I ka bibulukalan y’i dɛmɛ ka koo caaman lɔn Jehova koo la. O y’a to i y’a kanu kosɔbɛ fɔɔ i y’i yɛrɛkun di a ma ani ka batize. N’i ma batize fɔlɔ, n’a sɔrɔ i b’a fɛ k’o le kɛ yanni dɔɔni. Nka n’i batizera, o kɔrɔ tɛ ko koow bɛɛ banna le. I be se ka to k’i magwɛrɛ Jehova la kudayi. Cogo di do?

1. Teriya min be ele ni Jehova cɛ, mun na i ka ɲi ka to k’o barika bonya?

Teriya min be an ni Jehova cɛ, fɔɔ an ka to k’an jija le k’o barika bonya. Mun na do? “Janko an kana na sira bla” ani k’an mabɔ a la (Eburuw 2:1, Biblu Ala ta Kuma). Mun lo be se k’an dɛmɛ an ka to ka baara kɛ Jehova ye kantigiya la? An bolo degunnin ka ɲi ka to waajuli baara la. Ka fara o kan, an ka ɲi ka to ka fɛɛrɛw ɲini walisa ka se ka baara kɛ bɛrɛbɛrɛ an ka Ala ye (Filipikaw 3:16 kalan). Ka baara kɛ Jehova ye, o ɲɛnamaya kɛcogo ɲɔgɔn tɛ yen!—Zaburuw 84:11.

2. I ka ɲi ka to ka koo wɛrɛ jumanw lo kɛ?

Tiɲɛn lo ko i ka bibulukalan banna sisan, nka i ka kerecɛnya be daminɛna le. Bibulu b’a fɔ ko an ka kan ka “jogokura ta.” (Efɛzikaw 4:23, 24). N’i tora ka Ala ka Kuma kalan ani ka taga kafo ka lajɛnw na, i bena fɛɛn caaman wɛrɛw lɔn Jehova n’a ka jogow koo la. A ɲini ka Jehova ka jogow ladegi koɲuman. I ka kan ka yɛlɛmani minw kɛ, banba k’u kɛ walisa ka Jehova ninsɔndiya.

3. Jehova bena i dɛmɛ cogo di ka ɲɛtaga kɛ?

Bibulu b’a fɔ ko: “Ala . . . yɛrɛ na aw [ka fɔrɔmasɔn] dafa, ka aw sabati, ka aw barika bonya, ka aw sinsin.” (1 Piyɛri 5:10, Bible senuma). An bɛɛ be kɔrɔbɔliw sɔrɔ. Nka, an mako be min na walisa ka lɔ kelen kan, Jehova b’o di an ma (Zaburuw 139:23, 24). A y’a daa di ko a bena a sago kɛli nege don i la. A y’a daa di fana ko a bena see d’i ma i ka baara kɛ ale ye kantigiya la.—Filipikaw 2:13 kalan.

 A ƝINI KA DƆ LƆN TUGUN

4.To ka kuma i teri sɔbɛ Jehova fɛ ani to k’a lamɛn

Delili ani bibulukalan ye i dɛmɛ ka kɛ Jehova teri ye. Cogo juman na o delinankow be se k’i dɛmɛ i ka to k’i magwɛrɛ Jehova la tuma bɛɛ?

Zaburuw 62:9 kalan. O kɔ, a’ ye ɲiningali nin kɛ ani ka baro kɛ o kan:

• I be se k’i ka deliliw cogoya fisaya cogo di walisa teriya min be e ni Jehova cɛ o barika ka bonya?

Zaburuw 1:2 kalan. O kɔ, a’ ye ɲiningali nin kɛ ani ka baro kɛ o kan:

• I be se ka mun lo kɛ walisa i ka Bibulu kalangwɛ k’i nafa bɛrɛbɛrɛ janko teriya min be e ni Jehova cɛ o barika ka bonya?

I be se ka mun lo kɛ walisa ka nafa sɔrɔ bɛrɛbɛrɛ i ka kelenna kalan na? Walisa ka hakilinata dɔw sɔrɔ o koo la, a’ ye VIDEWO filɛ. O kɔ, a’ ye ɲiningali nunu kɛ ani ka baro kɛ u kan:

• I be se ka videwo nin ka ladili jumanw lo sira tagama?

• A bena diya i ye ka kalan kɛ koo jumanw lo kan?

 MIIRIYA JƆNJƆN

Teriya min be ele ni Jehova cɛ, to k’o barika bonya, ani to ka laɲinita dɔw latigɛ Alako ta fan fɛ. O la, i bena se ka ɲɛnamaya kɛ hɛɛrɛ la fɔɔ abada!

I ye mun lo faamu?

• Mun na i lanin b’a la ko Jehova bena i dɛmɛ ka baara kɛ ale ye kantigiya la?

• Teriya min be ele ni Jehova cɛ, i be se ka mun lo kɛ walisa k’o barika bonya?

• N’i be ni laɲinitaw ye Alako ta fan fɛ, o bena i dɛmɛ cogo di ka ɲɛtaga kɛ?