte ne ghô pe m dze, ping lagne medou potse se ne Jéova ba ne m ma mye. Tcheng tchi paʼ o fing ne ghe te bing tchente be foʼte m ma mye tchum you tchi ne tchwe a. Ghe goung mkwyepgne mye a bo tcheng a ne gô pe dze, te a ghe ge Jéova ŋwègne.

3. Jéova gô kwite o ne kwye tchum jwégne m tchi ge ke ?

Bible gôm ge : “Si . . . gô sôʼ [ming ne nyapte wô, nwt.] pe kwaʼ yu. É gô sôʼ ning tum tsô dye, ning guʼ ne po, ghe ge pe sômywe le ŋakgne wô.” (1 Pètro 5:10) Mlente sôʼ ne goung yôkpe awè. Daʼge Jéova ha guʼ ye a tcheng a bi pe ne ne sôk ma. (Mghôm ghamte 139:23, 24) É kaʼgne ne ghe ge ji ne tcheng, ba guʼ ne ghe pe ne pe, poʼo ge pe le dendeng faʼ bii.—Ké Filipo 2:13.

PING TCHENG NE GÔ DZE

Yô tchi paʼ o fing ne le ne kwye tchum jwégne gô pe dze a, ba tchi paʼ Jéova gô ning byagne ne o a.

4. Pe gômte pou a so o ye tchuô ne gô pe dze

Priya pou a jiʼte Bible be a kwite o ne ji so Jéova. Ne ghe potse bô mebue fing ne kwite o ne tchente be tchwe pe beng Jéova m tchi ge ke ?

Ké Mghôm ghamte 62:8, neng gômte ne hente yenge :

Ne ne soumte you ne pe mso pou a Jéova, o fing ne nyapte ke ne you tchi ne be gre priya, ba ne ywe ye o gôm bii a ?

Ké Mghôm ghamte 1:2 ba ywe ne thoute, neng gômte ne hente yenge :

Ne ne soumte you ne pe mso pou a Jéova, o fing ne nyapte ke ne you tchi ne pe khé Bible ?

O fing ne ghe ge you ne jiʼte Bible do o, ping tchente boung m tchi ge ke ? Ne ne naʼ jye tchi paʼ o gô ghe a, yô VIDÉO, neng dou gômte ne mhente menge.

VIDÉO: Ping nyapte you tchi ne jiʼte ywe do o (5:22)

O fing ne ying ne ma mtchi ne ghe mye pou daʼte tchum vidéo a ?
A gô poung o ne lagne ywe ne ma potse ?

5. Yap potse jwégne tsye o gô ghe, ne ne bing tchente faʼ bi Jéova a

Ne yap potse jwégne tsye o gô ghe a, gô kwite o ne kwye tchum jwégne ne gô pe dze. Yô VIDÉO, dou gômte ne hente yenge.

VIDÉO: La meilleure vie qui soit (3:31)

Tchum vidéo, ne yap potse jwégne tsye é le gô ghe a, le ghe ge Cameron ghe ya ŋwègne ?

Goung pô awè ka fing ne lou gô tchum mouʼ goung, ne ne sing Ghôm Si. Daʼge goung yôkpe awè, pe fing ne yap potse jwégne tsye pe gô khouʼgne ne ghe a. Ké Mghôm jyenwe 21:5, neng dou sè nwe ne potse tsye o fing ne yap ne ghe . . .

tchum bemte a.
tchum faʼ ne sing Ghôm Si a.

Khète ye a tchum yeng khè Bible a, fing ne kwite o ne kem ne potse tsye o djap ne ghe a, m tchi ge ke ?

She mfoʼte potse tsye o fing ne yap ne ghe a

Ping nyapte tchi mpriya mou.
Ké goung Bible awè.
Lagne ne ping tchente jye bawele tchum you bemte.
Toʼ neng tchye taʼ jiʼte Bible.
Le faʼ ŋaʼjye ne ŋwe, ke faʼ ŋaʼjye ne goung tam awè le.
O pe taʼ fe, o faʼ ne ne ji taʼ gè faʼ kwite.

6. Tchwe mama !

Ké Mghôm ghamte 22:26, neng gômte ne hente yenge :

O fing ne ghe la, ne ne tchente dzu pé ne vôk tchwelô ba ne mama ?

YE NE KHAMTE

Pe soumte you ne pe mso pou a Jéova, neng be djap potse jwégne tsye o gô ghe a ne gô pe dze. Poʼo, o fing ne tchwe mama !

O lagne ke ?

Nweke o fing ne tchente jye ge Jéova gô kwite o ne faʼ bii pe dendeng ?
O fing ne soumte you ne pe mso pou a Jéova m tchi ge ke ?
Ne yap potse jwégne tsye o gô ghe a, fing ne kwite o ne kwye tchum jwégne m tchi ge ke ?

You jiʼte Bible ming ne tyèʼ:

Ywe ye o gô ghe a

Ne gouʼ ye a bo sôʼ a, ké mbouʼ ŋwaʼgne Approchez-vous de Jéhovah ba “Viens, suis-moi.” A gô kwite o ne kwye tchum jwégne ne ghô pe dze, ba ne ping tchente fouʼte ne o ha beng Pepa tsu kèbeng, ba Mou é.