CAWN DINGMI 60
Ṭhangcho Peng
Mah Baibal kong i ruahceihṭinak thawngin Jehovah kong kha tampi na hngalh cang. Mah ruangah Pathian kha na dawt chinmi, a sinah na pum naa pekmi le tipil na inmi a si kho men. Tipil na in rih lo hmanhah a rauhlan ah in dingin na ruah khawh men. Asinain tipil na in dih hnuah i zuam a hau ti lo tinak a si lo. Jehovah kha naih zungzal awkah naa zuam peng a hau. Zeitindah?
1. Jehovah he nan i pehtlaihnak kha zeicah na fehter peng awk a si?
Jehovah he kan i pehtlaihnak a feh peng nakhnga kan i zuam a hau. Zeicah? A sinin “a ping i kan kal sual nakhnga lo” caah a si. (Hebru 2:1) Zumhfek tein Jehovah biak peng awkah zeinihdah a kan bawmh khawh? Phungchim rian kha i manh lo ngaiin kan ṭuan khawh i tling tein Pathian biak khawh ning lam hna kha kan kawl khawh. (Filipi 3:16 rel.) Jehovah rianṭuan cu a ṭha bikmi nunnak a si.—Salm 84:10.
2. Zeidah na tuah peng rih a hau?
Mah Baibal kong i ruahceihṭinak cu nan dih cang hmanhah Khrihfa nunning in na nun peng a hau lai. Baibal nih “nan mihring thar kha i hruk u” tiah a kan ti. (Efesa 4:23, 24) Baibal kha na hlathlai peng i naa pumh peng ahcun Jehovah kong le a sining kong hna kha na hngalh chin lai. Pathian sining hna kha na si khawh chung in i zohchunh awkah i zuam. Cun Jehovah lunglawmhter awkah a herhmi thlennak hna kha tuah peng.
3. Ṭhancho peng awkah Jehovah nih zeitindah aan bawmh lai?
Baibal nih hitin a ti: “Pathian . . . nih cun tlinnak an pek hna lai i fehnak le thazaang le a fekmi hrambunhnak an pek hna lai.” (1 Peter 5:10) Kan dihlak in a ṭhalomi thil tuah awkah lemsoinak kan tong lai. Asinain Jehovah nih lemsoinak al awkah kan herhmi bawmhnak kha a kan pek. (Salm 139:23, 24) Pathian nih zumhfek tein amah biak duhnak lungthin lawng si loin ṭhawnnak zong kaan pek lai tiah bia aa kam.—Filipi 2:13 rel.
TAM DEUH IN HLATHLAI
Ṭhancho peng awkah zeidah na tuah a hau timi kong le Jehovah nih zeitindah thluachuah aan pek lai timi kong kha hlathlai.
4. Na hawikom ṭha bik he pehtlaihnak tuah peng
Thlacamnak le Baibal relnak nih Jehovah he hawikom si awkah aan bawmh. Mah thil hna tuahnak nih Jehovah he i naih chin awkah zeitindah aan bawmh khawh?
Salm 62:8 rel law mah biahalnak hi i ruah u:
-
Jehovah he nan i pehtlaihnak fehter awkah na thlacam ning kha zeitindah na ṭhanchoter khawh?
Salm 1:2 rel law mah biahalnak hi i ruah u:
-
Jehovah he nan i pehtlaihnak fehter awkah Baibal na rel ning kha zeitindah na ṭhanchoter khawh?
Pumpak hlathlainak in ṭhathnemhnak hmuh awkah zeitindah na tuah khawh? Ruahnak cheuhnak cheukhat kong hngalh awkah, VIDEO kha piah, cun a tanglei biahalnak hna hi i ruah u.
-
Mah video i zei ruahnak cheuhnak kha dah na zulh khawh?
-
Zei kong dah hlathlai na duh?
5. Thlaraulei hmuitinh ngei
Jehovah rianṭuannak ah hmuitinh ngeihnak nih ṭhancho peng awkah aan bawmh lai. VIDEO kha piah, cun a tanglei biahalnak hi i ruah u.
-
Mah video ah Cameron cu thlaraulei hmuitinh a ngeih caah zei ṭhatnak dah a hmuh?
Ramdang ah phungchim dingin mikip in i ṭhial khawh a si lo. Asinain kan dihlak in kan phanh khawhmi hmuitinh kha kan chiah khawh. Phungthlukbia 21:5 rel law a tanglei kong hna hi ruat . . .
-
Khrihfabu ah zei hmuitinh dah chiah na duh?
-
lohmun rianṭuannak ah zei hmuitinh dah chiah na duh?
Na hmuitinh phanh awkah mah Baibal caang ah aa telmi phunglam nih zeitindah aan bawmh khawh?
Na chiah khawhmi hmuitinh hna
-
Thlacam ning ṭhanchoter ding.
-
Baibal a uk ningin rel ding.
-
Khrihfabu unau dihlak he i theihhngalh awkah i zuam ding.
-
Baibal cawnpiaknak pakhat ngeih awkah i zuam ding.
-
Manhcaan hmaikal asiloah hmaanhmaan hmaikal ṭuan ding.
-
Unaupa na si ahcun bu rianṭuantu si awkah i zuam ding.
6. Nunnak kha zungzal in i nuamhpi!
Salm 22:26 rel law mah biahalnak hi i ruah u:
-
Nunnak kha atu le zungzal in naa nuamhpi khawh nakhnga zeidah na tuah khawh?
A TAWINAK
Jehovah he nan i pehtlaihnak kha fehter peng law thlaraulei hmuitinh hna kha chia. Cutin na tuah ahcun nunnak kha zungzal in naa nuamhpi khawh lai.
I Ruahṭi Ṭhannak
-
Jehovah nih zumhfek tein amah na biak peng khawh nakhnga aan bawmh lai ti kha zeicah na zumh khawh?
-
Jehovah he nan i pehtlaihnak kha zeitindah na fehter khawh?
-
Thlaraulei hmuitinh ngeihnak nih ṭhancho peng awkah zeitindah aan bawmh khawh?
HLATHLAI CHAP
Jehovah nih Pathian kan i bochan ti a langhtermi a hleikhunmi thil tuahsernak pakhat maw a sunsak deuh asiloah kan nun chung dihlak a cungah zumhfek tein kan ummi dah?
Zumhfek tein Jehovah a biami hna hmanh an i nuamhnak a tlau kho. Zeitindah nuamhnak an hmuh ṭhan timi kong kha hlathlai.
Zeitindah thlaraulei hmuitinh na chiah khawh i na phanh khawh timi kong kha hlathlai.
“Sertu Thangṭhat Awkah Thlaraulei Hmuitinh Hna Kha Hmang” (Vennak Innsang capar)
Thlaraulei nutling, patling si cu zeicah a biapit i zeitindah thlaraulei ah nutling, patling pakhat na hung si khawh?
“Nutling Patling Sinak Kha Fuh—‘Jehovah Ni A Liannganmi Cu A Nai Cang’” (2009, May 15, Vennak Innsang)
Mah Kong Hna Zong Hi Na Duh Khawh Men
ATU LE ATU AN HALMI BIAHALNAK
Jehovah Tehte Hna Tuahmi Baibal Cawnnak Program Cu Zeidah A Si?
Jehovah Tehte Hna nih man loin an tuahmi Baibal kong i ruahceihṭinak program ah zei bantuk Baibal lehnak paoh kha na hman khawh. Na chungkhar dihlak asiloah na hawile ahopaoh nangmah he cawn dingin na sawm khawh hna.
