ˈWƆN ˗GƆ 60
Kaa Zoova ka ˗bha ˈˈtɔŋdëdhɛ ˗gɛn ˗gban ˗kplawo
Ü ˗bha Biblö draansü ˈö yö, ꞊yaa˗ kë ˈbha ˈwɔn ꞊vadhɛ ˈö ˈwo ˗gban Zoova ˗bha ˗an dɔ. ˈYaa za ˈgü ꞊dhɛ ˗a ˗dhɔ ˈö ü ˈgü ˗ya ˗dadhiʋ̈. ˗A ˈbha ꞊ya kë ˗a ˗dhɔ ˈö ˈˈdhʋ̈ ˗ya ü ˗blü ˈö ˈbha ü ˗de nu ˗a ˗dhɛ ˈö ˈbha bɔ ˈˈyi ꞊bhaa. ꞊Ya kë ˈzü ꞊dhɛ ü ˈti˗ kë ˈˈdhʋ̈ ꞊köŋ, kö ˗a ˗kë ˈˈdhʋ̈ ˗sü ˗dhɔ ꞊mɔɔn˗ ˗bha ˈö ˗kë ü ˗bha. ˈˈKɛɛ ˗yö kë ü ˈˈɲaan ꞊dhɛ ü ˗gɛn ˗bha ˗dho ˈˈdhiʋ̈ ˗sü ˈˈdhiʋ̈ ˈyaa ˈto ˗bɔyibhaasü ˗bha. Ü ꞊mɔɔn˗ ˗bha ˈü ꞊ɲɔɔn Zoova ˗bha ˗kplawo. Ü ˗dho ˗a kë ˈˈdhʋ̈ ˗kɔ ˗kë ꞊dhɛ?
1. ˈMën ˗kë ˈö ü dua ˈdhö ˗mü kö ˈü kaa Zoova ka ˗bha ˈˈtɔŋdëdhɛ ˗gɛn ˗gban ˗kplawo?
Kwa dua ˗mü kö ˈkwa kwa ˈgü dɔ ˈˈgbɩɩ˗ kö ˈkwa kwaa Zoova kwa ˗bha ˈˈtɔŋdëdhɛ ˗gɛn ˗gban ˗kplawo. ˈMën ˗kë? ˗Yö ‹kë ˈˈdhʋ̈ kö ˈkwa ˗dho ˈdho ꞊dhɛng ˗zian ˗ta› ˈö ˈkwa dho ˗a ˈka ꞊gblɛɛn. (Eblö 2:1) ˈMën ˗dho kwa ˗takun kö ˈkwa ˈto ˗klu ˗sü ˈka Zoova ˗bha? Kwa dua ˗mü kö ˈkwa ˗zlanwopö kwa ꞊faan ˈka, kö kwa ˗kɔ ˗yö kë ˗a ˗bha yö ˈˈwɛɛ ˗nu ˈgü ꞊dedewo. (Fidhipö 3:16 ˗wo pö.) Zoova ˗dhɔkësü ˈnën ˈtɔ˗ ˗tosɛta kë ˗kɔ ˗së ˈö ˗dhö!—Psaume 84:10.
2. ˗Mën ˈˈwɛɛ ˈbhaa ˈö ü dua ˈdhö ˗mü kö ˈü˗ kë ˈzü?
ˈBha yö ü ˗bha Biblö draansü ˈö yö ˗a ˈˈdhiʋ̈todhɛ ˗bha. ˈˈKɛɛ ˗yö kë ü ˈˈɲaan ꞊dhɛ ü ˗bha ˗kë kletiɛn ˈka ˗sü zü ˈnën ˈü˗ dɔ bhë. Biblö ˗ya ˗pö: ‹˗Ka ˈˈgla ˈka kë mɛ suu ˗dee ˈka.› (Efɛzö 4:23, 24) Kö ˈü Biblö draanˈˈ ˗kplawo, kö ˈü ˈdho ˗bhɔkwëë ˗nu ˗ta, ü ˗dho ˈwɔn ˈˈwɛɛ ˈbhaa ˗nu ˈwo ˗gban Zoova waa˗ ˗bha ˈˈklʋʋsë ˗nu ˗bha ˗an dɔ. ˗A ˈˈslö mɛɛnˈˈ ˗kplawo kö ˈü ˗gleŋ ˈsü ˗a ˗bha ˈwɔn kë ˗kɔ ˗nu ˗bha, kö ˈü ü ˈˈtakɔ ˗nu ˈö ˈwaa ˗së ˗an bho ˈˈgblʋʋ ˈü ˈdho ˗a ˈka ˈˈdhiʋ̈, kö ˈü kë Zoova ˗dhɛ ˗së ꞊dedewo.
3. Zoova ˗dho ü ˗takun ˗kɔ ˗kë ꞊dhɛ kö ü ˗gɛn ˗yö ˈdho ˈˈdhiʋ̈?
Biblö ˗ya ˗pö: «[˗Zlan] yöö ꞊dede ꞊në dho ka ˈˈgla ˗kɔ ˗dee kë, ˈyö ka ˗gɛn ˗gban, ˈyö ka gba faan ˈka ˈyö pë ˈbha ˗pë ˈbha ˈyaa vin ka ˗bha [˗Zlan] ˗bha zian ˗ta.» (1 Piɛdhö 5:10) Mɛn ꞊gban ˈˈpɛpɛ ˈgüdandhe ˗yö ˗nu kwa ˗ta. ˈˈKɛɛ Zoova ˗yö ꞊faan ˈö kwa ˗bhawɔn ˈdhö˗ ˗bha kö ˈkwa ˗gban ˈgüdandhe ˗nu ˗gɔ ˗a ˗nu kwa ˗dhɛ. (Psaume 139:23, 24) ˗Ya ˗pö ꞊dhɛ ˗yö ˗dho ˗klu ö ˗bha ˗sü ˗dhɔ ˗da kwa ˈgü, ˈö˗ ꞊faan nu kwa ˗dhɛ.—Fidhipö 2:13 ˗wo pö.
˗KAA ˈˈPIƲ̈ ˈPƆN
Pë ˈü ˗dho ˗a kë kö ü ˗gɛn ˗yö ˈdho ˈˈdhiʋ̈ ˗kplawo waa˗ ˈdhuëë˗ ˈö Zoova dho ˗a ˈkpɔ ü ˗bha, ˗kwaa ˗ga.
4. ˗Bhö ˈwɔn blɛɛˈˈ ü ˈˈtɔŋdë ˈˈgbɩɩ˗ ˈö bhë ˗a ˗dhɛ ˗kplawo, ˈü ü ˈˈtʋ ˈto ˗a ˗wo ˗bha.
Bhɛɛsü waa Biblö draansü ꞊wa ü ˗takun ˈbha kë Zoova ˈˈtɔŋdë ˈka. Ü ˗dho ˗a kë ꞊dhɛ kö pë ꞊plɛ ˈwo bhë ˗wa kë ˈü ˈto Zoova ˈˈsuee ˗kplawo?
˗Ka Psaume 62:8 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
-
˗Kɔ ˈü ꞊bhɛɛ ˗a ˈka waa ˈpë ˈü˗ pö ü ˗bha bhɛɛwo ˈgü, ü ˗dho baaˈˈ ˗an ˗bha ˗kɔ ˗kë ꞊dhɛ kö kaa Zoova ka ˗bha ˈˈtɔŋdëdhɛ ˗gɛn ˗yö ˗gban?
˗Ka Psaume 1:2 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
-
˗Mën ˈü ˗dho ü baaˈˈ ˗a ˗bha ü ˗bha Biblö ˗wopösü ˈgü kö kaa Zoova ka ˗bha ˈˈtɔŋdëdhɛ ˗yö kë ˈˈgbɩɩ˗?
Ü ˗dho ˗a kë ꞊dhɛ kö ˈü ꞊trɔɔn ꞊va ꞊dede ꞊slɔɔ ü ˗bha Biblö ˗draan ü ˗de ˈˈpiʋ̈ ˗sü ˈgü? ˗Kaa VIDEO ˗ga, kö ˗gleŋ ˗nu ˈwo ˗dho ü ˗takun ˗a ˗bha ˈü ˗an ˈbhaa yö. ˈKa ka bo, kö ˈka dhɛɛˈˈ ˗nu ˈwo ˈˈshia bhë ˗an ˗yɔ mɛɛnˈˈ.
-
˗Gleŋ ˗nu ˈwo go video ˈö bhë ˗a ˈgü, ˗a ˗mɛɛn ˈü˗ ˈˈpiʋ̈ ˈü˗ ˗ya ꞊bhlëë ˈgü?
-
ˈWɔn ˗gɔ ˗nu ˗mɛɛn ˈü˗ ˈˈpiʋ̈ ˈü ˗an draanˈˈ?
5. Pë ˗nu ˈü ˗dho ˗an kë kö ˈü ü ˗bha ˗Zlan ˗dhɔkëkɔ ˗dadhiʋ̈, ˗an ˗yaki ˗ya.
Kö ˈü ˈwɔn ˈbhaa ˗nu ˈö ˈwo ˗gban ˗Zlan gbasü ˗bha ˗an ˗ya ü ˗zo ˈˈpiʋ̈ kö ˈü ˗an kë, ü ˗gɛn ˗dho ˈdho˗ ˈˈdhiʋ̈ ˗kplawo. ˗Kaa VIDEO ˗ga, kö dhɛɛˈˈ ˈö ˈˈshia bhë ˈka˗ ˗yɔ mɛɛnˈˈ.
-
˗Dhɛ ˈö Kamedhɔnö ˗yö ˗Zlan ˗bha yö ˈbhaa ˗nu ˗ya ö ˗zo ˈˈpiʋ̈ ˈö ˗an ˗kë, ˈwɔn ˗së ˗mɛɛn ˈö˗ ꞊slɔɔ ˗a ˈgü?
Mɛn ˈbhaa ˗nu ˈwaa ꞊mɔɔn˗ ˗bha kö ˗wo ˈdho kö ˗wo ˗ya ˈˈsɛ ˈˈwɛɛ ˈgü kö ˗wo ˗zlanwopö mü. ˈˈKɛɛ mɛn ˈö ˈdhö ˗yö ˗mɔn ˗a ˗bha ˈö pë ˈö ˗mɔn ˗a kë ˗sü ˗bha ˗a ˗ya ö ˗zo ˈˈpiʋ̈. ˗Ka Proverbes 21:5 ˗wo pö, kö pë ˈü ꞊mɔɔn˗ ˗bha ˈü˗ kë ...
-
˗zlanwokɔdhi ˈgü,
-
˗zlanwopödhɛ ˈgü, ˈka˗ ˗wɔn blɛɛˈˈ.
ˈTɔŋ˗ ˗gɛngbandhɛ ˈö Biblö ˈˈɲan ˈö bhë ˗a ˈgü, ˗yö ˗dho ü ˗takun ˗kɔ ˗kë ꞊dhɛ kö ˈwɔn ˗nu ˈü ˗an ˗ya ü ˗zo ˈˈpiʋ̈ ˈü ˗mɔn ˗an kë ˗sü ˗bha?
Pë ˈbhaa ˗nu ˈü ꞊mɔɔn˗ ˗bha ˈü ˗an kë ˗sü ˗ya ü ˗zo ˈˈpiʋ̈
-
Baaˈˈ ü ˗bha bhɛɛˈˈ ˗kɔ ˗bha kö ˗yö kë ˗së.
-
Biblö ˗be ˗todhʋ̈sü ˗wo pö.
-
Ü ˈgü dɔ ˈˈgbɩɩ˗ kö ˈü ˗zlanwokɔdhi ˈgümɛn ˗nu ˈˈpɛpɛ dɔ.
-
Biblö draansü züdɔ mɛn ˈbhaa ˈˈpiʋ̈ kö ˗yö kë ü ˗bha ꞊klaŋnën ˈka.
-
˗Bhö kë ˗yödhiʋ̈ ˗kɔ ꞊löö ɛɛnˈˈ ˈˈtʋ̈ŋ ꞊gban ˈgü ˗yödhiʋ̈ ˈka.
-
Gɔɔn˗ ˈö ˈbha bɔ ˈˈyi ꞊bhaa, ˗a ˈˈslö mɛɛnˈˈ kö ˈü kë mɛn zii ˗kɔ ꞊löö ˈka.
6. Zuʋ̈gblüdhi ꞊slɔɔ ˗toëpö ˈka!
˗Ka Psaume 22:26 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
-
Ü ˗dho ˗a kë ꞊dhɛ kö ü ˗bha ˗tosɛta ˗yö kë ˗së ꞊dɛɛ, kö ˗yö kë ˗së ˗toëpö ˈka?
˗A ˈDHƐ TO KWA ˈˈƝAAN
Kaa Zoova ka ˗bha ˈˈtɔŋdëdhɛ ˗gɛn ˗gban ˗kplawo kö ˈwɔn ˗nu ˈwo ˗gban ˗a ˗dhɔkësü ˗bha ˈü ˗an kë ˗sü ˗ya ü ˗zo ˈˈpiʋ̈. ˈBha˗ kë ˈˈdhʋ̈, ü ˗dho ˗tosɛta kë zuʋ̈gblüdhi ˈgü ˗toëpö ˈka!
˗Zobuödhe
-
ˈMën ˗kë ˈü ˈdhaŋ˗ bho ˗sü ˈka ˗a ˈˈdhiʋ̈ ꞊dedewo ꞊dhɛ Zoova ˗dho ü ˗takun kö ˈü˗ ˗dhɔkë, kö ˈü ˈto ˗klu ˗sü ˈka ˗a ˗bha?
-
Ü ˗dho kaa Zoova ka ˗bha ˈˈtɔŋdëdhɛ ˗gɛn ˗gban ˗kɔ ˗kë ꞊dhɛ?
-
ˈWɔn ˗nu ˈwo ˗gban ˗Zlan ˗dhɔkësü ˗bha, ˈbha ˗an kë ˗sü ˗ya ü ˗zo ˈˈpiʋ̈, ˗yö ˗dho ü ˗takun ˗kɔ ˗kë ꞊dhɛ kö ü ˗gɛn ˗yö ˈdho ˈˈdhiʋ̈?
˗AN ˗GA ˈPÖ
˗Zlan ˗ya ˈˈpiʋ̈ kö ˈkwa ˈwɔn ˈkpii˗ dosɛnŋ ˈˈkpaan kë ö ˗dhɔkësü ˈgü ˗ee ɛɛnˈˈ ˗ya ˈˈpiʋ̈ kö ˈkwa ˈto ˗klu ˗sü ˈka ö ˗bha kwa ˗bha ˗tosɛta ꞊gban ˈˈpɛpɛ ˈgü ˗ee? ˗A ˗yɔ ˗ga.
Zoova ˗dhɔkëmɛn ˈö ˗klu ˗a ˗bha, ˗a ˈgü ꞊mɔɔn˗ ˗bha ˈö ga. ˈˈKɛɛ pë ˈö ꞊mɔɔn˗ ˗bha ˈö˗ ˗kë kö ˗yö zuʋ̈gblüdhi ꞊slɔɔ ˈzü ˗a ˗ga.
Zuʋ̈gblüdhi ꞊slɔɔ ˈzü Biblö draansü waa ü ˗zota ˗a ˈgü ˗sü ˈgü (5:25)
ˈWɔn ˗nu ˈwo ˗gban ˗Zlan ˗dhɔkësü ˗bha, ˗kɔ ˈü ˗dho ˗an ˗ya ü ˗zo ˈˈpiʋ̈ ˗a ˈka waa pë ˈü ˗dho ˗a kë kö ˈü ˗mɔn ˗an kë ˗sü ˗bha, ˗a ˗ga.
Pë ˈü ˗dho ˗a kë kö ˈü kë kletiɛn ˗zogbansü ˈka waa ˈpë ˗kë ˈö˗ ˗wɔn ˈdhö ˈˈgbɩɩ˗, ˗a ˗ga?