Annan sa étid Labib-a, ou anprann bokou bagaj asou Jéova. É tousa ou anprann fè ou lanmou pou Jéova vin pi fò. Gras a sa, pitèt ou ja vouwé ou lavi pou Jéova é ou ja batizé. Si ou pòkò fè sa, pitèt ou ka réfléchi fè l’ titalò. Mé ou pa ka arété fè progrè jou ou batizé. Pou di vré, ou pouvé kontinyé fè ou lanmityé ké Jéova vin pi fò tout ou lavi. Mé kouman ou pouvé rivé fè sa ?

1. Poukisa ou divèt kontinyé fè ou lanmityé ké Jéova vin pi fò ?

Nou bézwen travay pou fè nou lanmityé ké Jéova vin pi fò. Poukisa ? « Pou nou pa janmen lésé anyen fè nou pédi nou chimen », é fè nou anbandonnen Jéova (Hébreux 2:1). Kisa ki ké idé nou rété fidèl douvan Jéova ? A pou nou kontinyé préché souvan é chaché ròt fason fè plis annan nou sèrvis pou Jéova (li Philippiens 3:16). Adoré Jéova, a pi bèl bagaj nou pouvé fè annan nou lavi ! (Psaume 84:10).

2. Ki ròt bagaj ou divèt kontinyé fè ?

Menm si ou léson biblik ka bout, ou lavi annan sèrvis Jéova fin koumansé. Labib-a ka di nou « abiyé ké nouvo pèrsonalité-a » (Éphésiens 4:23, 24). Pou fè sa, nou bézwen kontinyé étidyé Labib-a ké alé annan réinyon-yan. Si ou ka kontinyé étidyé Labib-a ké alé annan réinyon-yan, ou ké anprann toujou plis bagaj asou Jéova ké bèl kalité i gen. Chaché fè tousa ou pouvé pou imité pi byen pèrsonalité Jéova annan ou lavi. Kontinyé chanjé tousa ou gen pou chanjé annan ou lavi pou fè tchò Jéova kontan.

3. Kouman Jéova ké idé ou fè ou lanmityé ké li vin pi fò ?

Labib-a ka di : « Bondjé [...] ké fini fòrmé zòt li menm. I ké fè zòt divini djòk, i ké fè zòt divini fò, é i ké fè zòt rété byen dibout » (1 Pierre 5:10). Nou tout gen tantasyon. Mé Jéova ka bay nou fòrs nou bézwen pou rété fidèl douvan li (Psaume 139:23, 24). I ka promèt bay nou anvi aji, é an menm tan, bay fòrs nou bézwen pou aji (li Philippiens 2:13).

 ANNOU FOUYÉ ANNAN LABIB-A

4. Pa janmen arété kozé ké ou pi bon Zanmi

Lapriyè ké étid Labib-a idé ou divini zanmi Jéova. Mé kouman sa bagaj-ya pouvé idé ou fè ou lanmityé ké li vin pi fò ankò ?

Li Psaume 62:8, épi kozé asou sa késyon-an :

• Pou fè ou lanmityé ké Jéova vin pi fò, kisa ou pouvé chanjé annan fason ou ka priyè é annan sa ou ka di Jéova ?

Li Psaume 1:2, épi kozé asou sa késyon-an :

• Pou fè ou lanmityé ké Jéova vin pi fò, kouman ou pouvé fè ou lèktir di Labib-a divini pi vayan ?

Kouman ou pouvé fè ou étid di Labib-a divini pi vayan ? Pou jwenn déztrwa lidé, gadé VIDÉYO-a. Épi kozé asou sa késyon-yan :

• Annan konsèy ou jwenn annan vidéyo-a, kilès ou lé swiv ?

• Asou ki bagaj ou lé étidyé ?

 SA NOU WÈ

Kontinyé fè ou lanmityé ké Jéova vin pi fò é kontinyé chaché fè plis bagaj annan ou sèrvis pou Jéova. A konsa ou ké pouvé viv ké tchò kontan pou tout-tan !

Kisa ou anprann

• Poukisa ou pouvé sir ki Jéova ké idé ou rété fidèl douvan li ?

• Kouman ou pouvé fè ou lanmityé ké Jéova vin pi fò ?

• Poukisa chaché fè plis annan ou sèrvis pou Jéova ké fè ou lanmityé ké li vin pi fò ?