KUKWE JA TÖTIKARA 60
Nirien jankunu ja üairebiti
Mä ja tötikani nüke nete, yete kukwe keta kabre namanina gare Jehovabätä mäi. Ye köböire mätä Ngöbö tarere bäri yebätä mäkwe ja dianinkä mento aune ja ngökanina ñöte. Mä jämi nuainne ngwane mä töita nuainbätä raba ruin nunye. Akwa ja ngöka ñöte ye bitikäre mä rabadre nirien jankunu ja üairebiti. Mä raba nemen ja kete bäri kwin Jehovabe kärekäre. Mä raba nuainne ño ye ani mike gare jai.
1. ¿Ñobätä mä rabadre ja keta Jehovabe ye mike bäri dite?
Nikwe ja di ngwandre krubäte ja keta Jehovabe ye mikakäre bäri dite. Ne kwe ni ñan jänrikadre “ji Ngöbökwe bäre mento” aune kämikadrekäbätä (Hebreos 2:1). ¿Dre käkwe ni dimikai ja ngwen metre jankunu Jehovai? Kukwe driedre käre aune sribi mada nuaindre Ngöbö kräke ye tä ni dimike ja ngwen metre jankunu Jehovai (mäkwe ñäkä Filipenses 3:16 yebätä). Sribi Jehová kräke ye bäri kwin sribi mada ye kräke (Salmo 84:10).
2. ¿Mäkwe dre nuaindre jankunu?
Ja tötika ne kitra krüte mäi, akwa ji ja üairebiti ye krire mätä kömike. Ni kristiano rabadre nemen “ni btin kwrere” nieta Bibliakwe (Efesios 4:23, 24). Mäkwe ja tötikai jankunu Kukwe Ngöbökwebätä aune mä täi näin gätäbätä konkrekasion ben ngwane, Jehová rabai gare bäri kwin mäi. Mä raba ja ngwen ño niara erere yebätä mäkwe kukwe känä käre. Dre tä ükadrete mäi ye mäkwe ükate jankunu kä ngwankäre juto Jehovabätä.
3. ¿Ño Jehovakwe mä dimikai nirien jankunu ja üairebiti?
Bibliata niere: “Ngöbö ye ara jire käkwe mun mikadi juto […]. Mun mikadi nünenkä dite kwe amne ja di biandi kwe munye amne mun mikadi dikekä janknu kwe” (1 Pedro 5:10). Ni jökrä nuateta kukwe käme nuainkäre, akwa Jehovata ja di bien nie ja tuakäre kukwe yebe (Salmo 139:23, 24). Ne madakäre, niarakwe mä töi mikai aune ja di biain kwe mäi, ne kwe mäkwe sribidre metre kräke käbämikata kwe (mäkwe ñäkä Filipenses 2:13 yebätä).
JA TÖTIKE BÄRI NGUSETA
Mä raba dre nuainne ririakäre jankunu kukwe ja üairebiti aune Jehovakwe kukwe meden kwin mikai bare mä kräke ye ani mike gare jai.
4. Käre mäkwe blita ja ketamuko bäri kwin mäkwe yebe
Orasion aune ja tötika Bibliabätä ye käkwe mä dimikani ja kete Jehovabe. ¿Kukwe ye raba mä dimike ne kwe ja rabadre ruin bäri ken mäi?
Ñäkädre Salmo 62:8 yebätä aune kukwe ne kädriedre jabe:
-
Mäkwe orasion nuaindi bäri kwin ngwane mä rabai ja kete bäri kwin Jehovabe, ¿mä raba nuainne ño?
Ñäkädre Salmo 1:2 yebätä aune kukwe ne kädriedre jabe:
-
Ja tötika bäri kwin Bibliabätä ye raba mä dimike ja kete bäri kwin Jehovabe, ¿mä raba nuainne ño?
¿Mä raba dre nuainne ne kwe mäta ja tötike kaibe Bibliabätä ye rabadre bare bäri kwin mäi? Mä raba nuainne ño ye mikakäre gare jai. VIDEO mikadre ñärärä, biti kukwe ne kädriedre jabe:
-
¿Kukwe nieta videote ye meden mä törba nuaindi?
-
¿Kukwe medenbätä mä törba ja tötikai?
5. Mäkwe kukwe ja üaire mika nuaindre jai
Mäkwe kukwe ja üaire mikai nuaindre jai ye käkwe mä dimikai nirien jankunu ja üairebiti. VIDEO mikadre ñärärä, biti kukwe ne kädriedre jabe:
-
¿Cameron kukwe ja üaire mikani nuaindre jai ye käkwe dimikani ño?
Ni jökrä ñan raba niken kukwe driere juta madate. Akwa ni jökrä raba kukwe nuain raba nikwe ye mike nuaindre jai. Ñäkädre Proverbios 21:5 yebätä aune kukwe ne kädriedre jabe:
-
¿Mä raba kukwe meden mike nuaindre jai konkrekasionte?
-
¿Mä raba kukwe meden mike nuaindre jai kukwe driekänti?
¿Kukwe ja jie ngwankäre Bibliabätä ne raba mä dimike ño kukwe ja üaire mäta mike nuaindre jai ye mike nemen bare?
Mä raba ne nuainne
-
Orare bäri kwin.
-
Ñäke täte Bibliabätä.
-
Ja mräkätre konkrekasionte mikadre gare bäri kwin jai.
-
Ja tötika kömikadre ni iti ben.
-
Prekursor auxiliar o regular nuaindre.
-
Ni brare ja di ngwandre nemen siervo ministerial.
6. Mä raba nüne kä jutobiti kärekäre
Ñäkädre Salmo 22:26 yebätä aune kukwe ne kädriedre jabe:
-
¿Mä raba dre nuainne nünankäre kä jutobiti nengwane aune kärekäre?
¿DRE NIBI GARE MÄI?
Ja keta Jehovabe ye mike bäri dite aune kukwe ja üaire mike nuaindre jankunu jai. Ye köböire mäkwe nünandi kä jutobiti kärekäre.
Ngwankäreta törö
-
¿Jehovakwe mä dimikai ja ngwen metre käre ye ñobätä gare metre mäi?
-
¿Mä raba dre nuainne ja ketakäre bäri kwin Jehovabe?
-
¿Ririakäre ja üairebiti ñobätä ütiäte mäkwe kukwe ja üaire mikadre nuaindre jai?
KUKWE MIKE GARE BÄRI JAI
Dre bäri ütiäte Jehová kräke, ¿sribita krubäte kräke o ja ngwanta metre?
Ni ja ngwanka metre Jehovai raba kite di nekä ja üairebiti. Dre raba dimike ye mike gare jai.
¿Kukwe ja üaire mikadre nuaindre jai yekäre dre ribeta aune dre ribeta mikakäre nemen bare?
“Kukwe ja üaire mikadre nuaindre jai Ngöbö käi kitakakäre” (Ni Mikaka Mokre, 15 julio 2004)
Ni kristiano rabadre ünä ja üairebiti ye ñobätä ütiäte aune mä raba nuainne ño ye mike gare jai.
Ne rabai tuen kwin mäi arato
KUKWE NGWANTARITA BÄRI
¿Ja tötika Bibliabätä drieta ni testiko Jehovakwe ye abokän ño?
Ni testiko Jehovakwe tä ni tötike ye ütiä kärä ñaka aune mä raba ja tötike Biblia jeñe mäkwe yebiti. Ne madakäre mä raba mä mräkä jökrä o ja ketamuko ye nübaire jabe ja tötike.
