Lón unusen ei kókkótun káéén Paipel, ka káé chómmóng mettóch usun Jiowa. Ese mwáál, minne ka káé usun Jiowa a efisi óm kopwe fókkun tongei, ina popun ka fangóló manawom ngeni me papatais. Nge ika kesaamwo papatais, iwe eli ka ekiekin papatais ekiseló. Óm feffeitá ese úkútiw atun ka papatais. Ka tongeni ririéchúló ngeni Jiowa tori feilfeiló. Ifa usun?

1. Pwata a lamot óm kopwe sópweló le apéchékkúla óm riri ngeni Jiowa?

A lamot ach sipwe achocho le sópweló le apéchékkúla ach riri ngeni Jiowa. Pwata? “Pwe sisap tokola seni.” (Ipru 2:1) Met epwe álisikich le sópweló ach angang ngeni Jiowa fán tuppwél? Sia tongeni fókkun achocho lón ewe angangen afalafal me kútta pwal ekkóch alen ach sipwe alapaaló ach angang ngeni Jiowa. (Álleani Filipi 3:16.) Ach angang ngeni, ina ewe mettóch mi kon aúchea seni meinisin lón manawach!​—Kölfel 84:10.

2. Met kopwe pwal sópweló le féri?

Inaamwo ika a much ei kkótun káéén Paipel, nge óm manaweni eú manawen Chón Kraist epwe sópwósópwóló. Ewe Paipel a erá pwe a lamot ach sipwe “angei ewe manau mi fö.” (Efisos 4:23, 24) Atun ka sópweló le kákkáé án Kot we Kapas me fiffiti ekkewe mwich, kopwe káé ekkewe mineféén pwóróus usun Jiowa me napanapan kewe. Achocho le áppirúfichi napanapan kewe. Sópweló le féri ekkewe siwil mi lamot pwe kopwe apwapwaai Jiowa.

3. Ifa usun Jiowa epwe álisuk le feffeitá lón pekin ngún?

Ewe Paipel a erá pwe Kot “epwe püsin aunusöchükemiila, epwe anükücharakemi o apöchöküla letipemi, pwe oupwe nük.” (1 Petrus 5:10) Oukich meinisin sipwe kúna sóssótun ach sipwe féri minne mi mwáál. Nge Jiowa epwe fang ngenikich minne mi lamot pwe sipwe tongeni ú ngeniir. (Kölfel 139:23, 24) A pwonei pwe epwe fang ngenikich ewe mochen me ewe tufichin angang ngeni fán tuppwél.​—Álleani Filipi 2:13.

 KÚTTAFICHI

4. Fóffós me akkaúseling ngeni Chienom we mi aúchea seni meinisin

Óm iótek me káé ewe Paipel a fen álisuk le wiliti chiechien Jiowa. Iwe, ifa usun ekkena mettóch ra tongeni álisuk le alapaaló óm ririéch ngeni?

Álleani Kölfel 62:8, me mwirin pwóróusfengen wóón ei kapas eis:

• Ren an epwe péchékkúl óm riri ngeni Jiowa, ifa usun ka tongeni émúrinnéló óm kewe iótek?

Álleani Kölfel 1:2, me mwirin pwóróusfengen wóón ei kapas eis:

• Ren an epwe péchékkúleló óm ririin chiechi ngeni Jiowa, ifa usun ka tongeni émúrinnéló óm álleaan Paipel?

Met ka tongeni féri pwe kopwe kúna watteen álillis seni óm pwisin káé Paipel? Ren óm kopwe silei, fichi ei VIDEO, me mwirin pwóróusfengen wóón ekkeei kapas eis.

• Ikkefa ekkewe kapasen emmwen lón ewe video ka tongeni apwénúetá?

• Met sókkun pwóróus ka mochen káé?

 MENLAPAN

Sópweló le apéchékkúlaló óm riri ngeni Jiowa me isetiw met kopwe achocho le tikeri. Iwe, ka tongeni eáni manaw mi pwapwa tori feilfeiló!

Enniwili

• Pwata ka tongeni lúkúlúk pwe Jiowa epwe álisuk le angang ngeni fán tuppwél?

• Ifa usun ka tongeni apéchékkúlaló óm riri ngeni Jiowa?

• Ifa usun óm isetiw met kopwe achocho ngeni lón pekin ngún a tongeni álisuk le feffeitá?