Rinanon te reirei n te Baibara aei, ko a atai ngkai baika bati ibukin Iehova. Ko a kairaki ni baike ko atai aikai bwa ko na rangi n tangiria, n te aro are ko a katabua iai maium ao ni bwabetito. Ngkana ko tuai karaoa anne, ma ko bae n iangoa karaoana nakon taai aika a na roko. Ma e aki toki kaanian Iehova ngkana ko a bwabetitoaki. Ko kona n teimatoa ni kaania Iehova n aki toki. N te aro raa?

1. E aera ngkai ko riai n teimatoa ni kakorakoraa am iraorao ma Iehova?

Ti riai ni kakorakoraira ni kateimatoa korakoran ara iraorao ma Iehova. Bukin tera? “Bwa ti aonga n aki betinako” mairouna. (Ebera 2:1) Tera ae e kona ni buokira bwa ti aonga n teimatoa ni kakaonimaki ni beku iroun Iehova? Ti kona ni katabetabeira n te mwakuri n uarongorongo ao ni kakaaei riki aanga ibukini kabatiaan riki ara tai ni beku iroun Atuara. (Wareka I-Biribi 3:16.) Te beku iroun Iehova bon te maiu ae te kabanea n tamaroa!​—Taian Areru 84:10.

2. Tera riki ae ko riai ni kateimatoa karaoana?

E ngae ngke e a bane am reirei n te Baibara ngkai, ma ko na bon teimatoa ni maiuakina te maiu ni Kristian. E taekinaki n te Baibara bwa ti riai ni “karina te aroaro ae boou.” (I-Ebeto 4:​23, 24) Ngkai ko teimatoa n reiakina Ana Taeka te Atua ao ni kaakaei bobotaki n taromauri, ane ko na nori baika boou ibukin Iehova ao aroarona. Kakaaei aanga aika ko na katotonga iai aroarona ni maium. Teimatoa ni karaoi bitaki aika kainnanoaki ibukini kakukureian Iehova.

3. E na kangaa ni buokiko Iehova bwa ko na ririkirake?

E kangai te Baibara: “E na katiaa kataneiaakimi te Atua. . . . E na kateimatoaingkami, e na kakorakoraingkami, ao e na kateingkami ni kaneneingkami n ami tabo.” (1 Betero 5:10) Ti bane ni kakaaitara ma kataaki. Ma e anganira Iehova baika ti kainnanoi bwa ti aonga n teimatoa ni korakora. (Taian Areru 139:​23, 24) E berita bwa e na anganiko te nano ao te korakora ni beku irouna ma te kakaonimaki.​—Wareka I-Biribi 2:13.

 REIAKINA AE BATI RIKI

4. Teimatoa ni mamaroro ma Raoraom ni koaua

E buokiko te tataro ao te reirei n te Baibara n riki bwa raoraon Iehova. A na kangaa mwakuri akanne ni buokiko bwa ko na kaania riki?

Wareka Taian Areru 62:​8, ao maroroakina te titiraki aei:

• Ibukini kakorakoraan am iraorao ma Iehova, ko na kangaa ni kanakoraoa riki am tataro?

Wareka Taian Areru 1:2 ao te kabwarabwara mai nano, ao maroroakina te titiraki aei:

• Ibukini kakorakoraan am iraorao ma Iehova, ko na kangaa ni kanakoraoa riki am wareware n te Baibara?

Ko na kangaa ni kakabwaiaaki ni karaoan am ukeuke n reirei n te Baibara i bon iroum? Ibukin noran iango tabeua, kaota te TAAMNEI, ao maroroakin titiraki aikai.

• Baikara reirei n ibuobuoki man te taamnei aei ae ko kona ni maiuakin?

• Baikara reirei aika ko kan ukeuke iai?

 KAKIMOTOTOANA

Teimatoa ni kakorakoraa am iraorao ma Iehova ao katei tiam n te onimaki. Ngkanne ko a kona naba ni kukurei n aki toki!

Kauring

• E aera ngkai ko kakoauaa raoi bwa e na boni buokiko Iehova bwa ko na beku irouna ma te kakaonimaki?

• Ko na kangaa ni kakorakoraa am iraorao ma Iehova?

• E na kangaa ni korakora am iraorao ma Iehova ngkana ko katei tiam n te onimaki?