Wainma tü kasa pütüjaaitpakalü aaʼu nüchiki Jehová sünainjee pikirajaain sünain tü Bibliakat. Sünainjee tia, akooʼomüinraasü naalin Jehová püpüla jee eesüjaʼa paapüitpale paaʼin nümüin jee woutiisaichipale pia. Nnojoyürüle paaʼinrüin shia, eesüjaʼa paaʼinreerüle shia soʼu palit kaʼi. Müleka woutiisaichipale pia, ayata pukooʼomüinrüin punoula jee püchajaa sukuwaʼipa süpüla aleewain maʼin pia nümaa Jehová süpüla kaʼikat süpüshuaʼa. Wekirajaa sünain tü waaʼinrajatkat süpüla tia.

1. ¿Jamüsü choʼujaaka aleewain maʼin pia nümaa Jehová?

Wachajaainjatü sukuwaʼipa süpüla aleewain maʼin waya nümaa Jehová suulia seemiajaain wanoula jee suulia wooʼulaain suulia anoujaa (Hebreokana 2:1, TNM). ¿Kasa waaʼinrajatka süpüla waʼyataain waneepia nümüin Jehová? Tütüinjana waya sünain aküjaa pütchi otta wachajaainjatü sukuwaʼipa süpüla wakooʼomüinrüin waʼyataain nümüin (paashajeʼera Filipos 3:16). Anaʼleesia maʼin aʼyatawaa nümüin Jehová (Salmo 84:10).

2. ¿Kasa ayatüinjatka paaʼinrüin?

Mayaainjeʼe kettaain putuma ekirajawaa sünain karaloʼutakat tüü, ayatüinjatü pukooʼomüinrüin punoula. Süküjain tü Bibliakat ayatüinjatüin niiʼiratüin nukuwaʼipa wanee anoujashi (Éfeso 4:23, 24, TNM). Ayata pikirajaain sünain tü Bibliakat jee puutkajaa waneepia süpüla kooʼomüin tü pikirajaakalü anain nüchiki Jehová. Püchajaa sukuwaʼipa süpüla müin pukuwaʼipa maʼaka nukuwaʼipa Jehová. Ayataʼaya punouteʼerüin tü pukuwaʼipakat süpüla talatüin naaʼin Jehová pümaa.

3. ¿Kaseerü naaʼinraka Jehová süpüla nukooʼomüinrüin punoula?

Süküjain tü Bibliakat nikirajeenain waya Maleiwa, nükatsüinreerüin waaʼin otta nüchechereerüin waaʼin (1 Pedro 5:10, TNM). Wainma kasa ooʼulakünaka aka waaʼin, katchinjeetpejeʼe waaʼin nutuma Jehová süpüla wachecherüin waaʼin (Salmo 139:23, 24). Otta naapüin nünüiki pümüin süpüla keeʼireeinjatüin paaʼin aaʼinraa tü kasa anasü nüchekakat püpüleerua jee süpüla puuntuin paaʼinrüin shia (paashajeʼera Filipos 2:13).

 WEKIRAJAA SOOʼOMÜIN

4. Ayata paashajaain nümaa Jehová

Sünainjee puʼuraajawalin jee pikirajaʼawalin sünain tü Bibliakat, aleewashi maʼin pia nümaa Jehová. ¿Jamüinjatü sukuwaʼipa süpüla paaʼinrüin tia?

Jaashajeʼera Salmo 62:8 otta yooto jia süchiki tüü:

• Püküjale nümüin Jehová tü suluʼukat paaʼin puʼuraajapa nümüin, aleeweechi maʼin pia nümaa. ¿Kasa paaʼinrajatka süpüla müin shia putuma?

Jaashajeʼera Salmo 1:2 otta yooto jia süchiki tüü:

• Jülüja paaʼin tü paashajeʼerakalü achiki suluʼujee tü Bibliakat süpüla aleewain maʼin pia nümaa Jehová. ¿Jamüsü süpüla paaʼinrüin tia?

¿Kasa paaʼinrajatka süpüla katsüin punoula sünainjee tü pikirajaakalü anain suluʼujee tü Bibliakat? Anuu waneirua kasa eeka süpüla paaʼinrüin. Jünaja tü VIDEOKOT. Süchikijee, yooto jia süchiki tüü:

• ¿Kasa eeka süpüla paaʼinrüin maʼaka naaʼinrüin shia naya wawalayuukana?

• ¿Kasa pikirajaweeka anain suluʼujee tü Bibliakat?

 WATÜJAAITPAKA AAʼU

Ayata aleewain pia nümaa Jehová jee pükooʼomüinra piʼyataain nümüin. Müle shia putuma, aneerü pukuwaʼipa waneepia.

Pusouta shiʼipajee

• ¿Jamüsü pütüjaaka saaʼu nükaalinjeechin pia Jehová süpüla piʼyataain waneepia nümüin?

• ¿Kasa paaʼinrajatka süpüla aleewain maʼin pia nümaa Jehová?

• ¿Jamüsü choʼujaaka pukooʼomüinrüin piʼyataain nümüin Jehová süpüla katchin punoula?