NUPINPLỌN 60
To Haṣinṣan Towe hẹ Jehovah Hẹn Lodo Zọnmii
To Biblu pinplọn towe blebu whenu, ayihaawe ma tin dọ a ko plọn nususu gando Jehovah go. Nuhe a plọn lẹ ko zọ́n bọ a yiwanna ẹn taun, sọmọ bọ a gán ko klan dewe do wiwe na ẹn bo yí baptẹm. Eyin a ma ko wàmọ, vlavo a to tito basi nado wàmọ to madẹnmẹ. Amọ́, nukọnyiyi towe ma nọte do baptẹm kẹdẹ ji. A sọgan zindonukọn nado to haṣinṣan towe hẹ Jehovah hẹn lodo kakadoi. Gbọnna?
1. Naegbọn a dona zindonukọn nado to haṣinṣan towe hẹ Jehovah hẹn lodo?
Mí dona dovivẹnu sinsinyẹn nado to haṣinṣan mítọn hẹ Jehovah hẹn lodo zọnmii. Etẹwutu? Na e na zọ́n “bọ mí ma [na] danbú pọ́n gbede” sọn ewọ dè. (Heblu lẹ 2:1) Etẹwẹ sọgan gọalọna mí nado to Jehovah sẹ̀n po nugbonọ-yinyin po zọnmii? Mí sọgan hẹn alọnu mítọn ján to azọ́n yẹwhehodidọ tọn lọ mẹ bo nọ dín aliho devo lẹ nado sẹ̀n Jiwheyẹwhe mítọn to gigọ́ mẹ. (Hia Filipinu lẹ 3:16.) Jehovah sinsẹ̀n wẹ yin aliho gbẹninọ tọn dagbe hugan he mẹde sọgan de!—Salmu lẹ 84:10.
2. Nudevo tẹlẹ wẹ a dona zindonukọn nado to wiwà?
Dile etlẹ yindọ hodọdopọ sinai do Biblu ji ehe ko to vivọnu wá todin, gbẹzan towe taidi Klistiani de uwọ na gbẹ́ zindonukọn. Biblu dọ dọ mí dona “ze gbẹtọ-yinyin yọyọ lọ do.” (Efesunu lẹ 4:23, 24) Dile a zindonukọn nado to Ohó Jiwheyẹwhe tọn plọn bo to opli agun tọn lẹ yì, a na plọn nuyọyọ susu lẹ gando Jehovah po jẹhẹnu etọn lẹ po go. Nọ dín aliho lẹ nado nọ do jẹhẹnu Jiwheyẹwhe tọn nkọ lẹ hia dogọ to gbẹzan towe mẹ. Zindonukọn nado nọ basi diọdo depope he yin dandan tọn nado hẹn homẹ Jehovah tọn hùn.
3. Nawẹ Jehovah na gọalọna we nado to nukọnyi zọnmii gbọn?
Biblu dọmọ: “Jiwheyẹwhe . . . lọsu titi na dotana azọ́nplọnmẹ mìtọn. E na hẹn mì lodo, e na hẹn mì yin huhlọnnọ, e na hẹn mì nọtegli.” (1 Pita 5:10) Mímẹpo wẹ nọ yin whiwhlepọn nado wà nuylankan lẹ. Amọ́, Jehovah nọ na mí nuhe sin hudo mí do nado nọavùnte sọta yé. (Salmu lẹ 139:23, 24) Ewọ dopà nado hẹn mí tindo ojlo he mí nado sẹ̀n ẹn po nugbonọ-yinyin po gọna huhlọn he mí na yí do wàmọ.—Hia Filipinu lẹ 2:13.
DINDONANU DOGỌ
Gbadopọnna lehe a gán zindonukọn nado to nukọnyi do gọna lehe Jehovah na dona we do.
4. Zindonukọn nado nọ dọho hẹ Họntọn vivẹ́ towe
Dẹ̀hiho po Biblu pinplọn po ko gọalọna we nado lẹzun họntọn Jehovah tọn. Nawẹ nuwiwa enẹlẹ sọgan gọalọna we nado dọnsẹpọ ewọ dogọ gbọn?
Hia Salmu lẹ 62:8, enẹgodo dọhodo kanbiọ ehe ji:
-
Nawẹ a sọgan hẹn aliho he mẹ a nọ hodẹ̀ te pọnte dogọ nado hẹn haṣinṣan towe hẹ Jehovah lodo gbọn?
Hia Salmu lẹ 1:2 gọna nudọnamẹ odò tọn, enẹgodo dọhodo kanbiọ ehe ji:
-
Nawẹ a sọgan hẹn Biblu hihia towe pọnte dogọ gbọn nado hẹn haṣinṣan towe hẹ Jehovah lodo?
Nawẹ oplọn mẹdetiti tọn towe lẹ sọgan nọ hẹn ale wá na we dogọ gbọn? Nado mọ ayinamẹ delẹ, hò VIDEO lọ, enẹgodo dọhodo kanbiọ he bọdego lẹ ji.
-
Detẹ to ayinamẹ he to video lọ mẹ lẹ mẹ wẹ a na jlo nado sọgan yí do yizan mẹ?
-
Etẹlẹ ji wẹ a na jlo nado plọnnu do?
5. Nọ ze yanwle gbigbọmẹ tọn lẹ dai
Yanwle lẹ zizedai to sinsẹ̀nzọn Jehovah tọn mẹ na gọalọna we nado to nukọnyi zọnmii. Hò VIDEO lọ, enẹgodo dọhodo kanbiọ he bọdego ji.
-
To video lọ mẹ, nawẹ Cameron mọaleyi sọn yanwle gbigbọmẹ tọn lẹ zizedai mẹ gbọn?
Mẹlẹpo ma gán sẹtẹn yì lẹdo devo mẹ nado yì dọyẹwheho. Amọ́, mímẹpo wẹ gán ze yanwle he kọ̀n mí sọgan jẹ lẹ dai. Hia Howhinwhẹn lẹ 21:5, bo lẹnnupọndo yanwle he a gán zedai lẹ ji . . .
-
to agun mẹ.
-
to lizọnyizọn kunnudegbe tọn mẹ.
Nawẹ nunọwhinnusẹ́n he to wefọ ehe mẹ sọgan gọalọna we nado jẹ yanwle towe lẹ kọ̀n gbọn?
Yanwle he a sọgan zedai lẹ
-
Hẹn dẹ̀hiho towe pọnte dogọ.
-
Hia Biblu blebu.
-
Dovivẹnu nado yọ́n mẹlẹpo to agun towe mẹ.
-
Bẹ plọnmẹ Biblu de jẹeji bosọ nọ deanana ẹn.
-
Sẹ̀n taidi gbehosọnalitọ alọgọtọ tọn kavi whepoponu tọn.
-
Eyin mẹmẹsunnu de wẹ a yin, dovivẹnu nado pegan taidi devizọnwatọ lizọnyizọnwiwa tọn de.
6. Duvivi ogbẹ̀ tọn kakadoi!
Hia Salmu lẹ 22:26, enẹgodo dọhodo kanbiọ ehe ji:
-
Etẹwẹ a sọgan wà nado duvivi ogbẹ̀ tọn todin podọ kakadoi?
BLADOPỌ
To haṣinṣan towe hẹ Jehovah hẹn lodo zọnmii bo nọ ze yanwle gbigbọmẹ tọn lẹ dai. Gbọnmọ dali, a sọgan duvivi ogbẹ̀ tọn kakadoi!
Dogbapọn
-
Naegbọn a sọgan deji dọ Jehovah na gọalọna we nado to sinsẹ̀n ẹn po nugbonọ-yinyin po?
-
Nawẹ a sọgan hẹn haṣinṣan towe hẹ Jehovah lodo dogọ gbọn?
-
Nawẹ yanwle gbigbọmẹ tọn lẹ sọgan gọalọna we nado to nukọnyi gbọn?
PỌ́N NUDỌNAMẸ DEVO LẸ
Be nuyiwa mẹdezejo tọn ayidego tọn dopo de wẹ nọ họakuẹ na Jehovah hugan ya, kavi nugbonọ-yinyin na ẹn egbesọegbesọ to gbẹzan mítọn blebu mẹ?
Mẹhe tlẹ yin sinsẹ̀n-basitọ nugbonọ Jehovah tọn de gán hẹn ayajẹ etọn bu. Pọ́n lehe e sọgan gọ̀ ẹ mọyi do.
Gọ̀ Ayajẹ Towe Mọyi Gbọn Nupinplọn po Ayihamẹlinlẹnpọn po Dali (5:25)
Nawẹ a sọgan ze yanwle gbigbọmẹ tọn lẹ dai bo jẹ yé kọ̀n gbọn?
“Yí Yanwle Gbigbọmẹ Tọn lẹ Do Pagigona Mẹdatọ Towe” (Atọ̀họ̀-Nuhihọ́ lọ Tọn, 15 juillet 2004 tọn)
Naegbọn e yin nujọnu dọ Klistiani de ni whèwhín, podọ nawẹ a sọgan wàmọ gbọn?
A Gán Sọ Pọ́n Hosọ Ehelẹ
KANBIỌ HE MẸSUSU NỌ KANSE LẸ
Tito Biblu Pinplọn Tọn Tẹwẹ Kunnudetọ Jehovah Tọn lẹ Do?
Vọnu wẹ tito Biblu pinplọn tọn Kunnudetọ Jehovah tọn lẹ tọn, podọ a gán zan lẹdogbedevomẹ Biblu tọn depope. Voawu nado ylọ whẹndo towe blebu po họntọn towe depope po wá nupinplọn lọ tẹnmẹ.
