Bei Bible tolumọye bị, biin yeama ka kị Jehovah gbelemọ yọ bọọ ị́ tolumọdẹ. Iné tolumọdẹ yebo kaanghaba ị́ mịẹ angọ dịẹpaamọ Jehovah pịrị wẹrị benible dẹ kpọ paa emi. Anịghakpọ, ị́mịnị bịsẹ yọ mịẹmụ bara tọn mịnị. Ị́mịnị benible dẹ kpọ ifiemọsẹ tẹmẹanga bọọ kaasọụ bọlọụ a mú. Ifiemọsẹ angọ akị Ọkpọnanaowei mọ naịn. Ị́mịnị tebara ka kị bịsẹ ye mịẹ a paa emi a o?

1. Ị́mịnị tetuu kị duonị ị́ mọ Jehovah mọ nanawẹrị emi ikie mịẹ kụrọmọ agbẹị emi a o?

Wósẹ angọtụa dá wó akị Jehovah ghọ nanawẹrị emi ikie mịẹ kụrọmọ agbẹị emi. Tetuu a o? Omịnị bịsẹ bara mịẹ daba “Omịnị bá benebene tẹịn korogha fa.” (Hebrews 2:1) Teeki baratụa wó pịrị wẹrị peibolou nana bara akị Jehovah karịtimi dụụ laa mịnị a o? Egberigbaa fịrịwẹnị kụrọmọ bá angọtụa zịnị ụwọụama nị baratụa ị́ pịrị wẹrị ebibara Ọkpọnanaowei karị a paa emi ụwọụama dọụ paamọ. (Philippians 3:16 goo.) Wó ụndụbo akị Jehovah karị-mịnị yọ kị ebidẹịn emi!—Psalm 84:10.

2. Ị́mịnị teeki mịẹ bọlọụ a mú agbẹị emi a o?

Alaghatimi omịnị mị fun tolumọ siin mịnị, anịa ị́mịnị mọkpọ Christtuuduo kịmị bara kị inyenrin bọlọụ a mú mịnị. Bible gbaa wó pịrị mị omịnị “aya inyenrinbụọ seritụa.” (Ephesians 4:23, 24) Ị́mịnị Bible tolumọ má kingdom hall a yetolumọyọ a mú mịnị ifiesẹ, ị́mịnị aya yeama tolumọ bá Jehovah kpọ nimi dẹịn mịnị. Ebibara Jehovah inyenrinbụọ tolumọ dá, Jehovah daa inyenrin. Pẹlẹgha bara Jehovah mịẹ pọwẹị mịnị yeama kị mịẹ.

3. Jehovah tebara ka kị baratụa ị́ pịrị bọlọụ bụọ a paa emi a o?

Bible gbaa mị: “Ọkpọnanaowei . . . iné dọụ yebosẹ akị ị́ tolumọ mịnị. Omịnị ị́ mịẹ tịẹ-kụrọ mịnị, omịnị ị́ mịẹ kụrọmọ mịnị, omịnị baratụa ị́ pịrị benebene zigeigha fa.” (1 Peter 5:10) Ọkpọnanaowei karị-mịnị bolou bị daadiyeama wósẹ laa mịnị. Jehovah baratụa akị wó pịrị wẹrị laa daadiyebosẹ daatịẹmọ mịnị. (Psalm 139:23, 24) Jehovah, dịsẹ nanayọ mọ, bá kụrọ mọ kọn wó pịrị wẹrị peibolou nana bara akị ụ karịtimi bẹseri bẹseri laa mịnị.—Philippians 2:13 goo.

 EBIBARA TUUDỌỤ

4. Ifiemọsẹ ebibara iné ikie ụbọ mọ ẹrẹtei

Tẹẹbịbị, bá Bible tolumọ yọmị baratụa ị́ pịrị wẹrị Jehovah ikie ụbọ a paa dẹ. Anịa bei yebo tebara ka kị ị́ mịẹ Jehovah mọ naịn dẹịn mịnị a o?

Psalm 62:8 goo dá, bei biibịbị kẹrị ẹrẹtei:

• Ị́mịnị tebara ka kị iné tẹẹbịbị mịẹ ebimọ wẹrị, ị́ mọ Jehovah mọ nanawẹrị emi ikie mịẹ kụrọmọ dẹịn a paa emi a o?

Psalm 1:2 goo bá footnote kpọ dii dá, bei biibịbị kẹrị ẹrẹtei:

• Ị́mịnị tebara ka kị iné bẹtịbị Bible tolumọye mịẹ ebimọ wẹrị, ị́ mọ Jehovah mọ nanawẹrị emi ikie mịẹ kụrọmọ dẹịn mịnị a o?

Ị́mịnị tebara ka kị iné bẹtịbị Bible tolumọye mịẹ ebimọ dẹịn a paa emi a? Zụa mịẹmụ yeama dii, VIDIO farị dá, biibịbị kẹrị ẹrẹtei.

• Mị vidio bị gbaa wẹrị emi yebo, ị́mịnị teeki mịẹ a paa emi a?

• Te egberitịbịama kị ị́ mọ tolumọ dọụ mịnị a o?

 KỊLỌỌBARA

Pẹlẹgha bara ị́ mọ Jehovah mọ nanawẹrị emi ikie mịẹ kụrọmọ. Bá angọtụa tẹmẹanga bọọ mịẹ agbẹị emi yesẹ mịẹ mịnị aba, ị́mịnị pọwẹịtimi bẹseri bẹseri laa mịnị!

Waị diitụa

• Ị́mịnị tetuu kị duonị Jehovah baratụa ị́ pịrị wẹrị, peibolou nana bara ụ karịtimi dụụ laa mịnị bara biberin ma o?

• Ị́mịnị tebara ka kị ị́ mọ Jehovah mọ nanawẹrị emi ikie mịẹ kụrọmọ a paa emi a o?

• Tẹmẹanga bọọ mịẹmụye tọnpẹlẹ mịnị yọmị tebara ka kị baratụa ị́ pịrị wẹrị Jehovah mọ naịn dẹịn a paa emi a o?