TOƁƁERE 60
Ɓeydee tiiɗingol weldigal mon ngal e Yahuwah Alla
Jannde mon Deftere Alla nden anndinii on piiji buy fii Yahuwah Alla. Ɗii piiji ɗi annduɗon wallii on yiɗugol Yahuwah Alla haa faaleɗon okkugol mo ngurndan mon ɗan e looteɗon maande kisiyee. Si hinaa non woniri, no gasa hiɗon faalaa waɗugol ɗun kisan. Kono wakkilaare mon nden fii ɓadagol Yahuwah Alla hattataa e lootegol maande kisiyee. Hiɗon haani jokkude tiiɗingol weldigal mon ngal e Alla. Ko honno waɗirton ɗun ?
1. Fii honɗun hiɗon haani jokkude tiiɗingol weldigal mon ngal e Yahuwah Alla ?
Hiɗen haani wakkilaade moƴƴa fii tiiɗingol weldigal men ngal e Yahuwah Alla. Fii honɗun ? Ko « fii wota en selu » mo (Yahuudiyankeeɓe 2:1). Ko honɗun wallata en luttugol rewugol Yahuwah Alla e hoore sella-finndeyaagal ? En waaway waɗude golle waajagol ngol e ɗaɓɓen pehe goo fii no ɓurtiren rewude Alla ko timmi (janngee Filipii 3:16). Alaa ko ɓuri hittude e nder ngurndan men ɗan si wonaa rewugol Yahuwah Alla ! (Zabuura 84:10).
2. Ko honɗun haanuɗon waɗude kadi ?
Hay si jannde mon Deftere Alla nden no lannude, ko jooni non ngurndan mon ɗan wa almasiiyaajo woni e fuɗɗaade. Deftere Alla nden wi’i hiɗen haani ‘ɓornaade tagudi heyri ndin’ (Efeesi 4:23, 24). Si on jokkii janngugol Daaluyee Alla on e tawegol ka pottite moftal, on annday piiji kesi fii Yahuwah Alla e fii sifaaji makko ɗin. Ɗaɓɓee pehe ɲemmbugol sifaaji makko ɗin ko timmi e nder ngurndan mon ɗan. Jokkee anndugol ko haanuɗon waylude fii weltingol Yahuwah Alla.
3. Ko honno Yahuwah Alla wallirta on fii no tiiɗiniron weldigal mon ngal e makko ?
Deftere Alla nden wi’i : « Alla […] heydintinoyay on kanko tigi, o tabintina on, o tiiɗinoya on, o waɗa on ɓe dillintaako » (1 Petruusu 5:10). Mo kala e men jarribete. Kono Alla okkay en doole ɗe hatonjiniɗen fii dartagol jarrabuyee (Zabuura 139:23, 24, VPFJ). Himo fodi okkugol en faale e doole ɗe hatonjiniɗen fii rewugol mo e hoore sella-finndeyaagal (janngee Filipii 2:13).
LUGGINEE
Ndaaren no jokkirton tiiɗingol weldigal mon ngal e Yahuwah Alla e no o barkinirta on non.
4. Jokkee yewtidugol e weldiiɗo mon hiɓɓuɗo
Toraare e jannde Deftere Alla nden wallii on wonugol giɗo Yahuwah Alla. Ko honno ɗun wallirta on ɓurton ɓadaade Alla ?
Janngee Zabuura 62:8 (62:9, VPFJ) e yewton fii ngal lanndal :
-
Fii tiiɗingol weldigal mon ngal e Yahuwah Alla, ko honno waɗirton fii kelɗingol toraaje mon ɗen ?
Janngee Zabuura 1:2 (VPFJ) e yewton fii ngal lanndal :
-
Fii tiiɗingol weldigal mon ngal e Yahuwah Alla, ko honno waɗirton fii kelɗingol janngugol mon Deftere Alla nden ?
Ko honno ɓurtirton heɓude nafa jannde mon Deftere Alla nden ? Fii heɓugol miijooji goo, fijinee VIDIO on e yewton fii lanndaale jokkituɗe ɗen.
-
E nder vidio on, ko piiji honɗi waawoton huutorde ?
-
Ko mas’alaaji honɗi faaleteɗon janngude ?
5. Waɗee faandaareeji fii no ɓurtiron rewude Alla no moƴƴiri
Waɗugol faandaareeji fii rewugol Yahuwah Alla wallay on no jokkiron ɓadagol mo. Fijinee VIDIO on e yewton fii lanndal jokkitungal ngal.
-
Ko nafa honɗun Kameron heɓi ko o waɗi faandaareeji fii no o ɓurtira ɓadaade Yahuwah Alla ?
Wonaa yimɓe ɓen fow waawata eggude leydi goo fii waajagol kibaaru moƴƴo on. Kono, en fow en waaway waɗude faandaareeji ko waaweten laatinde. Janngee Tindi 21:5 (VPFJ) e ndaaron ko faandaareeji honɗi faaleteɗon waɗude…
-
ka moftal.
-
ka golle waajagol.
Ko honno tugalal wonungal e nder oo aaya wallirta on laatingol faandaareeji mon ɗin ?
Piiji ɗi waawuɗon faandaade :
-
Kelɗingol toraaje mon ɗen.
-
Janngugol Deftere Alla nden fow.
-
Etagol fii anndugol mo kala ka moftal.
-
Fuɗɗagol jannugol goɗɗo Deftere Alla nden.
-
Wonugol waajotooɗo fii leereeji 15 e 30 maa waajotooɗo fii leereeji 50.
-
Si ko on musiɗɗo gorko, waɗee faandaare fii wonugol wallitotooɗo.
6. Heɓee ngurndan welɗan haa poomaa !
Janngee Zabuura 22:26 (22:27, VPFJ) e yewton fii ngal lanndal :
-
Ko honɗun haanuɗon waɗude fii heɓugol ngurndan welɗan hannde e ko aroyta haa poomaa ?
RAWNOODE
Jokkee tiiɗingol weldigal mon ngal e Yahuwah Alla e waɗon faandaareeji fii no ɓurtiron ɓadaade mo. Ɗun wallay on no heɓiron ngurndan welɗan haa poomaa !
Ndartannde
-
Fii honɗun hiɗon waawi hoolaade Yahuwah Alla wallay on rewugol mo e hoore sella-finndeyaagal ?
-
Ko honno tiiɗinirton weldigal mon ngal e Yahuwah Alla ?
-
Ko honno waɗugol faandaare wallirta on ɓurtugol ɓadaade mo ?
TASKEE
Ko honɗun ɓuri hittande Yahuwah Alla, ko waɗugol huunde wootere hawniinde fii hollugol hiɗen wonani mo kaa ko wonangol mo sella-finndeeɓe e nder ngurndan men ɗan fow ?
Hay sella-finndeejo rewoowo Yahuwah Alla no ara ka weltaare makko ɗuytoo. Ndaaree no o ɓeydirta weltaare makko nden kadi.
Ko honno waɗirton faandaareeji e laatinon ɗi ?
« Huutoree faandaareeji dewal fii mawningol Taguɗo on on » (Suudu Aynirdu ndun, 15 suwiye 2004)
Fii honɗun wonugol almasiiyaajo hellifaaɗo no hitti e ko honɗun waɗoton fii wonugol ɗun ?