FARKARKOR 60
Mam fa Wis Bena kuker Yahwe I Nsambraḇ Syadi
Isof ro dine, wafarkor roi nabor kwar fa wafawi Yahwe I. Roi wafawi kwar anna kam nafrur fa waswar syadi Yahwe I. Imbude saswar Benane naiso eḇewari buk kenem Bena ḇe Yahwe I ma wakḇebaptis. Bebaptis ḇaim ido, imbude Ausya kwara fa wafrur roi ine ro swaf ḇefanam ine. Ḇape bebaptis kwar ido, mam kaku fa wis Bena kuker Yahwe I nsambraḇ syadi ma fanam syadi faro Yahwe I isof fyoro-fyoro. Moḇsa wafrur roi nane rai?
1. Rosai ḇefnai kaku fa mam pdef wis Bena kuker Yahwe I fa nsambraḇ syadi?
Kokame fandun fa kosewar kaku insama wis koḇena kuker Yahwe I nsambraḇ syadi. Rosai ḇefnai fa kofrur roi ine? Insama ”koki awer” bur I. (Ibrani 2:1) Rosai na ḇefnoḇek ko fa kofarmyan pdef ḇe Yahwe I? Komyaren koso ro fararur ḇaḇebaryas ma kosewar nyan ḇese fa kofarmyan ḇe Yahwe I rarirya kwar. (Kowasya Filipi 3:16.) Kofarmyan ḇe Yahwe ima nyan kenem ḇepyum kaku dirya.—Mazmur 84:10.
2. Rosai wer fandun fa wafrur na pdef?
Farkarkor Refo Benane kero na namnai, imbape kenem Bena ḇe snonggaku Kristen nari nambran pdef. Refo ya ikofen ḇe ko fa kofasnai kenem ḇebabo. (Efesus 4:23, 24) Wamyaren wafarkor Refo ya ma waso fananjur ari ya pdef kada, nari wafarkor roi ḇebabo ḇekur Yahwe I ma rari Ḇyena. Swewar fa wafasnai Yahwe rari ḇepyum Ḇyena ro kenem Beja. Swewar kako fa fadwer kenem Beja wer insama wafrur fa Yahwe imarisen.
3. Moḇsa Yahwe na ifnoḇek Au rai?
Refo ya doḇe Manseren Allah nari fyarkor ko isof ro imnai. Nari ifrur fa kodworen, nari syambraḇser ko, ma nari syoser ko. (1 Petrus 5:10) Kokame na kosmai farawrowes fa kofrur roi ḇesasar. Ḇape Yahwe nari isaramper ko fa kopampum na. (Mazmur 139:23, 24) Yahwe ikofen kaku kwar bo doḇe nari byuk marisen ma samambraḇ ḇe Au fa wafarmyan pdef ḇe I.—Kowasya Filipi 2:13.
SWEWAR KAKU WER
Nari kawos nyan fa mam wis Bena kuker Yahwe I nsambraḇ syadi. Nari kawos kako barakas rosai nari Yahwe byuk ḇe Au na.
4. Wawos pdef ḇe bati ḇepyum Bedi ma rwower roi ikofen na
Nadi ma farkarkor Refo nafnoḇek Au fa nwa Yahwe I ḇe bati. Inja rosai ḇefnai fa wafrur na pdef ido nari fanam syadi ḇe I?
Kowasya Mazmur 62:8, raimnai kawos fakfuken ine:
-
Insama wis Bena kuker Yahwe I nsambraḇ syadi, moḇsa na wakofenḇair moḇ ḇaḇir raya ro nadi Bena yoḇ I rai?
Kowasya Mazmur 1:2 ma fasfas kasun, raimnai kawos fakfuken ine:
-
Insama wis Bena kuker Yahwe I nsambraḇ syadi, rosai na wafrur fa wasmai payamyum nabor syadi ro ḇaḇewasya Refo Bena?
Rosai nari wafrur kaku insama wasmai payamyum nabor syadi ro farkarkor manggun Bena? Imbe wafawi nyan ḇepyan riḇeso ido, komam VIDIO, raimnai kawos fakfuken na.
-
Ro vidio insanja, nyan ḇepyum rosai bisa waso ya?
-
Roi minsaiso wamarisen syadi fa wafarkor na?
5. Wap ḇepon roi imbe wafrur ro fararur ḇesren ya
Wap ḇepon roi imbe wafrur ro fararur ḇesren ya kada, nari nafnoḇek Au fa wis Bena kuker Yahwe I nsambraḇ syadi. Komam VIDIO, raimnai kawos fakfuken na.
-
Ro vidio insanja, rariso Cameron ismai payamyum snar dap ḇepon roi imbe ifrur ro fararur ḇesren ḇyena?
Snonggaku syakam ḇa bisa sra ḇe moḇ ḇese fa sbaryas ro diwa. Imbape kokame bisa kap ḇepon roi kosambraḇ fa kofrur na. Kowasya Amsal 21:5, raimnai kawos rosai bisa wakfrur ro . . .
-
sidang ya dori.
-
ḇaḇebaryas ya.
Rariso wos anun ḇero mnuk ine ifnoḇek Au fa wafrur raris rosai wap ḇepon kwar na?
Roi bisa wap ḇepon fa wafrur na
-
Benadi kaku fa wakofenḇair moḇ ḇaḇir raya.
-
Wawasya pres Refo ya.
-
Swewar fa mambir naek srar ḇero sidang syakam.
-
Buk farkarkor Refo faro snonggaku ḇese.
-
Wakfarmyan ḇe perintis ektra ḇaido perintis biasa.
-
Snon disaw ido, swewar fa wakfarmyan ḇe hamba pelayanan.
6. Wasmai payamyum ḇekain fyoro!
Kowasya Mazmur 22:26, raimnai kawos fakfuken ine:
-
Rosai na wakfrur fa wasmai payamyum ro fafisu ine isof fyoro-fyoro?
FARKARKOR ḆYENA
Swewar pdef fa mam wis Bena kuker Yahwe I nsambraḇ syadi ma wap ḇepon roi imbe wafrur ro fararur ḇesren na. Wafrur rarirya kada, nari wasmai payamyum ḇekain fyoro!
Waswarepen Kaḇer
-
Rosai ḇefrur fa wakyar Yahwe nari ifnoḇek Au fa wafarmyan pdef ḇe I?
-
Rosai na wafrur fa wis Bena kuker Yahwe I nsambraḇ syadi?
-
Wap ḇepon roi imbe wafrur ro fararur ḇesren Bena ido, rosai ḇefnai fa nane nari nafnoḇek Au fa wis Bena kuker Yahwe I nsambraḇ syadi?
SWEWAR NABOR WER
Yahwe ḇyesyowi syadi roi ḇeba kofrur ro kenem koḇena ke imarisen syadi kosouser pdef kofarmyan ḇe I ro ras nakam ro kankenem koḇena?
Yahwe manfamyan Ḇyedi ro fafisu oso bisa nya raryaḇ wer ḇa. Kosmai roi ḇeradine ido, rosai na kofrur fa koryaḇ kaḇer?
Moḇsa na wap ḇepon roi imbe wafrur ro fararur ḇesren ya ma moḇsa wafrur na rai?
Rosai ḇefnai fa wasur ḇe snonggaku Kristen ḇemas, ma moḇsa na wasmai na rai?
”Swewar fa ḇe Snonggaku Ḇemas—’Yahwe Ras Ḇeba Ḇyedi Fyanam Kwar’” (Syap Baryas 15 Mei 2009)
Wamarisen Ido Mam Ine Kako
FAKFUKEN RO KAWASA KAM
Moḇsa Saksi-Saksi Yahwe Sya Farkarkor Refo Sena Isnai Rai?
Bisa bepake Refo rosai monda fa wafarkor Refo ḇeyor ḇaḇyak ḇa kuker Saksi-Saksi Yahwe sya. Wamgak awer fa wor kina karyer Bansya kam ḇaido bati Besya fa sakso.
