Ipu ɛjɛɛji aɛlā ō nwu nōo yɔ ipu ɔkpá nyā, a lɛ ɛlā alɛwa nwu lɛyikwu Ujehofa ɛ. Ɔdā nɛ a jé lɛyikwu ɔ a cɛ gā uwɔ yihɔtu nu nɛhi, a kē lɔfu kwu iyi uwɔ u gwɛɛya lɛ ɔ klla lɛ ubatisim ya ɛ. A jé ŋ, a lɔfu yɔ i gbɛla kóō gboji gɛ ŋ a géē lɛ iyi uwɔ gwɛɛya klla lɛ ubatisim ya. Amáŋ, igbihi nɛ a lɛ ubatisim ya, á gáā lɛ abɔ ci ō yɔ i tubla Ujehofa ajaajɛ nóó. A lɔfu yɔ i tubla Ujehofa ajaajɛ ogboogbo ɛcɛ. Ɛgɛnyá?

1. Ɔdiya nɛ a cika ō yɔ i gɔbu ya ku ɛma ku uwɔ mla Ujehofa kóō yɔ i lɔfu iyē a?

Alɔ cika ō ceyitikwu lɔfu lɔfu ku alɔ lɔfu tu ɛma ku alɔ mla Ujehofa iyē. Ɔdiya? “O yá ɛ́ɛ́ kú ɔdā dúú kóō je alɔ ɔtū ŋmá” ɛgiyi nu ŋ. (Ācɛ Uhíbru 2:1) Ɔdi gáā tu alɔ abɔ ku alɔ hayi kpaakpa yɔ i gba Ujehofa ɛ̄gbā a? Alɔ lɔfu yɔ i gɔbu ipu uklɔ ku ɔna ō ta ojigogo klla dɔka aɔwɛ ɔhá nɛ alɔ géē yɔ i gba Ujehofa ɛ̄gbā tōōtɔ̄ɔ̄. (Jé Ācɛ Ufílipāyi 3:16.) Ō yɔ i gba Ujehofa ɛ̄gbā wɛ ɔwɛ nōo lɔhi fiyɛ duu ipu oyeeyi a!—Aíjē Kú Ɛ̄gbā 84:10.

2. Ɔdi wɛ ɔdā ɔhá nɛ a cika ō yɔ i ya gɔbu a?

Naana nɛ oklɔcɛ ku Ubáyíbu nyā yɔ i wa oŋmɛyi a, oyeeyi ku Ɔcɛ Yɛce Ukraist nɛ a yɔ i lā a géē yɔ i gɔbu kpɔ. Ubáyíbu kahinii: Alɔ “géē je pīya ɔ̄cɛ ɛ̄yīpɛ̄ ā piíí.” (Ācɛ Ɛ́fēsɔsi 4:23, 24) A géē yɔ i nwu aɛlā ɛyipɛ lɛyikwu Ujehofa mla auce ō ya ku nu abɔ a yɔ i gɔbu ya oklɔcɛ ku Ubáyíbu nōo wɛ ɛlā ku Ɔwɔico klla yɔ i gā ōjila ku ujɔ a. Dɔka ɔwɛ ōhī nɛ a géē yɔ i gbla uce ō ya ku Ɔwɔico ipu oyeeyi ku uwɔ. Gɔbu ku a yɔ i ya opiyabɔ duuma nōo cɛgbá nōo klla géē cɛ lɛ Ujehofa gweeye a.

3. Ɛgɛnyá nɛ Ujehofa géē ta uwɔ abɔ ku a yɔ i jɛ gɔbu a?

Ubáyíbu kahinii: “Ɔwɔicō . . . géē yá ká aá le jōōjīla ipú alelékwū. Ó géē yá kú aá lɔtu ce ɔ̄ lɔfú fíyɛ́, ká aá háyi kli, ká ɔdā dúú kóō jíla aá iye ŋ́.” (1 Upíta 5:10) Ɛjɛɛji alɔ gē má ojama. Amáŋ, Ujehofa yɔ i je ɔdā nɛ alɔ cɛgbá a lɛ alɔ o ya ɛɛ ku alɔ hayi kli. (Aíjē Kú Ɛ̄gbā 139:23, 24) Ó cokonu ka anuɔ géē je ɔtu mla ɔfu nɛ a cɛgbá a gā uwɔ o ya ɛɛ ku a hayi kpaakpa ipu ɛ̄gbā ō gba ku nu.—Jé Ācɛ Ufílipāyi 2:13, NW.

 JÉ GƆBU

4. Bēē kɛla klla jahɔ tu Ɔya ku uwɔ nōo lɔhi fiyɛ duu a

Ɔkɔ ō gba mla oklɔcɛ ku Ubáyíbu ō ya ta uwɔ abɔ kwu piya ɔya ku Ujehofa ɛ. Ɛgɛnyá nɛ aɔdā ō ya ɔɔma géē ta uwɔ abɔ ku a tubla Ujehofa ajaajɛ fiyɛ a?

Jé Aíjē Kú Ɛ̄gbā 62:8, cɛɛ ku aa kɔka lɛyikwu aɔka nōo ba nyā:

• O ya ɛɛ ku a lɔfu tu ɛma ku uwɔ mla Ujehofa a, opiyabɔ nyá nɛ a lɔfu ya lɛyikwu ɔwɛ nɛ a gē gbɔɔkɔ a? Ɔdi nɛ a kē lɔfu da Ujehofa ipu ɔkɔ ō gba ku uwɔ a?

Jé Aíjē Kú Ɛ̄gbā 1:2, cɛɛ ku aa kɔka lɛyikwu ɔka nyā:

• O ya ɛɛ ku a lɔfu tu ɛma ku uwɔ mla Ujehofa a, ɛgɛnyá nɛ a géē ya lɔhi fiyɛ ipu Ubáyíbu ō jé ku uwɔ a?

Ɛgɛnyá nɛ a lɔfu ya lɔhi fiyɛ ipu oklɔcɛ ku abɔyi uwɔ a? O ya ɛɛ ku a má aɔwɛ ōhī, lɛ UVIDIO nyā mafu, cɛɛ ku aa kɔka lɛyikwu aɔka nōo ba nyā.

• Aukɔ́ nyá ŋma ipu uvidio a nɛ a géē dɔka ō bi le yuklɔ a?

• Ikpɛyi ɛlā nyá nɛ a géē dɔka ō klɔcɛ a?

 ƆDI NƐ A NWU A?

Ya ku ɛma ku uwɔ mla Ujehofa kóō yɔ i lɔfu iyē ku a klla miya ɔdā ō ya ipu ɛ̄gbā ō gba ku nu. Cɛɛ a géē jɔɔnyɛ oyeeyi ogboogboo ɛcɛ!

Aɔka ō tu alɔ ɛlá kwu ɔdā nɛ alɔ nwu

• Ɔdiya nɛ a jé kpɔcii ku Ujehofa géē ta uwɔ abɔ ku a gba ɔ ɛ̄gbā klla hayi kpaakpa lɛ ɔ a?

• Ɛgɛnyá nɛ a géē ya ku ɛma nɛ a lɛ mla Ujehofa a kóō yɔ i lɔfu iyē a?

• Ɛgɛnyá nɛ ō miya ɔdā ō ya ipu ɛ̄gbā ō gba ku Ujehofa géē ta uwɔ abɔ ku a yɔ i jɛ gɔbu a?