Woko mambo jita jombwea Yehova tongwea na jokwa la nin kalati. Yen ebe mambo mena wokono̱ ma boli ná o to̱nde mo̱ jita, ńai ńena o bake̱no̱ wame̱ne̱ na mo̱ o dubisabe̱ pe̱. O si bedi te̱ bola nika, ye̱ke̱i te̱ o te̱se̱ o bola nika son a ponda. Nde ombusa dubise̱ wangame̱n pe̱te̱ ńaka, we ná o benga sisea be̱be̱ na Yehova o longe̱ lo̱ngo̱ le̱se̱. Ne̱ni e?

1. Ońola nje wangame̱nno̱ benga jouse̱ diko̱m lo̱ngo̱ na Yehova e?

Jangame̱n po̱ngo̱ miwe̱n minde̱ne̱ ná di benge jouse̱ diko̱m lasu na Yehova. Ońola nje e? “Ná di si ya be̱ di bambabe̱ etum na mo̱.” (Bonahebe̱r 2:1) Nje ye ná yongwane̱ biso̱ o benga bolea Yehova na jemea e? Je ná di walame̱ne̱ o ebol’a dikalo, di wasa pe̱ mbadi ipe̱pe̱ ya be̱ mususu o ebol’a Yehova. (Langa Filipi 3:16.) Bolea la Yehova nde le mbad’a longe̱ ńe bwam buka ye̱se̱!—Myenge 84:11.

2. Nje epe̱pe̱ wangame̱nno̱ benga bola e?

To̱ná wāno̱ o su la jokwa la nin kalati, longe̱ lo̱ngo̱ ka kriste̱n mo̱ di me̱nde̱ wala oboso. Bibe̱l e makwala ná di “bo̱te mot’a peńa.” (Efeso 4:23, 24) Nika o mabengano̱ jokwa Eyal’a Loba, wukea pe̱ o ndongame̱n, o me̱nde̱ jokwa mambo ma peńa jombwea Yehova na bede̱mo bao. Wasa ne̱ni weno̱ ná o bata jembilane̱ Yehova o longe̱ lo̱ngo̱. Benga po̱ngo̱ mawengisan me̱se̱ ma mapule̱ ná o bwese̱ mo̱ muńe̱nge̱.

3. Ne̱ni Yehova a me̱nde̱no̱ jongwane̱ wa o benga ńaka e?

Bibe̱l e makwala ná: “Loba . . . a me̱nde̱ timbise̱ bińo̱ na ko̱iko̱i, embe̱ bińo̱, a bola bińo̱ ngińa, na sikime̱ye̱ bińo̱.” (1 Petro 5:10) Biso̱ be̱se̱ di makusa mikekisan. Nde Yehova a mabola biso̱ nje e mapule̱ ná janane̱ mo̱. (Myenge 139:23, 24) A kakane̱ o bola wa ńo̱ngi na ngińa ná o boleye mo̱ na jemea.—Langa Filipi 2:13.

 ALA O NJIBA

4. Benga kwalisane̱ na sengane̱ diko̱m lo̱ngo̱ di buki me̱se̱

Muka na jokwa la Bibe̱l bongwane̱ wa o timba diko̱m la Yehova. Ne̱ni nika ńeno̱ ná ńongwane̱ wa o bata sisea be̱be̱ na mo̱ e?

Langa Myenge 62:9, nde lo kwaleye pe̱ ońola min myuedi:

• Ná wouse̱ diko̱m lo̱ngo̱ na Yehova, nje weno̱ ná o po̱ngulane̱ o mika mo̱ngo̱ e?

Langa Myenge 1:2, nde lo kwaleye pe̱ ońola min myuedi:

• Ná wouse̱ diko̱m lo̱ngo̱ na Yehova, nje weno̱ ná o bola ná bolanga bo̱ngo̱ ba Bibe̱l bo bate be̱ wa muse̱ṅ e?

Nje weno̱ ná o bola ná o bate busane̱ tombwane̱ o jokwa la wame̱ne̱ e? Ná we̱ne̱ mambo mō̱ weno̱ ná o bola, ombwa SINIMA, nde lo kwaleye pe̱ ońola myuedi mi mabupe̱.

• Njika malea ma ni sinima weno̱ ná o we̱le̱ o ebolo e?

• Njika tema weno̱ ná o to̱ndo̱ jokwa e?

 EBONGOLO

Benga jouse̱ diko̱m lo̱ngo̱ na Yehova, o te̱se̱ pe̱ mambo ma mudī o bola. Na nika nde weno̱ ná o be̱ne̱ longe̱ le bonam o bwindea!

Ndimbisedi

• Ońola nje weno̱ ná o be̱ mbaki ná Yehova a me̱nde̱ jongwane̱ wa o bolea mo̱ na jemea e?

• Ne̱ni weno̱ ná wouse̱ diko̱m lo̱ngo̱ na Yehova e?

• O te̱se̱ te̱ mambo ma mudī o bola, ne̱ni nika ńeno̱ ná ńongwane̱ wa o ńaka e?