ISAMBILILO 60
Twalilileni Ukukosha Bucibusa Bwenu na Lesa
Ukutula apo mwatendekele ukusambilila Baibolo muli cino citabo, namusambilila ifingi pali Yehova. Ifyo musambilile nafilenga mwatemenwako Yehova kabili mufwile mwali-ipeela kuli ena no kubatishiwa. Nga ca kuti tamwabatishiwa, nalimo mulefwaya ukubatishiwa nomba line. Lelo pa numa ya kubatishiwa tamulingile ukuleka ukukosha bucibusa bwenu na Yehova. Kuti mwatwalilila ukukosha bucibusa bwenu na Yehova umuyayaya. Finshi mufwile ukucita pa kuti mutwalilile ukukosha bucibusa bwenu na Yehova?
1. Cinshi mulingile ukutwalilila ukukosha bucibusa bwenu na Yehova?
Tufwile ukwesha na maka ukutwalilila ukukosha bucibusa bwesu na Yehova. Mulandu nshi? “Pa kuti twisensenunwa” ukufuma kuli ena. (AbaHebere 2:1) Finshi fingatwafwa ukutwalilila ukubombela Yehova ne cishinka? Tufwile ukulabila sana imbila nsuma no kulabombako imilimo na imbi mu cilonganino ca kwa Lesa. (Belengeni Abena Filipi 3:16.) Takwaba icawama ukucila pa kubombela Yehova!—Amalumbo 84:10.
2. Finshi fimbi ifyo mulingile ukutwalilila ukulacita?
Nangu ca kuti mwalapwisha ukusambilila Baibolo ukubomfya cino citabo, mufwile ukutwalilila ukucita ifilanga ukuti muli Bena Kristu. Baibolo itweba ukuti tufwile ‘ukufwala ubuntu bupya.’ (Abena Efese 4:23, 24) Nga mwatwalilila ukusambilila Icebo ca kwa Lesa no kulasangwa mu kulongana lyonse, mukalaishibilako na fimbi pali Yehova na pa mibele yakwe. Mule-esha na maka ukuba ne mibele iyo Yehova akwata. Kabili twalilileni ukulawamyako umo mushicita bwino pa kuti mulelenga Yehova alesekelela.
3. Bushe Yehova akamwafwa shani ukutwalilila ukukosha bucibusa bwenu na ena?
Baibolo itila: “Lesa . . . umwine akapwisha ukumusambilisha, akamwikasha, kabili akamukosha.” (1 Petro 5:10) Bonse fye tulatunkwa ukucita ifyabipa. Lelo Yehova alatwafwa ukukaana amatunko. (Amalumbo 139:23, 24) Alilaya ukuti akulatupeela amaka no kutulenga ukulafwaisha ukumubombela ne cishinka.—Belengeni Abena Filipi 2:13.
SAMBILILENI NA FIMBI
Sambilileni ifyo mwingacita pa kuti mutwalilile ukukosha bucibusa bwenu na Yehova, kabili mumone ne fyo akamupaala.
4. Twalilileni ukulalanshanya na Cibusa wenu uwa pa mutima
Ipepo no kusambilila Baibolo nafilenga mwaba cibusa wa kwa Yehova. Nomba bushe ipepo no kusambilila Baibolo kuti fyalenga shani mwapalama sana kuli ena?
Belengeni Amalumbo 62:8, lyena lanshanyeni ici cipusho:
-
Finshi mwingalanda ilyo mulepepa pa kuti mukoshe bucibusa bwenu na Yehova?
Belengeni Amalumbo 1:2, lyena lanshanyeni ici cipusho:
-
Finshi mufwile ukucita ilyo mulebelenga Baibolo pa kuti mukoshe bucibusa bwenu na Yehova?
Finshi mulingile ukucita pa kuti munonkelemo sana ilyo muleisambilisha Baibolo? Pa kuti mumone fimo ifyo mwingacita, tambeni VIDIO, lyena lanshanyeni amepusho yakonkapo.
-
Pa fyaciba muli vidio finshi ifyo mwingatemwa ukubomfya ilyo muleisambilisha?
-
Lyashi nshi ilyo mwingatemwa ukuisambilishapo?
5. Mulepangila libela ifyo mulefwaya ukubombako mu cilonganino ca kwa Lesa
Ukupangila libela ifyo mulefwaya ukubombako mu mulimo wa kwa Yehova kukalenga mukatwalilile ukulunduluka mu fya kwa Lesa. Tambeni VIDIO, lyena lanshanyeni icipusho cakonkapo.
-
Muli vidio twatamba, busuma nshi ba Cameron basanga mu kupangila libela ifya kucita mu mulimo wa kwa Yehova?
Te bonse abengaya mu kubombela ku calo cimbi. Na lyo line, bonse kuti twapanga ukubombako ifyo twingakumanisha. Belengeni Amapinda 21:5, lyena tontonkanyeni pa fyo mwingapanga ukubombako . . .
-
mu cilonganino.
-
mu mulimo wa kubila imbila nsuma.
Bushe ishinte lyaba pali ili ilembo kuti lyamwafwa shani ukufishapo ifyo mwapanga ukucita mu mulimo wa kwa Yehova?
Fimo ifyo mwingapanga ukucita
-
Ukulapepa amapepo ayasuma.
-
Ukubelenga Baibolo yonse.
-
Ukwishiba aba bwananyina bonse mu cilonganino.
-
Ukutendeka no kulatungulula isambililo lya Baibolo.
-
Ukubombako bupainiya bwa kwafwilisha nelyo ubwa nshita yonse.
-
Nga muli baume kabili mwalibatishiwa, mulebombesha pa kuti mukafikepo ukuba ababomfi batumikila.
6. Kuti mwaba ne nsansa umuyayaya!
Belengeni Amalumbo 22:26, lyena lanshanyeni ici cipusho:
-
Kuti mwacita shani pa kuti mube ne nsansa umuyayaya?
IFYO MUSAMBILILE
Twalilileni ukulakosha bucibusa bwenu na Yehova no kulapanga ifya kucita mu mulimo wa kwa Yehova. Nga mulecita ifi mukaba ne nsansa umuyayaya!
Ukupitulukamo
-
Finshi fingalenga mwashininkisha ukuti Yehova akamwafwa ukulamubombela ne cishinka?
-
Finshi mufwile ukucita pa kuti mulekosha bucibusa bwenu na Yehova?
-
Bushe ukupanga ifya kucita mu mulimo wa kwa Lesa kuti kwamwafwa shani ukulalunduluka?
ISHIBILENIPO NA FIMBI
Finshi Yehova atemwapo sana, ukucita icintu icikulu umuku umo pa kulanga ukuti twalimutemwa nelyo ukutwalilila ukuba aba cishinka kuli ena ubumi bwesu bonse?
Nangu fye mubomfi wa kwa Yehova uwa cishinka kuti aleka ukuba ne nsansa ilyo alemubombela. Moneni ifyo engacita pa kuti abe ne nsansa na kabili.
Ukubelenga Baibolo no Kutontonkanyapo Sana Kwalibafwile Ukuba ne Nsansa na Kabili (5:25)
Kuti mwacita shani pa kupanga ifya kucita mu mulimo wa kwa Lesa na pa kuti mufishepo ifyo mwapanga?
“Cindikeni Kabumba Wenu pa Kuba na Mabuyo ya ku Mupashi” (Ulupungu lwa kwa Kalinda, July 15, 2004)
Mulandu nshi ukubela abakalamba mu fya kwa Lesa kwacindamina, kabili kuti mwacita shani pa kuti mube abakalamba mu fya kwa Lesa?
Nalimo Kuti Mwatemwako ne fi
AMEPUSHO ABANTU BEPUSHA SANA
Bushe Isambililo lya Baibolo E Cinshi?
Amasuko ku mepusho pe sambililo lya Baibolo ilyabula ukulipilisha.
