Pandan ou letid Labib, ou’n aprann en kantite lo Zeova. Bann keksoz ki ou’n aprann in fer ou kontan li sitan en kantite ki petet ou’n dedye ou lavi avek li e batize. Si non, petet ou pe mazin pour fer li tre byento. Me ou progre pa fini avek batenm. Ou kapab kontinyen vin pli pros avek Zeova pour touzour. Ki mannyer ou fer sa?

1. Akoz ou devret kontinyen fer ou lanmitye avek Zeova vin pli for?

Nou bezwen travay dir pour kontinyen fer nou lanmitye avek Zeova vin pli for. Akoz? “Pour ki nou pa zanmen drive” lwen avek li. (Ebre 2:1) Kwa ki kapab ed nou servi Zeova fidelman? Nou kapab reste okipe dan sa travay predikasyon e rod lezot fason pour servi nou Bondye plis. (Lir Filipyen 3:16.) Servi Zeova i sa pli bon fason pour viv nou lavi!​—Psonm 84:10.

2. Ki ou devret kontinyen fer ankor?

Menm si ou pe fini etidye Labib, ou lavi konman en Kretyen i kontinyen. Labib i dir ki nou bezwen “devlop sa nouvo personnalite.” (Efezyen 4:23, 24) Anmezir ki ou kontinyen etidye Parol Bondye e asiste renyon dan kongregasyon, ou pou aprann nouvo keksoz lo Zeova ek son personnalite. Rod fason pour imit son personnalite pli byen dan ou lavi. Kontinyen fer bann sanzman ki neseser pour fer plezir Zeova.

3. Ki mannyer Zeova pou ed ou progrese?

Labib i dir: “Bondye . . . pou fini zot formasyon li menm. I pou fer zot ferm, i pou fer zot for e i pou met zot lo en fondasyon solid.” (1 Pyer 5:10) Nou tou nou ganny tante. Me Zeova i donn nou sa ki nou bezwen pour nou kapab reziste tantasyon. (Psonm 139:23, 24) I promet pour donn ou sa dezir ek sa lafors pour servi li fidelman.​—Lir Filipyen 2:13.

 AL PLI O PROFON

4. Kontinyen kominik avek ou pli bon zanmi

Lapriyer ek letid Labib in ed ou pour vin zanmi Zeova. Ki mannyer sa de keksoz i kapab ed ou pour vin pli pros ankor avek li?

Lir Psonm 62:8 e apre reponn sa kestyon:

• Pour ki ou lanmitye avek Zeova i vin pli for, ki mannyer ou kapab amelyor kalite ou lapriyer?

Lir Psonm 1:2 e apre reponn sa kestyon:

• Ki mannyer ou kapab amelyor ou lektir Labib pour fer ou lanmitye avek Zeova vin pli for?

Ki mannyer ou kapab ganny plis byenfe avek ou letid personnel? Pour vwar enn de lide, zwe sa VIDEO e apre reponn sa bann kestyon.

• Ki sizesyon dan sa video ou kapab met an pratik?

• Ki topik ou ti a kontan etidye?

 REZIMEN

Kontinyen fer ou lanmitye avek Zeova vin pli for e annan bann lobzektif spirityel. Apre sa ou pou kapab viv ere pour touzour!

Revizyon

• Akoz ou kapab asire ki Zeova pou ed ou servi li fidelman?

• Ki mannyer ou kapab fer ou lanmitye avek Zeova vin pli for?

• Ki mannyer bann lobzektif spirityel i kapab ed ou fer progre?