ISHOMO RYA 60
Gumizamu kugira entunguka
Okwega eki kitabo bikakukwasa kumanya ebintu byingi ebiri kukwata ahari Yehova. Ebintu ebi wayegire bikakukwasa kukizaho kumukunda, catuma wamweha kandi wabatizibwa. Yaba otakakikozire, nobasa kuba ori kutekateka kukikora omu bwire bwa juba aha. Konka tibishemerire kuhenderera aha kubatizibwa kusha. Nobasa kugumizamu kuhika hihi ya Yehova ebiro byona. Bata shi?
1. Ahabw’enki oshemerire kugumizamu kugumya obunywani bwawe na Yehova?
Tushemerire kutamu amani kugira ngu tugumye obunywani bwitu na Yehova. Ahabw’enki? Ni ahabw’okugira ngu, ‘tutahaba tukamurugaho’. (Abaheburaayo 2:1) Ni enki ekiri kubasa kutukwasa kugumizamu kuhereza Yehova omu bwesigwa? Tushemerire kugumizamu kuhugira omu murimo g’okuburira kandi turonda n’obundi buryo bw’okuherezamu Yehova omu bwijwire. (Shoma omu Bafilipi 3:16.) Mazima kukorera Yehova ni kirungi munonga!—Zaaburi 84:10.
2. Ni enki ekindi eki oshemerire kugumizamu kukora?
N’obu wamara kwega eki kitabo, okubaho kwawe nk’Omukristo byo nibyija kugumizamu. Bibuli netugambira ku tushemerire ‘kujwara omuntu omusya.’ (Abaefeso 4:23, 24) Ku oragumizemu kweshomesa Ekigambo ca Ruhanga kandi okagumizamu kwekwatanisa omu nterane, noyija kumanya byingi ahari Yehova n’emitwarize yeye. Gumizamu kumutoreza ori kwereka emitwarize yeye omu kubaho kwawe. Guma okore empinduka eziri kwetengesa kugira ngu oshemeze Yehova.
3. Ni bata oku Yehova arije kukukwasa kugira entunguka?
Bibuli negira ngu: ‘Ku muriheza kubonabonesibwa akanya kace, [Ruhanga] aryabagarura busya, abagumye [kandi] abahe amani.’ (1 Petero 5:10) Twena nitubugana ebigezo. Konka Yehova natuha cona eki turi kwetenga kugira ngu tubisingure. (Zaaburi 139:23, 24) Nakuraganisa ku arije kukuha ecetengo n’amani ebi ori kwetenga kugira ngu omuhereze omu bwesigwa.—Shoma omu Bafilipi 2:13.
YEGA BYINGI
Shwijuma oku ori kubasa kugumizamu kugira entunguka n’oku Yehova arije kugumizamu kukuha emigisha.
4. Guma oganire na munywani wawe ori kukira abandi bona
Eshara n’okweyegesa Bibuli bikatuma waba munywani wa Yehova. Ni bata oku ebyo biri kubasa kutukwasa kukizaho kuhika hihi ya Yehova?
Shoma omuri Zaaburi ya 62:8, rero muganire ahari eki kibuzo:
-
Kugira ngu okizeho kuba munywani wa Yehova, ni bata oku ori kubasa kukizaho kuboneza eshara zawe?
Shoma omuri Zaaburi ya 1:2, rero muganire ahari eki kibuzo:
-
Kugira ngu okizeho kuba munywani wa Yehova, ni bata oku ori kubasa kukizaho kuboneza oburyo obu ori kushomamu Bibuli?
Ni bata oku ori kubasa kuboneza oku ori kweyegesa Bibuli? Kugira ngu orebe ekiri kubasa kukukwasa, zana VIDIYO, rero muganire ahari ebi bibuzo.
-
Ni buha buryo bw’okweyegesa oburi omuri egi vidiyo obu n’iwe ori kubasa kukoresa?
-
Ni biha bintu ebi ori kubasa kwegaho?
5. Yetereho entego z’eby’omwika
Kweteraho entego omu murimo gwa Yehova nibyija kukukwasa kugumizamu kutunguka. Zana VIDIYO, rero muganire ahari eki kibuzo.
-
Nk’oku wakireba omuri vidiyo, ni bata oku Cameron yagasirwe ahabw’okweteraho entego z’eby’omwika?
Buri muntu wena tari kubasa kuza kuburira omu rindi ihanga. Konka, twena nitubasa kweteraho entego ezi turi kubasa kuhikaho. Shoma omu Nfumu 21:5, rero oshwijume entego ezi ori kubasa kweteraho omu . . .
-
kibina.
-
murimo g’okuburira.
Ni bata oku omusinge oguri omuri oru runyiriri guri kubasa kukukwasa kuhika aha ntego zawe?
Entego ezi ori kubasa kweteraho
-
Okuboneza eshara zawe.
-
Okushoma Bibuli yona.
-
Okumanya buri omwe omu kibina.
-
Okutandika kwegesa omuntu Bibuli.
-
Okuba omupayoniya w’omuyambi ninga shi ow’obwire bwona.
-
Yaba ori mwenetata nobasa kweteraho entego y’okuba omuhereza omu kibina.
6. Shemerererwa amagara ebiro byona!
Shoma omuri Zaaburi ya 22:26, rero muganire ahari eki kibuzo:
-
Ni enki eki ori kubasa kukora kugira ngu oshemerererwe amagara omuri obu bwire n’ebiro byona?
EMPINYE
Gumizamu kugumya obunywani bwawe na Yehova kandi oyetereho entego z’eby’omwika. Eco nikija kutuma washemerererwa amagara ebiro byona!
Wayega ki?
-
Ahabw’enki ori kubasa kwesiga otari kubanganisa ku Yehova arije kukukwasa kumuhereza omu bwesigwa?
-
Ni bata oku ori kubasa kugumya obunywani bwawe na Yehova?
-
Ni bata oku okweteraho entego z’eby’omwika biri kubasa kukukwasa kugira entunguka?
CONDOZA
Ari ekikorwa kimwe c’okugumizamu kuba omwesigwa ahari Yehova n’okugumizamu kuba omwesigwa ahari Yehova omu kubaho kwawe kona, ni enki eki ari kureba nk’ec’omuhendo?
Omuhereza wa Yehova w’omwesigwa na we nabasa kubura okushemererwa. Reba oku ari kubasa kushuba kukugira.
Tunga okushemererwa okuri kuruga omu kweyegesa n’okutekateka (5:25)
Ni bata oku ori kubasa kweteraho entego z’eby’omwika kandi okazihikaho?
Ahabw’enki Omukristo ashemerire kukura omu by’omwika kandi shi ni bata oku ari kubasa kukikora?
