Ndai laika buk hpe hkaja wa sai majaw, Yehowa a lam hpe nang grai law hkra chye wa sai. Chye wa sai lam ni a majaw, shi hpe tsawra wa nna tinang hkum hpe apnawng nna hkalup hkam da sai rai na re. N rai yang mung, kade nna yang hkalup hkam na matu myit nga na re. Raitim, rawt jat ai lam gaw hkalup hkam ngut ai hpang hkring mat ai n re. Yehowa hte htani htana matut hku hkau hkra galaw ra ai. Gara hku galaw lu na kun?

1. Yehowa hte hku hkau lam ngang kang hkra hpa majaw matut galaw ging ai kun?

Yehowa hte hku hkau lam matut ngang kang na matu shakut ra ai. Hpa majaw kun? Rai yang she, shi kaw na “anhte n yit mat” na re. (Hebre 2:1) Yehowa hpe sadi dung let matut nawku lu hkra hpa gaw karum ya lu ai kun? Hkaw tsun bungli hta amu law nga nna, Karai a magam hpe grau gun hpai lu hkra ahkaw ahkang tam ai hku nna re. (Hpilipi 3:16 hpe hti u.) Yehowa a magam gun ai gaw kaja htum prat hkrun lam re!​—Shakawn 84:10.

2. Matut nna hpa naw galaw ging ai kun?

Ndai Chyum Laika hkaja lamang gaw ngut sai raitim, Hkristan langai hku nna matut asak hkrung ra ai. “Gawng shing-yan ningnan hpe dagraw” ra ai ngu Chyum Laika hta tsun da ai. (Ehpesu 4:​23, 24) Chyum Laika hpe matut hkaja nna zuphpawng ni hpe ayan lung yang, Yehowa hte shi a atsam ningja ni hpe grau chye wa na re. Shi a atsam ningja ni hpe prat hta htep lahti hkan sa lu hkra shakut u. Yehowa a myit shapyaw ya lu hkra, ra ai lam ni hpe matut galai shai u.

3. Matut rawt jat hkra Yehowa gara hku karum ya na kun?

Chyum Laika hta ndai hku tsun da ai: “Karai Kasang gaw, shi hkum nan, nanhte hpe shakup shatsup na, shangang shakang na hte n-gun sharawng na ma rin dai.” (1 Petru 5:10) Anhte yawng gaw, gunglau hkrum chye ai. Raitim, ninghkap lu hkra Yehowa karum ya lu ai. (Shakawn 139:​23, 24) Shi hpe sadi dung let magam gun lu hkra, galaw mayu ai myit hte galaw lu ai atsam jaw na ngu shi ga sadi jaw da ai.​—Hpilipi 2:13 hpe hti u.

 Kahtap Hkaja

4. Kaja htum Manang hte matut mahkai nga u

Chyum Laika hkaja ai hte akyu hpyi ai gaw, Yehowa a jinghku byin hkra karum ya lu ai. Shi hte grau hku hkau hkra dai lam ni gaw gara hku karum ya ai kun?

Shakawn 62:8 hpe hti nna, ndai ga san hpe bawngban u:

• Yehowa hte hku hkau lam ngang kang na matu, akyu hpyi ai atsam hpe rawt jat hkra gara hku galaw mai na kun?

Shakawn 1:2 hpe hti nna, ndai ga san hpe bawngban u:

• Yehowa hte hku hkau lam ngang kang na matu, Chyum Laika hti ai hpe rawt jat hkra gara hku galaw mai na kun?

Tinang hkrai hkaja ai lamang hpe grau lachyum nga hkra gara hku galaw mai ai kun? Galaw mai ai lam nkau hpe chye na matu, VIDEO hpe hpaw. Dai hpang ndai ga san ni hpe bawngban u.

• Ndai video hta lawm ai gara hpaji jaw ga ni hpe nang hkan sa mai ai kun?

• Gara lam hpe nang grau hkaja mayu ai kun?

 Kadun Dawk

Yehowa hte hku hkau lam ngang kang hkra galaw u. Wenyi bandung ni jahkrat u. Rai yang, htani htana ngwi pyaw lu na re!

Bai Maram

• Yehowa hpe sadi dung let nawku lu hkra, shi karum ya na ngu ai hpe hpa majaw kam mai ai kun?

• Yehowa hte hku hkau lam ngang kang hkra gara hku galaw na kun?

• Wenyi bandung ni jahkrat ai gaw matut rawt jat hkra gara hku karum ya lu ai kun?