LESEN 60
Frengud Moa Wetem Jehova
Long Baebol kos ya, yu bin lanem plante samting long saed blong Jehova. Ol samting ya oli mekem se yu rili lavem Jehova nao maet yu givim laef blong yu long hem mo yu baptaes. Sipos yu no mekem yet, maet yu stap tingbaot blong mekem samting ya i no longtaem. Be afta we yu baptaes, hemia i no min se yu stop long ples ya. Yu save gohed olwe blong kam fren blong Jehova. ?Olsem wanem blong mekem?
1. ?From wanem yu mas gohed blong frengud moa wetem Jehova?
Yumi mas wok had blong frengud moa wetem Jehova. ?From wanem? Blong “yumi no drif, nao yumi go longwe” long hem. (Hibru 2:1) ?Wanem i save givhan long yumi blong gohed blong wosipim Jehova? Yumi save bisi long wok blong prij mo lukaot ol narafala rod blong mekem moa long wok blong hem. (Ridim Filipae 3:16.) !Wosipim Jehova hemia beswan laef!—Ol Sam 84:10.
2. ?Wanem narafala samting we yu mas gohed blong mekem?
Nating se Baebol kos ya klosap i finis, be laef blong yu olsem wan Kristin bambae i gohed nomo. Baebol i talem se yumi “mas werem niufala fasin.” (Efesas 4:23, 24) Taem yu gohed blong stadi Baebol mo go long ol miting, bambae yu lanem sam niufala samting long saed blong Jehova mo ol fasin blong hem. I gud yu lukaot rod blong folemgud ol fasin ya blong hem. Gohed blong jenisim sam samting long laef blong mekem Jehova i glad.
3. ?Olsem wanem Jehova i save halpem yu blong gohed moa?
Baebol i talem se: “God bambae i finisim trening blong yufala . . . Hem bambae i mekem yufala i strong, mo i givim paoa long yufala, i mekem yufala i stanap strong we i no gat wan samting i save muvum yufala.” (1 Pita 5:10) Bambae yumi evriwan i fesem ol traem. Be Jehova bambae i givim ol samting we yumi nidim blong stanap strong. (Ol Sam 139:23, 24) Hem i promes se bambae hem i givim strong tingting mo paoa blong yumi gohed blong wosipim hem.—Ridim Filipae 2:13.
DIGIM MOA
Luk olsem wanem yu save kam klosap long Jehova mo olsem wanem bambae hem i blesem yu.
4. Gohed blong toktok wetem besfren blong yu
Prea mo Baebol stadi blong yu i givhan long yu blong kam fren blong Jehova. ?Olsem wanem ol samting ya oli save mekem yu kam klosap moa long hem?
Ridim Ol Sam 62:8, mo tokbaot kwestin ya:
-
?Olsem wanem yu save mekem ol gudfala prea blong frengud moa wetem Jehova?
Ridim Ol Sam 1:2 mo futnot, mo tokbaot kwestin ya:
-
Blong frengud moa wetem Jehova, ?bambae yu mekem wanem taem yu ridim Baebol?
?Olsem wanem yu save mekem prapa stadi blong yu i kamgud moa? Blong luk sam tingting, plei VIDEO, mo tokbaot ol kwestin ya.
-
?Weswan long ol rod ya we yu save folem?
-
?Yu yu wantem stadi long wanem topik?
5. Putum ol mak long saed blong spirit
Taem yu gat ol mak long ol wok blong Jehova, hemia bambae i givhan long yu blong yu gohed blong frengud wetem hem. Plei VIDEO, mo tokbaot kwestin ya.
-
Long video ya, ?olsem wanem ol mak we Cameron i putum i givhan long hem?
I no evriwan we oli save muv i go long wan nara kantri blong prij. Nating se i olsem, yumi evriwan i save putum sam mak we yumi naf blong kasem. Ridim Ol Proveb 21:5, mo tingbaot ol mak we yu wantem kasem . . .
-
insaed long kongregesen.
-
long wok blong prij.
?Olsem wanem ol advaes we oli stap long vas ya oli save givhan long yu blong kasem ol mak blong yu?
Ol mak blong tingbaot
-
Kamgud moa long fasin blong yu blong prea.
-
Ridim ful Baebol.
-
Traehad blong save evriwan long kongregesen blong yu.
-
Statem mo mekem wan Baebol stadi.
-
Mekem wok blong haftaem o fultaem paenia.
-
Sipos yu wan brata, traehad blong kam wan man blong givhan.
6. !Enjoem laef olwe!
Ridim Ol Sam 22:26, mo tokbaot kwestin ya:
-
?Yu save mekem wanem blong enjoem laef naoia mo blong olwe?
SAMARI
Gohed blong frengud moa wetem Jehova mo putum ol mak long saed blong spirit. !Nao bambae yu save enjoem laef olwe!
Tingtingbak
-
?From wanem yu sua se Jehova bambae i halpem yu blong yu gohed blong wosipim hem?
-
?Olsem wanem yu save mekem frensip blong yu wetem Jehova i kam strong moa?
-
?Olsem wanem ol mak we yu putum oli save halpem yu blong frengud moa wetem Jehova?
FAENEMAOT
?Jehova i glad moa taem yumi mekem wan bigfala samting wantaem nomo blong soemaot se yumi wosipim hem o taem yumi wosipim hem long ful laef blong yumi?
Ol man we oli holemstrong long Jehova tu oli save lusum glad. Makem samting we yumi save mekem blong kasembak glad.
?Olsem wanem yu save putum ol mak long saed blong spirit mo kasem olgeta?
“Kasem Ol Mak Long Saed Blong Spirit Blong Presem God” (Wajtaoa, 15 Julae 2004)
?From wanem i impoten blong kam bigman long spirit mo olsem wanem blong kasem mak ya?
“Gohed Kwik Blong Kam Bigman From We ‘Bigfala Dei Blong Jeova i Klosap’” (Wajtaoa, 1 Mei 2009)
Maet Yu Laekem Hemia Tu
KWESTIN WE PLANTE MAN OLI STAP ASKEM
Baebol Stadi Kos We Yu Save Mekem Wetem Ol Witnes Blong Jehova
Yu save yusum eni translesen blong Baebol blong mekem wan fri Baebol stadi kos wetem ol Witnes blong Jehova. Singaot ol famle mo ol fren tu blong oli joen wetem yu.
