KAPITE 60
Ke Ke Soko Atu Au Faiga
I lau ako le tosi leinei, na lasi a anoʼaga na ke ako o uiga mo Seova. Ti e matala ia, na lasi lou alofa kiate ia o ke soli ai lou maʼuli kiate ia ti mo papitema. Kāpau e lekise ke ʼaga o fai, e lagi ke fakatuʼutuʼu loa ke ke ʼaga o fakasoko. Ti e leʼaise gato ai au faiga i le aso leia na ke papitema ai. Kae e mafai lau fakafeofi tuʼumaʼu kia Seova i lou maʼuli kātoa. O fefeʼaki?
1. Koleā e tonu ai ke ke ʼaga o fakamakekeʼi lau felogoi mālie mo Seova?
E tonu ke soko atu le fakamakekeʼi o atātou felogoi mo Seova. Koleā lona tupuʼaga? ‘Ke ʼaua na tou tafea mamaʼo mei ai.’ (Epeleo 2:1) Koleā e tokoi mai ke tou nofo agatonu kia Seova? Ko latātou fai fakamafola tuʼumaʼu ti mo afa ni ʼiki atu anoʼaga ke lasi ake latātou tausi ki le Atua. (Lau Filipe 3:16.) Ka tou tausi kia Seova, ko le faʼasiga maʼuli lenā e mālie tukupau.—Pesalemo 84:11.
2. Koleā le tasi anoʼaga e tonu ke ke ʼaga o fai?
Logo ai kua ʼoki lau ako, kae koi soko atu fai lau fai ni fetogi i lou uiga Kilisiteano. E pati i le Tosi-Tapu e tonu ke tou ‘kofuʼi le tagata foʼou.’ (Efeso 4:23, 24) Kāpau e ke soko atu le ako o le Folafola a le Atua ti mo kau ki fono, e lasi loa a anoʼaga e ke ako o uiga mo Seova mo ona agaaga. Faiga pe fefeʼaki lau faifaitakiʼi a Seova ti ke soko atu lau fai a fetogi fuli i lou maʼuli ke fakafiafiaʼi ai a Seova.
3. E tokoi fefeʼaki atu loa a Seova ke tuputupu ai lau felogoi mo ia?
E pati feneʼeki i le Tosi-Tapu: ‘Ko le Atua . . . e ave loa e ia a koutou ki le mālie tukupau. E fakafefeka loa e ia koutou i le tui, mo fakamakekeʼi koutou, ti mo fakatuʼu makeke koutou.’ (1 Petelo 5:10) E fakasalaʼi a tātou fuli ke tou fai ni neʼa e veli. Kae e soli mai e Seova le makeke ke mafai latātou ʼaga o tekeʼi le koga lenā. (Pesalemo 139:23, 24) E fakapapau mai e Seova, e soli mai loa e ia le loto oli mo le makeke ke tou tausi agatonu ai kiate ia.—Lau Filipe 2:13.
MANATU LOLOTO
Ta tioʼi pe koleā e tonu ke ke fai ke soko atu le tuputupu o au felogoi mo Seova ti e tapuakinaʼi fefeʼaki e ia a koe.
4. Felogoi tuʼuʼmaʼu mo lou kauneʼa mālie
Na tokoi atu le faikole mo lau ako le Tosi-Tapu ke ke liliu o kauneʼa mo Seova. E tokoi fefeʼaki atu a anoʼaga anā ke ke fakafeofi tuʼumaʼu ai kiate ia?
Lau Pesalemo 62:9, ti fai le vesili leinei:
-
E fefeʼaki lau faiga ke sikisiki ake au faikole ke fakamakekeʼi ai au felogoi mo Seova?
Lau Pesalemo 1:2, ti fai le vesili leinei:
-
E fefeʼaki lau faiga ke sikisiki ake lau faʼasiga lau le Tosi-Tapu ke fakamakekeʼi ai au felogoi mo Seova?
Koleā e mafai ke ke fai ke lasi ake lau mālieʼia lau ako tokotasi le Tosi-Tapu? Kāpau e ke fia maʼua ni tokoi ki ai, tioʼi le GĀ ʼATA, ti fai a vesili e soa atu ki ai.
-
Koā a tokoi e mafai lau mulimuli ki ai?
-
Koā a manatu tāfito e ke fia ako loa?
5. Fai ni au fakatuʼutuʼu fakalaumālie
E tuputupu loa lau felogoi mālie mo Seova mo kāpau e ke fai ni au fakatuʼutuʼu fakalaumālie. Tioʼi le GĀ ʼATA, ti fai le vesili e soa atu ki ai.
-
Koā a mālilie na maʼua e Cameron i lana fai ni fakatuʼutuʼu fakalaumālie?
E leʼaise mafai ke tou ano fuli o faifakamafola i se tasi ake fenua. Kae e mafai ke tou fai ni fakatuʼutuʼu e tou mafai lona fakasoko. Lau Taagapati 21:5, ti fakakaukau ki fakatuʼutuʼu e mafai ke ke fai . . .
-
i le kokelekasio.
-
i le faifakamafola.
E tokoi fefeʼaki atu le pelesepeto leinei ke mafai le fakasoko o au fakatuʼutuʼu?
Ko fakatuʼutuʼu e mafai ke ke fakasoko
-
Faiga ke mālie ake au faʼasiga faikole.
-
Lau le Tosi-Tapu kātoa.
-
Ke ke iloa mālie a lātou o lou kokelekasio.
-
Kamata mo fai sau ako Tosi-Tapu.
-
Ke ke pionie vaeluaʼi temi pe kātoa.
-
Kāpau ko koe ko se taina, faiga ke ke liliu ko se tagata gaʼoi fakaminisitelio.
6. Maʼuli fiafia o leʼegato
Lau Pesalemo 22:27, ti fai le vesili leinei:
-
Koleā e mafai ke ke fai ke ke maʼuli fiafia i le temi nei ti mo leʼegato?
MANATU TĀFITO
Soko atu le fakamakekeʼi o au felogoi mo Seova ti mo fai ni au fakatuʼutuʼu fakalaumālie. Ti e ke maʼuli fiafia loa o leʼegato.
Fakamanatu
-
Koleā e ke tui māʼoki ai e tokoi atu loa a Seova ke ke tausi agatonu kiate ia?
-
E fefeʼaki lau fakamakekeʼi au felogoi mo Seova?
-
Koleā e ke tuputupu ai loa mokā ke fai ni au fakatuʼutuʼu fakalaumālie?
A ʼIKI MANATU
Koleā leia e maʼuiga ake kia Seova, ko lau fai se neʼa fakaofolele pe ko lau nofo agatonu kiate ia?
E mafai ki se kaunaga agatonu a Seova ke puli lona fiafia. Koleā e tonu ke fai e ia ke toe maʼua ai lona fiafia?
E fefeʼaki lau fai ni au fakatuʼutuʼu fakalaumālie ti fefeʼaki lona fakasoko?
Koleā leia e maʼuiga ai ke tou liliu ko se Kilisiteano kua fakapotopoto? Ti koleā e tonu ke tou ʼaga o fai ke tou kaku ki ai?