Okupitira momerihongero wOmbeibela nga, ove we rihonga ovingi ohunga na Jehova. Oviṋa mbi we rihonga vya tjita kutja u mu suvere nomasa, nu ngahino we riyandja omuini ku ye nu opapitisiwa. Indu tji pe he ri nao, ove mape ya mo ripurire kokutjita nao moruyaveze rwopopezu. Posi ya kombunda yombapitisimo, ove u kayenda komurungu okukurisa oupanga woye ku na Jehova. Ove mo yenene okutjita nao nga aruhe. Omomuano uṋe?

1. Omena raye tji mo sokukayenda komurungu okukurisa oupanga woye ku na Jehova?

Eṱe matu sokukondja nomasa kutja tu kayende komurungu okukurisa oupanga wetu ku na Jehova. Omena raye? “Kokutja atu ha undurirwa kwarwe,” poo okupoka ku Mukuru. (Ovaheberi 2:1) Ovikwaye mbi mavi tu vatere okukayenda komurungu okukarera Jehova nouṱakame? Omokuungura otjiungura tjokuzuvarisa nokupaha omiano vyarwe vyokukarera Mukuru. (Lesa Ovafilipi 3:16.) Okukarera Jehova ootjiṋa otjisembasemba mehupo.—Epsalme 84:10.

2. Ovikwaye vyarwe mbi mo sokukayenda komurungu okutjita?

Nandarire kutja omerihongero woye wOmbeibela nga ye ya komaandero, ehupo roye otjOmukriste mari kayenda komurungu. Ombeibela i tja matu “sokurihwikika omundu omupe.” (Ovaefese 4:23, 24) Otja tji mo kayenda komurungu okurihonga Embo ra Mukuru nokuyenda kozombongarero zombongo, mo rihongo oviṋa ovipe ohunga na Jehova novikaṋena vye. Paha omiano mu mo yenene okuhorera kovikaṋena vye mehupo roye. Kayende komurungu okutjita omarundurukiro ngu maye heperwa po kutja u yorokise Jehova.

3. Jehova me ku vatere vi okukurisa oupanga woye ku na ye?

Ombeibela i tja: “Ndjambi omuini . . . me mu pwisa; Eye me mu zeuparisa momasa we ne mu zikamisa.” (1 Petrus 5:10) Atuhe tu muna omarorero wokutjita oviṋa ovivi. Posi ya Jehova u tu pa oviṋa mbi matu hepa kutja tu nakaure omarorero ngo. (Epsalme 139:23, 24) Eye wa kwizika okukupa ombango nomasa kutja u mu karere nouṱakame.—Lesa Ovafilipi 2:13.

 KONḒONONA OUKOTO

4. Kayende komurungu okuhungira ku nEpanga roye roposengo

Ongumbiro nomakonḓononeno wOmbeibela ye ku vatera kutja u rire epanga ra Jehova. Omomuano uṋe oviṋa mbyo mu mavi yenene okukuvatera okutumbuka popezu tjinene na ye?

Lesa Epsalme 62:8, nu okuzambo hungirira kepuriro ndi:

• Ovikwaye mbi mape ya o rundurura ohunga nomuano mbu u kumba, kutja u kurise oupanga woye ku na Jehova?

Lesa Epsalme 1:2, nu okuzambo hungirira kepuriro ndi:

• Mo yenene vi okutjita omarundurukiro komalesero woye wOmbeibela, kutja u kurise oupanga woye ku na Jehova?

Mo yenene vi okurundurura omakonḓononeno woye omuini wOmbeibela kutja ye ku vatere tjinene? Okutara koviṋa tjiva mbi mavi ku vatere, nyanda OKAVIDIO, nu okuzambo hungirira komapuriro ngu maye kongorere mba.

• Ovikwaye mbi ri mokavidio mbi mo yenene okuungurira ko?

• Omapu yeṋe ngu mo vanga okukonḓonona?

 OKUYARUKIRA PO OUSUPI

Kayende komurungu okukurisa oupanga woye ku na Jehova nu kara nozondando motjiungura tje. Indu tji wa tjiti nao, ove mo yenene okuyorokera ehupo nga aruhe.

Okurizemburukisa

• Ongwaye tji mo yenene okukara nongamburiro kutja Jehova me ku vatere okurira omuṱakame ku ye?

• Mo yenene vi okukurisa oupanga woye ku na Jehova?

• Okukara nozondando motjiungura tja Jehova maku ku vatere vi okukara noupanga ouwa ku na Jehova?