Sonari domma lambin bahat na ibotoh ham pasal Jahowa, janah lambin holong do uhurmu hu Bani. Halani ai, gabe tarojur ma ham mangondoskon diri bani Jahowa janah ididi. Anggo lape, tontu sihol do ham ase ididi. Tapi dobkonsi ididi, maningon marusaha do ham ase totap dohor bani Jahowa. Sonaha carani?

1. Mase ham maningon torus marusaha ase lambin dohor bani Jahowa?

Maningon marusaha do hita ase lambin dohor bani Jahowa. Mase? “Ase ulang mayub hita.” (Heber 2:1) Halani ai, aha do na porlu ibahen hita? Ringgas ma hita marbarita janah totap ma mambere na sidearan bani Jahowa. (Basa Pilippi 3:16.) Anggo hita mangidangi Jahowa, ai ma na mambahen martuah goluhta!​—Psalmen 84:10.

2. Aha ope na maningon torus ibahen ham?

Hassi pe domma salosei ham marlajar Bibel mamakei buku on, maningon torus do idalankon ham Hata ni Naibata ibagas goluhmu. Bibel mangkatahon porlu do hita “mamakei sifat-sifat na baru”. (Epesus 4:23, 24) Anggo ringgas ham marlajar Bibel janah roh hu partumpuan, lambin ibotoh ham ma pasal Jahowa ampa sifat-sifat-Ni. Marusaha ma maniru sifat-sifat-Ni ai janah mambahen hamubahon ibagas goluhmu. Anggo ibahen ham sonai, gabe malas ma uhur ni Jahowa.

3. Sonaha Jahowa mangurupi ham?

Bibel mangkatahon, “Naibata . . . manlatih nasiam ronsi salosei. Patoguhon-Ni, pargogohan-Ni, janah patotapon-Ni ma nasiam.” (1 Petrus 5:10) Hassi pe sai adong na manggoda hita ase mangkorjahon na salah, tapi iurupi Jahowa do hita ase ulang mangkorjahon ai. (Psalmen 139:23, 24) Marjanji do homa Ia mambahen hita sirsir laho mangidangi-Si janah margogoh laho mangkorjahon ai.​—Basa Pilippi 2:13.

 PARLAJARI ROH BAHATNI

4. Totap ma martonggo ampa marlajar Bibel

Halani martonggo janah marlajar Bibel, gabe boi ma ham marhasoman pakon Jahowa. Tapi sonaha ase lambin dohor ham hu Bani?

Basa ma Psalmen 62:8, janah ulas ma sungkun-sungkun on:

• Maningon sonaha do tonggonta ase lambin dohor bani Jahowa?

Basa ma Psalmen 1:2, janah ulas ma sungkun-sungkun on:

• Sanggah mambasa Bibel, aha do na porlu ibahen hita ase lambin bahat parlajaran na idapot hita?

Aha do na boi ibahen ham ase lambin dear parlajaran pribadimu? Laho mambotoh piga-piga contoh, tonton ma VIDEO, dob ai ulas ma sungkun-sungkun on.

• Contoh na ija do na sihol iihutkon ham?

• Pasal aha do na laho iparlajari ham sanggah parlajaran pribadi?

 RIMPUNAN

Marusaha ma lambin dohor bani Jahowa, janah bahen ma cita-cita na boi pamalaskon uhur-Ni. Anggo ibahen ham sonai, dapot ham ma hagoluhan na martuah sadokah ni dokahni!

Na Dob Iparlajari

• Mase pos uhurmu sai urupan ni Jahowa do ham ase boi totap setia?

• Aha do na porlu ibahen ham ase lambin dohor bani Jahowa?

• Aha do gunani anggo ibahen ham tujuan atap cita-cita ibagas pangidangion?