Sa imong pagtuon sa Bibliya, daghan kag nakat-onan bahin kang Jehova. Tungod sa imong mga nakat-onan, imo na siyang gihigugma pag-ayo ug tingali imo nang gipahinungod ang imong kaugalingon kaniya ug nagpabawtismo na ka. Kon wala pa, tingali naghunahuna ka nga himoon ni sa di madugay. Pero ang imong pag-uswag dili matapos sa pagpabawtismo. Makapadayon ka sa pagpakigsuod kang Jehova hangtod sa hangtod. Sa unsang paagi?

1. Nganong angay nga padayon nimong palig-onon ang imong relasyon kang Jehova?

Kinahanglang maningkamot ta nga padayong palig-onon ang atong relasyon kang Jehova. Ngano? “Aron dili ta maanod palayo” kaniya. (Hebreohanon 2:1) Unsay makatabang nato aron padayon tang makaalagad kang Jehova nga matinumanon? Magpabilin tang madasigon sa pagsangyaw ug mangita tag ubang paagi nga mapauswag ang atong pag-alagad sa Diyos. (Basaha ang Filipos 3:16.) Ang pag-alagad kang Jehova mao ang pinakamaayong paagi sa paggamit sa kinabuhi!—Salmo 84:10.

2. Unsa pay padayon nimong buhaton?

Bisag mahuman na ka niini nga pagtuon sa Bibliya, ang imong kinabuhi ingong Kristohanon magpadayon. Ang Bibliya nag-ingon nga kinahanglan natong “isul-ob ang bag-ong personalidad.” (Efeso 4:23, 24) Samtang magpadayon ka sa pagtuon sa Pulong sa Diyos ug sa pagtambong sa mga tigom sa kongregasyon, makakat-on kag bag-ong mga butang bahin kang Jehova ug sa iyang mga hiyas. Pangitag mga paagi nga mas masundog pa nimo ang iyang mga hiyas. Padayon sa paghimo sa gikinahanglang mga kausaban aron mapalipay si Jehova.

3. Unsaon ka pagtabang ni Jehova nga mouswag?

Ang Bibliya nag-ingon: “Ang Diyos . . . magtapos mismo sa inyong pagbansay. Palig-onon mo niya, hatagan mo niyag kusog, ibutang mo niya sa lig-ong pundasyon.” (1 Pedro 5:10) Kitang tanan makaatubang ug tentasyon. Pero ihatag ni Jehova kon unsay atong gikinahanglan aron masuklan kana. (Salmo 139:23, 24) Nagsaad siya nga iyang palig-onon ang imong tinguha sa pagbuhat sa mga butang nga gusto niya aron makaalagad ka niya nga matinumanon.—Basaha ang Filipos 2:13.

 TUN-IG DUGANG

4. Padayon sa pagpakig-estorya ug sa pagpaminaw sa imong kinasuorang Higala

Ang pag-ampo ug pagtuon sa Bibliya nakatabang nimo nga mahimong higala si Jehova. Sa unsang paagi makatabang na nimo nga mas masuod pa kaniya?

Basaha ang Salmo 62:8, ug dayon hisgoti kini nga pangutana:

• Aron molig-on ang imong relasyon kang Jehova, unsaon nimo pagpauswag ang kalidad sa imong pag-ampo?

Basaha ang Salmo 1:2 ug ang footnote, ug dayon hisgoti kini nga pangutana:

• Aron molig-on ang imong relasyon kang Jehova, unsaon nimo pagpauswag ang imong pagbasa sa Bibliya?

Unsay imong himoon aron mas makabenepisyo ka sa imong personal nga pagtuon? Aron naa kay ideya, i-play ang VIDEO, ug dayon hisgoti ang mosunod nga mga pangutana:

• Unsa nga mga sugyot sa video ang imong mapadapat?

• Unsa nga mga topiko ang ganahan nimong tun-an?

 SUMARYO

Padayon sa pagpalig-on sa imong relasyon kang Jehova ug sa paghimog espirituwal nga mga tumong. Pinaagi niana, mabuhi ka hangtod sa hangtod!

Review

• Nganong makasalig ka nga tabangan ka ni Jehova aron makaalagad nga matinumanon?

• Unsaon nimo pagpalig-on ang imong relasyon kang Jehova?

• Sa unsang paagi ang espirituwal nga mga tumong motabang nimo nga mouswag?