LIKE SUANLƐ 60
Kɔ ɔ ɲrun Ɲanmiɛn sulɛ’n nun titi
Biblu’n nun like suanlɛ’n ukali wɔ maan w’a si Zoova i su like kpanngban kpa. Zoova i su like mɔ a suannin’n ti’n, a klo i. Yɛ atrɛkpa’n, w’a fa ɔ wun w’a mɛn i, yɛ b’a yo wɔ batɛmun. Sɛ a nin-a yoman sɔ kusu’n, atrɛkpa’n, w’a sunnzun kɛ á yó sɔ koko nga nun. Sanngɛ kɛ be ko yo wɔ batɛmun’n, i sɔ’n kleman kɛ w’a wie i kwlaa yo. ?Ngue yɛ á yó naan a nin Zoova amun afiɛn w’a mantan titi-ɔ?
1. ?Ngue ti yɛ ɔ fata kɛ a mian ɔ ɲin naan a nin Zoova amun afiɛn mantan titi-ɔ?
Ɔ fata kɛ e mian e ɲin naan e nin Zoova e afiɛn mantan kpa titi. ?Ngue ti-ɔ? Biblu’n se kɛ “kɛ ɔ ko yo naan y’a yaciman atin’n ti.” (Ebre Mun 2:1) ?Ngue yɛ ɔ kwla uka e naan y’a su Zoova kpa titi-ɔ? Maan e bo jasin fɛ’n i kpa titi. Yɛ e bu ninnge wie mɔ Zoova i sulɛ’n nun’n, e kwla yo be kpa tra laa’n be akunndan. (Kanngan Filipufuɛ Mun 3:16 nun.) Like kpafuɛ nga sran kun kwla yo’n yɛle Zoova i sulɛ’n.—Jue Mun 84:10.
2. ?Ngue like ekun yɛ ɔ fata kɛ a mian ɔ ɲin yo i titi-ɔ?
Kannzɛ bɔbɔ a su wa wie fluwa nga i nun like suan’n, sanngɛ ninnge wie’m be o lɛ m’ɔ fata kɛ a yo be titi-ɔ. Biblu’n se kɛ ɔ fata kɛ ‘e fa nzuɛn uflɛ’n.’ (Efɛzifuɛ Mun 4:23, 24) Kɛ á súan Ɲanmiɛn Ndɛ’n i nun like kɔ́’n, mɔ á trán aɲia’m be bo’n, á wá súan Zoova i su like uflɛ wie mun ekun, yɛ á sí i kpa ekun trá laa’n. Mian ɔ ɲin naan niɛn i ajalɛ’n su. Yɛ kaci ɔ sa ninnge wie’m be yolɛ’n nun titi naan Zoova i klun jɔ ɔ wun.
3. ?Wafa sɛ yɛ Zoova wá úka wɔ naan w’a wɔ ɔ ɲrun i sulɛ’n nun titi-ɔ?
Biblu’n se kɛ: “Ɲanmiɛn [...] bɔbɔ ɔ́ gúa amun like klelɛ’n i bo. Ɔ́ yó maan amún yó yakpafuɛ, ɔ́ yó maan amún ɲán wunmiɛn, yɛ ɔ́ yó maan amún jrán kekle.” (1 Piɛli 5:10) E kwlakwla’n, blɛ wie nun’n, e konvi kwla sɔ sa tɛ yolɛ’n. Sanngɛ Zoova kwla uka e naan y’a tɔman sa tɛ yolɛ’n nun. (Jue Mun 139:23, 24) Zoova seli kɛ ɔ́ yó maan é kúnndɛ kɛ é yó like ng’ɔ klo i’n, kpɛkun ɔ́ mán e wunmiɛn naan y’a kwlɛ i yo.—Kanngan Filipufuɛ Mun 2:13 nun.
SI NDƐ’N NUN KPA EKUN
É wá kán like nga a kwla yo naan w’a wɔ ɔ ɲrun Ɲanmiɛn sulɛ’n nun titi’n i ndɛ. Kpɛkun é kán wafa nga Zoova wá yrá ɔ su’n i ndɛ wie.
4. Maan a nin ɔ Janvuɛ kpafuɛ’n be koko yalɛ titi
Ɲanmiɛn srɛlɛ’n nin Biblu’n nun like suanlɛ’n, be ukali wɔ maan a kacili Zoova i janvuɛ. ?Wafa sɛ yɛ ninnge sɔ’m be yolɛ’n kwla uka wɔ naan a nin Zoova amun afiɛn w’a mantan kpa w’a tra laa-ɔ?
An kanngan Jue Mun 62:8 nun, i sin’n an koko kosan yɛ’n i su yalɛ:
-
?Wafa sɛ yɛ a kwla srɛ Ɲanmiɛn naan a nin i amun afiɛn w’a mantan kpa w’a tra laa-ɔ?
An kanngan Jue Mun 1:2, ɔ nin ja ngua lɔ ndɛ’n nun’n. I sin’n, an koko kosan yɛ’n i su yalɛ:
-
?Wafa sɛ yɛ a kwla kanngan Biblu’n nun naan a nin Zoova amun afiɛn w’a mantan kpa w’a tra laa-ɔ?
?Ngue yɛ á yó naan w’a ɲan ɔ Biblu’n nun like suanlɛ’n i su ye kpa-ɔ? Ninnge wie mɔ a kwla yo’n be yɛ. An bo VIDEO’N, i sin’n an koko kosan yɛ’m be su yalɛ.
-
?Ninnge nga be kannin be ndɛ video’n nun’n, oninfuɛ’n yɛ a kunndɛ kɛ á nían su yó wie-ɔ?
-
?Ngue yɛ a kunndɛ kɛ á súan su like-ɔ?
5. Fa ninnge wie mun sie ɔ ɲrun kɛ á yó be
Sɛ a sunnzun kɛ á yó ninnge wie mun Zoova i sulɛ’n nun’n, i sɔ’n úka ɔ naan w’a wɔ ɔ ɲrun. An bo VIDEO’N, i sin’n an koko kosan yɛ’n i su yalɛ.
-
?Kɛ Kamerɔnun sunnzunnin kɛ ɔ́ yó ninnge wie mun Zoova i sulɛ’n nun’n, i su ye benin yɛ ɔ ɲɛnnin i-ɔ?
E ngba e kwlá kɔman nvle uflɛ nun e ko boman jasin fɛ’n. Sanngɛ e kwla sunnzun kɛ é yó ninnge uflɛ wie mun. An kanngan Ɲanndra Mun 21:5 nun. I sin’n, an koko ninnge wie mɔ a kwla sunnzun kɛ á yó be’n be su yalɛ:
-
Asɔnun’n nun.
-
Jasin fɛ bolɛ’n nun.
?Wafa sɛ yɛ Biblu’n nun ndɛ mma nga kwla uka ɔ naan w’a yo like nga a sunnzun kɛ á yó’n niɔn?
Ninnge wie mɔ a kwla sunnzun kɛ á yó’n
-
A kwla se kɛ á srɛ́ Ɲanmiɛn kpa trá laa’n.
-
A kwla se kɛ á kánngan Biblu’n i wunmuan’n nun.
-
A kwla se kɛ á sí asɔnun’n i nunfuɛ’m be kwlaa.
-
A kwla se kɛ a nin sran kun bé bó Biblu’n nun like suanlɛ bo.
-
A kwla se kɛ á káci cɛn kunngun atin bofuɛ annzɛ titi atin bofuɛ.
-
Sɛ a ti yasua’n, a kwla se kɛ á káci asɔnunfuɛ’m be ukafuɛ.
6. A kwla di aklunjɔɛ tititi!
An kanngan Jue Mun 22:26 nun, i sin’n an koko kosan yɛ’n i su yalɛ:
-
?Ngue yɛ a kwla yo naan w’a di aklunjɔɛ dɔ nga su ɔ nin e ɲrun lɔ-ɔ?
NDƐ’N I KPƆLƐ BOLƐ
Mian ɔ ɲin naan a nin Zoova amun afiɛn mantan kpa titi. Yɛ fa ninnge wie mun sie ɔ ɲrun kɛ á yó be i sulɛ’n nun. Sɛ a yo sɔ’n á dí aklunjɔɛ tititi!
Ndɛ’n i nun flanlɛ
-
?Ngue ti yɛ a lafi su kɛ Zoova wá úka wɔ naan w’a su i kpa-ɔ?
-
?Ngue yɛ a kwla yo naan a nin Zoova amun afiɛn w’a mantan kpa-ɔ?
-
?Ngue ti yɛ sɛ a sunnzun kɛ á yó ninnge wie mun Ɲanmiɛn sulɛ’n nun’n, i sɔ’n úka wɔ naan w’a wɔ ɔ ɲrun-ɔn?
NDƐ WIE MUN EKUN
Like ng’ɔ ti cinnjin Zoova ɲrun’n, yɛle kɛ e mian e ɲin e yo i klun sa’n titi.
Ɔ ju wie’n, Zoova i sufuɛ kpa mun bɔbɔ be diman aklunjɔɛ kpa kɛ laa’n sa. ?Nguɛ yɛ be kwla yo naan b’a di aklunjɔɛ ekun-ɔn?
Biblu’n nun like suanlɛ’n nin i su akunndan bulɛ’n kwla uka e naan y’a di aklunjɔɛ kpa ekun (5:25)
?Á yó sɛ naan w’a kwla yo ninnge nga a sunnzunnin kɛ á yó be Ɲanmiɛn sulɛ’n nun’n?
“Maan e fa ninnge wie mun e sie e ɲrun kɛ é yó be naan e manman Ɲanmiɛn” (Sasafuɛ Tranwlɛ’n nun ndɛ)
?Ngue ti yɛ ɔ ti cinnjin kɛ e wɔ e ɲrun Ɲanmiɛn sulɛ’n nun-ɔn? ?Yɛ wafa sɛ yɛ e kwla yo sɔ-ɔ?
“Maan e mian e ɲin e yo sran afin ‘Anannganman Ɲanmiɛn i cɛn dan’n w’a mantan koko’” (Sasafuɛ Tranwlɛ’n, afuɛ 2009, Mɛ 1)
Ninnge wie mɔ be kwla yo ɔ fɛ ekun'n
KOSAN NGA SRAN’M BE TA BE USA’N
?Ngue yɛle Biblu’n nun like mɔ Zoova i Lalofuɛ’m be nin sran’m be suan’n?
A kwla fa Biblu’n nga a klo’n naan Zoova i Lalofuɛ kun w’a kle ɔ like. Ɔ osufuɛ mun nin ɔ janvuɛ’m be kwla tran like suanlɛ’n i bo wie. Be deman sika.
