Sekumbang pengawa belajarka Bup Kudus tu, nuan udah belajar mayuh utai pasal Jehovah sereta ngemansangka pengerindu ngagai Iya. Nuan engka berunding deka nyerahka diri ngagai Jehovah lalu dibaptisa tauka nuan engka udah dibaptisa. Kingatka meh, pemaptisa nuan ukai pengujung iya. Tang nya semina pun aja. Nuan ulih majak semak ngagai Jehovah belama iya. Baka ni nuan ulih ngereja nya?

1. Nama kebuah nuan patut terus negapka kaul nuan enggau Jehovah?

Bup Kudus meransang kitai terus negapka kaul kitai enggau Jehovah “ngambika kitai enda limpang” ari Iya. (Hebrew 2:1) Kitai ulih mengkang tetap ati enti kitai seruran ransing ba pengawa nginjil sereta ngiga peluang ngereja mayuh agi ke Jehovah. (Bacha Pilipi 3:16.) Amat, nyembah Jehovah nya jalai pengidup ti pemadu manah!—Masmur 84:10.

2. Nama agi patut digaga nuan?

Taja pan pelajar ba bup tu udah abis, tang agi bisi utai bukai ke patut digaga nuan. Bup Kudus madahka, kitai patut terus “nyadi mensia ti baru.” (Epesus 4:23, 24) Seraya nuan mansik Jaku Petara sereta enggau pengawa begempuru, nuan deka agi ngelala Jehovah enggau pemanah Iya. Maya nya, nuan engka sedar bisi utai bukai ba pengidup nuan ke patut dikemanahka agi. Enti nuan terus nentuka runding enggau ulah nuan sejalai enggau peneka Petara, tu tentu deka ngelantangka ati Iya. Nya alai, anang meh mantul.

3. Baka ni Jehovah nulung kitai ngaga pemansang ba pengarap?

Bup Kudus madahka: ‘Petara ti pun semua pengasih . . . deka nembuka latih kita, ngering sereta negapka kita.” (1 Peter 5:10, NWT) Semua kitai tentu napi penguji. Tang Jehovah meri kitai utai ti diguna ngambika ulih ngelaban penguji nya. (Masmur 139:23, 24) Iya mega besemaya deka meri kitai pengeran sereta pengering ngambika mengkang tetap ati ngagai Iya.—Bacha Pilipi 2:13.

 BELAJAR MAYUH AGI

4. Terus bejaku sereta ningaka Jehovah

Besampi enggau belajarka Bup Kudus udah nulung nuan nyadi pangan Jehovah. Baka ni tu ulih ngasuh kaul nuan enggau Jehovah majak rapat agi?

Bacha Masmur 62:8, lalu kerandauka tanya tu:

• Kena negapka kaul enggau Jehovah, baka ni nuan ulih ngemansangka kualiti sampi nuan?

Bacha Masmur 1:2, lalu kerandauka tanya tu:

• Kena negapka kaul enggau Jehovah, baka ni nuan ulih ngemanahka agi pengawa macha Bup Kudus nuan?

Nama patut digaga nuan ngambika bulih mayuh agi penguntung ari pengawa belajarka Bup Kudus kediri empu? Mainka VIDEO, kena meda sekeda chara ti beguna, udah nya kerandauka tanya tu.

• Nama chara ari video nya ke deka dikena nuan?

• Nama topik ke deka dipansik nuan?

 LANSA

Tegapka kaul nuan enggau Jehovah lalu tetapka juluk ati ba pengarap. Nya meh resia kena idup enggau lantang belama iya!

Ulang Kaji

• Nama kebuah nuan ulih andal Jehovah deka nulung nuan nyembah Iya enggau tetap ati?

• Baka ni nuan ulih negapka kaul enggau Jehovah?

• Nama kebuah juluk ati ba pengarap ulih nulung nuan ngaga pemansang ba pengarap?