Kw’iko k’ẹ chanẹ ech’ukọchẹ ọtakada-i, ẹ kọchẹ amẹñwu wewe lugbo Jihofa mẹ. Amẹñwu k’ẹ kọchẹ-i jẹñwu ẹ fẹdọ Jihofa nyọnyọ. I la neke che kaki ẹ f’ọla wẹ datẹ ñwu Jihofa k’ẹ la che baptism mẹ. Ichẹñwu ki ma dabalẹ n, i neke che kaki ẹ kpibe k’ẹ che ichẹñwu ki dẹ pẹẹ. Ama, baptism ch’ukpoji n, uchanẹ etẹmẹru Jihofa i che. Ẹ neke na tẹmẹru Jihofa t’ogbegbelẹ. Abu ẹ neke ch’e-lẹ le?

1. Ẹñwu chi ki dukpẹ k’ẹ na ch’amẹñwu ki ajẹñwu ẹ na tẹmẹru Jihofa nyọnyọ?

Otila i che k’a chalu du k’a neke che k’a na tẹmẹru Jihofa nyọnyọ. Ẹñwu chi? Todu k’a we “na t’ọwọ ka b’Ọjọ ki deju tẹ.” (Abo Hibru 3:12) Ẹñwu neke ch’atẹko wa k’a na rẹ Jihofa kp’ẹdọ wa chaka? A neke kp’ẹdọ r’uchẹnyọ ejẹ, a la ñọ neke tene am’ọna ojoji ojoji omunẹ k’a neke na r’Ọjọ wa kp’ẹdọ wa chaka. (Gba Abo Filipai 3:​16.) Erẹ Jihofa chẹñwu ki nyọ tule k’onẹ neke d’ọlai-wñ che!​—Eli Ekọ D’Ọjọ 84:10.

2. Ẹñwu chẹñwu omunẹ ki dukpẹ k’ẹ che?

Ochochi i che kaki ukọchẹ wẹ ef’ọtakada-i aw’ukpoji mẹ. Ama, i dukpẹ k’ẹ na chẹñwu ki ajẹñwu ẹ na tẹmẹru Jihofa nyọgba. Baibul kakini i dukpẹ k’a “m’onẹ etitọ omunẹ lẹ du tọla.” (Abo Ẹfẹsọs 4:​23, 24) Alu k’ẹ ch’ukọchẹ Baibul wẹ alo, k’ẹ la aw’ujeju abudọ, ẹ kọchẹ amẹñwu etitọ lugbo Jihofa kpai am’ali ọmẹmẹlẹ omunẹ ki nẹ. Tene am’ọna k’ẹ neke ch’awọli am’ali-wñ ọmẹmẹlẹ ef’ọlai wẹ nyọnyọ. Na ch’amarida ki dukpẹ k’ẹ che k’ẹ neke na jẹñwu ẹdọ Jihofa bọ.

3. Ọna ẹñwu Jihofa ach’atẹko wẹ k’ẹ neke gwọnyu kpaka?

Baibul kakini: “Ọjọ . . . onugo ache mẹ teju-wñ kpa, i ad’ẹrẹ-mẹ nyanẹ, i ad’ugbiti ñwu mẹ.” (1 Pita 5:​10) Ọgbọdu wa adejudo am’ajama. Ama, Jihofa ad’ukpahiu ki dukpẹ ñwu wa k’ọla wa ki we kpa. (Eli Ekọ D’Ọjọ 139:​23, 24) I gbalu kaki i ad’ẹdọ kpai ukpahiu ñwẹ k’ẹ neke r’owñ kp’ẹdọ wẹ chaka.​—Gba Abo Filipai 2:​13.

 N’UMA NYỌGBA

4. Na ch’adua ru Jihofa k’ẹ la na ch’ukọchẹ Baibul iko duu

Adua kpai ukọchẹ Baibul k’ẹ che chẹñwu ki jẹñwu ẹ ch’onukwu ọmẹmẹlẹ kpai Jihofa. Abu amẹñwu-i neke ch’atẹko wẹ k’ẹ mẹru Jihofa t’akwobi le?

Gba Eli Ekọ D’Ọjọ 62:​8, ubilẹ mẹ ch’oluka oji ene-i:

• Todu k’onukwu wẹ kpai Jihofa ki lonyanẹ nyọnyọ, ẹñwu ẹ neke rida efu adua wẹ lugbo ọna k’ẹ ch’adua le?

Gba Eli Ekọ D’Ọjọ 1:​2, ubilẹ mẹ ch’oluka oji ene-i:

• Todu k’onukwu wẹ kpai Jihofa ki lonyanẹ nyọnyọ, abu ẹ neke jile manyu efu Baibul egba wẹ?

Amẹñwu ẹ neke che k’ẹ neke jile nyọnyọ kwefu ukọchẹ Baibul k’ẹ che kp’ọla wẹ? K’ẹ neke li amẹñwu k’ẹ neke che, g’IFIDIO-i, ubilẹ mẹ ch’oluka oji am’ene-i.

• Efu am’ọna ojoji ojoji ku ma kọla oji-wñ ef’ifidio-i, ugbo e-k’ẹ neke du chekwu dẹ?

• Ẹñwu ch’oji-ọla k’ẹ ñeju k’ẹ du ch’ukọchẹ Baibul?

 ẸY’ỌLA UKỌ-I

Na jẹñwu agbade wẹ kpai Jihofa ki lonyanẹ k’ẹ la tu amẹñwu k’ẹ fọtaru. Lefu e-lẹ, ẹ neke jura abajọ-i atu ogbegbelẹ!

Ẹñwu ẹ kọchẹ?

• Ẹñwu jẹñwu ẹ ma jali kaki Jihofa ach’atẹko wẹ k’ẹ neke gwọny’owñ kpaka?

• Abu ẹ neke jẹñwu agbade wẹ kpai Jihofa ki lonyanẹ?

• Abu amẹñwu k’ẹ fọtaru neke jẹñwu ẹ gba nyọgba efu arẹ wẹ ñwu Jihofa?