60 NU GÈ NÒ
Kilsĩ́ Gè Siè Kpóó Ló O Gbaa Ló Kilma Ló Jìhóvà
O nó gã́bug nú ea kil ló Jìhóvà lọl mm̀ kpáí. Gbò nú eo ni nó a náa kọ ó vùlèe vaá be à sẹlẹ a náa kọ ó kìn lóó nèe vaá dììa múú. Be ò gáà naa vó, àé láá dú kọọ̀ ò gé bugi togó boo gè naa vó pọ́ì ńkem̀ tṍó àla. Sõò òó kilsĩ́ gè tõo bã ló Jìhóvà bã̀àna tṍó eo ni diia múú lọ̀l. Òó láá kilsĩ́ gè tõo bã ló Jìhóvà dọ̀ dè-dè. Mósĩ́ deè e?
1. Éé ní ea náa vaá à bọ́ló kọ ó kilsĩ́ gè olòó siè kpóó ló o gbaa ló kilma ló Jìhóvà ẹ?
Èé íè ge pììgà kọbé è láá kilsĩ́ gè siè kpóó ló bẹẹ gbaa ló kilma ló Jìhóvà. Ló éé? Kọbé née ‘dọọ̀ ààẹ́ nvée.’ (Híbrù 2:1) Éé ní ea é láá nvèè bá nèi kọ é kilsĩ́ gè fã̀ Jìhóvà mm̀ bọ́ọ̀ló dẹ̀lẹ̀ nyíé boo é? Èé láá kilsĩ́ gè olòó kọ́ kpẹ̀a vaá gbĩ́ dõòna kà sĩ́deè eé láá bọ̀ọ̀vẹ̀ gbàà bẹẹ sìtóm nè Bàrì. (Bugi Fílipaì 3:16.) Ge fã̀ Jìhóva ní ea dú kà lé sĩ́deè ge tõ̀òma dùm ẽ!—Psalm 84:10.
2. Dõòna kà éé ní ea bọ́ló kọ ó kilsĩ́ gè naa ẽ́?
Náa kál ló béè kọọ̀ òé gé nó kpáí lọ̀l, à bọ́ló kọ ó kilsĩ́ gè tõó dùm dì belí nen ea gé nyoone nvéè Kráìst. Kpá Káí síèi kpóó ló kọọ̀: “Nveai ãa nen.” (Ẹ́fẹsọ̀s 4:23, 24) Be ò kilsĩ́ gè nó Kpá Káí nè ge sí nònù, òé nó ãa-ãa nú ea kil ló Jìhóvà nè gbò a kpãa. Gbĩ́ gbò sĩ́deè eo é láá noomá gbò kpãà Jìhóvà mm̀ o dùm. Kilsĩ́ gè nyaaná bá ló gbò o sĩ́deè tõò dùm kọbé à ẹ́ẹ̀lẹ̀ nyíè Jìhóvà.
3. Mósĩ́ deè ní e Jìhóvà é nveè bá nè ni kọ ó sìm kilsĩ́ ẽ́?
Kpá Káí kọ́ọ̀: “Bàrì . . . é tú ńlẹ́ẹ̀ bá naamá kọ ó gbõomai vaá à náái agẹlẹ, tìvii, vaá naa ní e bè tọ́ọ̀ nu náa é láá kpõ̀ònài.” (1 Pítà 5:10) Dénè bẹ̀ì ólò tení bá ẹ̀bmà. Sõò Jìhóvà ólò nèi nú e íè bíi ló kọbé è láá bé èlbá. (Psalm 139:23, 24) À zigà ge nèni tàn nè kpóó kọbé ò láá sí tóm neèe mm̀ bọ́ọ̀ló dẹ̀lẹ̀ nyíé boo.—Bugi Fílipaì 2:13.
KPÁÁ NÓ BỌ̀Ọ̀VẸ̀
Bugi togó boo bé eo é láá sìm kilsĩ́ nè bé e Jìhóvà é tã́ànè ni dee bá naa.
4. Kilsĩ́ gè olòó zọ̀ o lé Kóò loá bel
Ge tã̀àgã ló Bàrì nè ge nó Kpá Káí a nveè bá nè ni kọ ó láá dú kóò Jìhóvà. Mósĩ́ deè ní e gè naa gbò nuí é nveè bá nè ni kọ ó kpáá palàge tõo bã̀é ló é?
Bugi Psalm 62:8, vaá ò gbóó aalai nakà bíbví:
-
Mósĩ́ deè ní eo é láá nyaaná bá ló gbò nú eo kọ́ọ̀ tṍó eo gé tãagã ló Bàrì kọbé à síè kpóó ló o gbaa ló kìlmàé ló é?
Bugi Psalm 1:2 nè émì nu ea di kè kẽ, vaá ò gbóó aalai nakà bíbví:
-
Mósĩ́ deè ní eo é láá kpáá tẹlẹ̀ bá ló bé eo bugì Kpá Káí naa kọbé à síè kpóó ló o gbaa ló kilma ló Jìhóvà ẹ?
Éé ní eo é láá naa kọbé o nò Kpá Káí palàge dọ̀ bélè e? Ge nyimá sìgà nú eo é láá naa, bìlà VÍDIÒÍ, vaá ò gbóó aalai gbò bíb ea nyoone.
-
Mókà gbò lọ̀ọ̀gà bùlà ea di mm̀ vídiòí ní eo é láá tú siimá tóm ẽ́?
-
Mókà togó bel ní ea é léémá ni gè nó nú ea kil ló é?
5. Noo gbò nú ea é náa kọ ó láá kilsĩ́ gè fã̀ Jìhóvà sẹ̀ẹ̀a sĩ́
Ge ié gbò nú eo noò sẹ̀ẹ̀a sĩ́ mm̀ ge fã̀ Bàrì é náa kọ ó sìm kilsĩ́. Bìlà VÍDIÒÍ, vaá ò gbóó aalai bíb ea nyoone.
-
Mm̀ vídiòá, mósĩ́ deè ní e Cameron beè ié bélè lọl ló gè noo nu sẹ̀ẹ̀a sĩ́ mm̀ ge fã̀ Bàrì e?
Níì kọ̀láá nen ní ea é láá kil dõòna kà dó gé kọ́ kpẹ̀aẹ́ nì. Sõò dénè bẹ̀ì é láá noo nu eé tẹá tùlà sẹ̀ẹ̀a sĩ́. Bugi Próvẹẹ̀b 21:5, vaá ò gbóó loi sọ́l boo gbò nú eo é láá noo sẹ̀ẹ̀a sĩ́ . . .
-
mm̀ bõ̀ònatõ̀ò.
-
tṍó eo gé kọ́ kpẹ̀a.
Mósĩ́ deè ní e nòòkúu ea di mm̀ dọ̀ Kpá Káíí é láá nvèè bá nè ni kọ ó teá tùlà gbò nú eo noò sẹ̀ẹ̀a sĩ́ ẽ́?
Sìgà nú eo é láá noo sẹ̀ẹ̀a sĩ́
-
Kpáá tẹlẹ̀ bá ló bé eo tã̀àgã ló Barì naa.
-
Bugi zivè kpoò Kpá Káí.
-
Gbĩ́ gè nyimá ló dénè nen ea di mm̀ bọọ bõ̀ònatõ̀ò.
-
Dààmà togó gè noòmà Kpá Káí nen.
-
Dú neǹ gyà deèsĩ́ tóm kọ̀ kpẹ̀a mm̀ kpulu dẽè tṍó àbèè dénè tṍó.
-
Be ọ̀ọ̀ págbálà, sìm tùlà ge dú neǹ nvèè bá sìtóm.
6. Dé kpéè ló dùm dọ̀ọ̀mà dè-dè!
Bugi Psalm 22:26, vaá ò gbóó aalai nakà bíbví:
-
Éé ní eo é láá naa kọbé ò dé kpéè ló dùm kátogóí nè dì deèsĩ́ ẽ́?
NÚ E NI NÓ
Kilsĩ́ gè siè kpóó ló o gbaa ló kilma ló Jìhóvà, vaá ò noo gbò nú ea kil ló gè fã̀ Bàrì sẹ̀ẹ̀a sĩ́. Be ò náa vó, òé gbóó láá dé kpéè ló dùm dọ̀ọ̀mà dè-dè!
Ge Òòa Boo
-
Éé ní ea náa vaá òó láá àgala boo kọọ̀ Jìhóvà é nveè bá nè ni kọ ó sí tóm neèe mm̀ bọ́ọ̀ló dẹ̀lẹ̀ nyíé boo é?
-
Mósĩ́ deè ní eo é láá siè kpóó ló o gbaa ló kilma ló Jìhóvà ẹ?
-
Mósĩ́ deè ní e gè noo gbò nú ea kil ló gè fã̀ Bàrì sẹ̀ẹ̀a sĩ́ é láá nvèè bá nè ni kọ ó sìm kilsĩ́ ẽ́?
KPÁÁ GBĨ́ TẼ́ LÓ
Éé ní e Jìhóvà ólò palàge nvèè ka ló é, é kọọ̀ nú e náà mm̀ ge bọ́ló dẹ̀lẹ̀ nyíé boo kìlmàé ló ene tóm, sẹ̀ nú e náà mm̀ ge bọ́ló dẹ̀lẹ̀ nyíé boo kìlmàé ló dénè deé mm̀ bẹẹ dùm ẽ?
Sìgà tṍó, kọbèè gyóòlo Jìhóvà ea bọ́ló dẹ̀lẹ̀ nyíé boo náa ólò ié zààvà. Ẹ̀b nú eé láá naa kọbé è kpáá ié zààvà be à nááá naa vó.
Kpáá Ié Zààvà Tení Dú Ló Ge Nó Nu Nè Ge Bugi Togó Boo Nu (5:25)
Mósĩ́ deè ní eo é láá noo gbò nú ea kil ló gè fã̀ Bàrì sẹ̀ẹ̀a sĩ́ vaá ò téá tùlà ẹ?
“Use Spiritual Goals to Glorify Your Creator” (Kpá Tọ Kùdẽe Ló, July 15, 2004)
Éé ní ea náa vaá à dú bíi kọ ó dú agẹló neǹ Kráìst e, vaá mósĩ́ deè ní eo é láá naamá vó é?
“Press On to Maturity—‘The Great Day of Jehovah Is Near’” (Kpá tọ Kùdẽe Ló, May 15, 2009)
