ZAJ KAWM 60
Ua Kom Koj Muaj Kev Sib Raug Zoo Nrog Yehauvas Ntxiv
Txij thaum koj pib kawm phau ntawv no los, koj yeej kawm tau ntau yam txog Yehauvas uas ua rau koj hlub nws heev. Tej zaum koj twb muab koj lub neej cob rau nws thiab ua kev cai raus dej lawm. Yog koj tseem tsis tau ua li ntawd los tej zaum koj yeej npaj siab yuav ua li ntawd lawm. Tiam sis thaum koj ua kev cai raus dej tag lawm los, koj yeej tseem yuav tau ua kom koj haj yam muaj kev sib raug zoo nrog Yehauvas ntxiv thiab. Koj yuav ua li cas, koj thiaj ua tau li ntawd?
1. Vim li cas koj thiaj yuav tsum rau siab ua kom koj muaj kev sib raug zoo nrog Yehauvas ntxiv?
Peb yuav tsum sib zog ua kom peb txoj kev phooj ywg nrog Yehauvas ruaj khov, peb thiaj yuav tsis “txav deb” ntawm Yehauvas. (Henplais 2:1) Puas muaj dab tsi pab kom peb muab siab npuab rawv Yehauvas thiab teev tiam nws mus li? Ib qho uas yuav pab tau peb yog rau rau siab mus tshaj tawm txoj xov zoo thiab nrhiav lwm txoj hau kev los teev tiam Yehauvas ntxiv. (Nyeem Filipis 3:16) Rau qhov lub neej teev tiam Yehauvas yog lub uas zoo tshaj plaws.—Phau Ntawv Nkauj 84:10.
2. Puas tshuav lwm yam uas koj yuav tau ua ntxiv thiab?
Txawm koj kawm phau ntawv no los xaus rau tshooj no lawm los koj lub neej ua ib tug Khixatias tseem nyuam qhuav pib xwb. Phau Vajlugkub hais tias peb yuav tsum “muab lub siab tshiab los coj.” (Efexus 4:23, 24) Thaum koj rau siab kawm Vajtswv Txoj Lus thiab mus tej kev sib txoos tsis tu ncua, koj yuav kawm tau ntau yam tshiab ntxiv txog Vajtswv Yehauvas thiab nws tus yam ntxwv. Ua zoo xyaum Yehauvas tus yam ntxwv thiab yog muaj tej yam uas koj yuav tau hloov thiaj haum Yehauvas siab los kav tsij rau siab ntso hloov.
3. Vajtswv Yehauvas yuav pab koj li cas?
Phau Vajlugkub hais tias: ‘Vajtswv yuav pab kom koj ua tau neeg zoo kawg nkaus, thiab kom koj muab siab rau ntseeg Vajtswv heev ntxiv. Nws yuav txhawb koj lub zog kom koj nyob ruaj nreeg.’ (1 Petus 5:10) Peb txhua tus yeej yuav raug kev sim siab tiam sis Yehauvas yuav pab peb txoj kev ntseeg kom ruaj khov. (Phau Ntawv Nkauj 139:23, 24) Nws cog lus tias nws yuav pab kom koj kub siab lug teev tiam nws thiab muaj zog npho ua li nws lub siab nyiam.—Nyeem Filipis 2:13.
KAWM NTXIV
Xav seb koj yuav ua li cas koj thiaj muaj kev sib raug zoo nrog Yehauvas ntau ntxiv thiab Yehauvas yuav foom koob hmoov li cas rau koj.
4. Yehauvas yog koj tus phooj ywg uas zoo tshaj plaws, nco ntsoov nrog nws tham tsis tu ncua
Kev thov Vajtswv thiab kev kawm Vajlugkub pab tau koj los ua Yehauvas tus phooj ywg. Ob qho no ho yuav pab kom koj haj yam muaj kev sib raug zoo nrog nws ntxiv li cas?
Nyeem Phau Ntawv Nkauj 62:8 thiab tham txog lo lus no:
-
Raws li nqe Vajlugkub no hais, koj yuav thov Yehauvas li cas koj txoj kev sib raug zoo nrog nws thiaj yuav haj yam ruaj khov ntxiv?
Nyeem Phau Ntawv Nkauj 119:97 thiab tham txog lo lus no:
-
Koj yuav ua li cas thaum koj nyeem phau Vajlugkub, koj txoj kev sib raug zoo nrog Yehauvas thiaj yuav ruaj khov ntxiv?
Koj yuav ua li cas tej koj kawm hauv phau Vajlugkub thiaj li pab tau koj? Saib seb ib co kwv tij nkauj muam ua li cas. Saib zaj YEEB YAJ KIAB thiab tham txog ob lo lus no:
-
Koj xav xyaum tus qauv twg hauv zaj yeeb yaj kiab no?
-
Puas muaj lwm yam uas koj xav kawm thiab?
5. Npaj kom koj teev tiam Yehauvas tau ntau ntxiv
Zoo rau koj npaj tej hom phiaj uas yuav pab koj teev tiam Yehauvas ntau ntxiv. Saib zaj YEEB YAJ KIAB thiab tham txog lo lus no:
-
Qhov uas Khameloos (Cameron) muaj hom phiaj xav teev tiam Yehauvas ntau ntxiv pab tau nws li cas?
Tseem muaj ntau yam rau cov uas mus tshaj tawm tsis tau txawv teb chaws ua. Nyeem Pajlug 21:5 thiab muab coj los ua zoo xav seb koj yuav npaj li cas koj thiaj li . . .
-
pab tau lub koom txoos.
-
txhawb tau kev tshaj tawm.
Nqe Vajlugkub no pab koj ua tau li koj lub hom phiaj li cas?
Tej hom phiaj uas koj ua tau
-
Xyaum kom koj txawj thov Vajtswv tshaj qub.
-
Nyeem phau Vajlugkub kom tag nrho.
-
Paub txhua tus hauv koj lub koom txoos.
-
Nrhiav kom tau ib tug uas xav kawm Vajlugkub.
-
Ua ib tug pab tho kev los sis ib tug tho kev.
-
Yog koj yog ib tug kwv tij, rau siab ua kom koj tau ua ib tug tub leg num.
6. Nyob kaj siab lug mus ib txhis!
Nyeem Phau Ntawv Nkauj 22:26 thiab tham txog lo lus no:
-
Koj yuav ua li cas koj thiaj li muaj kev zoo siab tam sim no thiab mus tas ib txhis?
KOJ KAWM TAU DAB TSI
Rau siab ua kom koj txoj kev phooj ywg nrog Yehauvas haj yam ruaj khov ntxiv thiab muaj hom phiaj kom koj teev tiam tau Yehauvas ntau ntxiv, koj thiaj tau lub neej kaj siab lug mus ib txhis.
Rov Tham Dua
-
Vim li cas koj thiaj ruaj siab tias Yehauvas yuav pab kom koj teev tiam tau nws mus li?
-
Koj yuav ua li cas koj txoj kev phooj ywg nrog Yehauvas thiaj li ruaj khov?
-
Vim li cas qhov uas koj ua raws li koj lub hom phiaj thiaj pab tau koj haj yam muaj kev sib raug zoo nrog Yehauvas ntxiv?
TSHAWB NTXIV
Qhov twg muaj nqi tshaj rau Yehauvas, qhov uas peb ua ib yam zoo zoo cuag cas rau nws ib zaug xwb los yog qhov uas peb muab siab npuab rawv nws thiab teev tiam nws mus ib txhis?
Txawm cov uas muab siab npuab rawv Yehauvas los muaj tej thaud lawv kuj tseem qaug zog thiab. Saib seb ua li cas lawv thiaj rov muaj kev zoo siab.
Koj yuav muaj tej hom phiaj teev tiam Yehauvas zoo li cas koj thiaj yuav ua tau?
“Tej Hom Phiaj Uas Ua Rau Tus Tswv Tsim Tau Koob Meej” (Phau Tsom Faj lub 7 Hli tim 15 xyoo 2004)
Vim li cas thiaj tseem ceeb rau txhua tus Khixatias yog neeg paub tab li tus laus neeg? Koj yuav ua li cas koj thiaj ua tau li ntawd?
Tej Yam No Yuav Pab Tau Koj Thiab
TEJ UAS COOB TUS NUG TXOG
Kev Kawm Vajlugkub Nrog Yehauvas Cov Tim Khawv Zoo Li Cas?
Yehauvas Cov Tim Khawv qhia Vajlugkub dawb xwb. Koj xav siv phau Vajlugkub twg los kawm los yeej tau. Koj yeej caw tau tag nrho koj tsev neeg thiab koj tej phooj ywg tuaj nrog koj kawm.
